ដោយគង់ សូរិយា
ភ្នំពេញ៖ ពិព័រណ៍អចលនទ្រព្យលំដាប់អន្តរជាតិដ៏ធំមួយ នឹងចាប់ផ្តើមនៅចុងខែតុលាខាងមុខនេះ ស្របពេលវិស័យនេះបាន និងកំពុងរីកចម្រើនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។
អគ្គនាយកគេហទំព័រ Realestate.com.kh លោក Tom O”Sullivan បានមានប្រសាសន៍ក្នុងស្និសីទសារព៌តមានស្តីពី ការរៀបចំពិព័រណ៍អចលនទ្រព្យកម្ពុជាប្រចាំឆ្នាំ២០១៨នាព្រឹកថ្ងៃទី៤ កញ្ញានេះថា រហូតមកទល់ពេលនេះ មនុស្សជាង៤០០០នាក់បានចុះឈ្មោះរួចរាល់ហើយ ដើម្បីចូលរួមក្នុងព្រឹត្តិការណ៍នេះ ហើយយើងព្យាករណ៍ថាពិព័រណ៍ដ៏ធំនេះ នឹងទាក់ទាញអ្នកទិញផ្ទះ និងអ្នកវិនិយោគអចលនទ្រព្យយ៉ាងតិច៦០០០នាក់។លោកបន្តថា ប្រទេសកម្ពុជាកំពុងក្លាយជាទិសដៅ របស់វិនិយោគិនអចលនទ្រព្យលំដាប់អន្តរជាតិ នៅទូទាំងតំបន់អាស៊ាន ប្រទេសចិន និងពិភពលោក ហើយបើធៀបនឹងប្រទេសជិតខាងក្នុងតំបន់ កម្ពុជាបានផ្តល់កម្មសិទ្ឋកាន់កាប់អចលនទ្រព្យសម្រាប់ជនបរទេស និងមានទស្សនវិស័យចំពោះកំនើនវិនិយោគដ៏រ៉ឹងមាំ។
លោកបន្តថា គោលបំណងពិព័រណ៍អចលនទ្រព្យចាប់ពីថ្ងៃទី១៩ ដល់២០តុលាខាងមុខ គឺដើម្បីលើកកំពស់វិស័យអចលនទ្រព្យនៅកម្ពុជា ទាំងសម្រាប់ទីផ្សារក្នុងស្រុក និងអន្តរជាតិ។ លោកបន្តថា យើងកំពុងប្រមូលផ្តុំនូវគំរោងអភិវឌ្ឍន៍ថ្មីៗ ល្អៗ ព្រមទាំងក្រុមហ៊ុនផ្សេងៗដែលមានឥទ្ឋិពល និងដើរតួនាទីសំខាន់ក្នុងទីផ្សារកម្ពុជា។
ពិព័រណ៍នេះ មានការចូលរួមសហការពីប្រព័ន្ឋផ្សព្វផ្សាយក្នុងស្រុកជាច្រើន ដូចជា គេហទំព័រ Propertyarea.asia សារព៌តមានថ្មីៗ និងគេហទំព័រ Freshnews ជាដើម។
ពិព៌ណនេះ នឹងរៀបចំឡើងនៅសណ្ឋាគារនិងកាស៊ីណូណាហ្កា១ ដែលអនុញ្ញាត្តឲ្យអ្នកចូលរួមទស្សនា និងស្វែងរកទិញអចលនទ្រព្យដែលដាក់លក់ និងមានការបញ្ចុះ តម្លៃពិសេសផងដែរ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់បានបង្ហាញថា ទុនវិនិយោគក្នុងវិស័យសំណង់ក្នុងរយៈពេល៨ខែឆ្នាំនេះ មានទឹកប្រាក់ជិត៣ពាន់លានដុល្លារអាមេរិក។
លោក Tom O”Sullivan បានបន្តថា ពិព័រណ៍អចលនទ្រព្យជាការជួយបង្រួមគម្លាតរវាងវិនិយោគិន និងឳកាសវិនិយោគរបស់ពួកគេ ព្រោះនៅពេលអ្នកវិនិយោគមកពីតំបន់នានា និងពិភពលោកមកដល់ក្រុងភ្នំពេញ ដើម្បីចូលរួមពិព័រណ៍អចលនទ្រព្យរបស់យើង ពួកគេនឹងបានយល់ដឹងពីការផ្លាស់ប្តូរ នៃវិស័យអចលនទ្រព្យនៅកម្ពុជា ជុំវិញការសាងសង់ និងការអភិវឌ្ឍអចលនទ្រព្យនៅទីនេះ។លោកបន្តថា អ្នកវិនិយោគអន្តរជាតិនឹងមានការផ្លាស់ប្តូរយ៉ាងខ្លាំងនូវការគិតរបស់ពួកគេ ដែលប្រទេសកម្ពុជាផ្លាស់ប្តូរទៅជាមជ្ឈមណ្ឌលសេដ្ឋកិច្ចដ៏សំខាន់មួយ៕