ដោយស៊ីវ ម៉េង + លាងគង់
ភ្នំពេញ៖ អ្នកជំនាញអចលនទ្រព្យអន្តរជាតិបាននិយាយថា កម្ពុជាកំពុងក្លាយជាគោលដៅរបស់វិនិយោគិនអចលនទ្រព្យលំដាប់អន្តរជាតិ នៅទូទាំងតំបន់អាស៊ាន ប្រទេសចិននិងពិភពលោក។
លោក Tom O”Sullivan អគ្គនាយកគេហទំព័រ Realestate.com.kh បានថ្លែងក្នុងសន្និសីទសារព៌តមានស្តីពី ពិព៌ណអចលនទ្រព្យដ៏ធំប្រចាំឆ្នាំនាព្រឹកថងៃទី៤ កញ្ញានេះថា បើធៀបជាមួយប្រទេសជិតខាងនៅក្នុងទតំបន់ កម្ពុជាបានផ្តល់សិទ្ឋកាន់កាប់អចលនទ្រព្យ សម្រាប់ជនបរទេសនិងមានទស្សនវិស័យ ចំពោះកំនើនវិនិយោគយ៉ាងរ៉ឹងមាំ។លោកបន្តថា អ្នករស់នៅក្នុងប្រទេសកម្ពុជាបានដឹងយ៉ាងច្បាស់ ពីការផ្លាស់ប្តូរយ៉ាងឆាប់រហ័សទាក់ទងនឹងវិស័យអចលនទ្រព្យ ការសាងសង់ និងការអភិវឌ្ឍហេដ្ឋារចនាសម្ព័ន្ឋតាមទីក្រុងសំខាន់ៗដូចជា ទីក្រុងភ្នំពេញ ខេត្តព្រះសីហនុ ខេត្តសៀមរាប។
លោកបន្តថា “ជនបរទេសជាច្រើនមានការយល់ដឹងតិចតួចនៅឡើយ ពីគុណភាពអចលនទ្រព្យ ដែលមានក្នុងប្រទេសកម្ពុជា និងសក្តានុពលវិនិយោគសម្រាប់អ្នកទិញអចលនទ្រព្យក្នុងប្រទេសនេះ”។
ទុនវិនិយោគក្នុងវិស័យសំណង់ និងអចលនទ្រព្យកាលពីឆ្នាំមុនមានទំហំទឹកប្រាក់ជាង៦៤០០លានដុល្លារអាមេរិក និងរយៈពេល ៨ខែនៃឆ្នាំនេះ មានទឹកប្រាក់ជិត៣០០០លានដុល្លារ។ នេះបើតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់។
អ្នកនាង អាន សុធីតា នាយិកាប្រចាំប្រទេស នៃក្រុមហ៊ុនអចលនទ្រព្យលំដាប់ពិភពលោក CBRE Cambodia បានយល់ស្របនឹងការលើកឡើងខាងលើ ដោយអ្នកនាងបានមានប្រសាសន៍ថា កម្ពុជាពិតជាក្លាយជាទីតាំង ដ៏ទាក់ទាញសម្រាប់អ្នកវិនិយោគអន្តរជាតិ ក្នុងវិស័យសំណង់ និងអចលនទ្រព្យ ដោយសារកម្ពុជាមានសុខសន្តិភាព ស្ថេរភាពនយោបាយ និងកំណើនសេដ្ឋកិច្ចរ៉ឹងមាំ។អ្នកនាងបន្តថា ច្បាប់វិនិយោគដ៏ល្អរបស់កម្ពុជា និងច្បាប់ស្តីពីសហកម្មសិទ្ឋ ដែលអាចអនុញ្ញាត្តឲ្យជនបរទេសទិញផ្ទះចាប់ពីជាន់ទី១បាន ពិតជាបានជួយជំរុញឲ្យវិស័យនេះរីកចម្រើនកាន់តែខ្លាំង។
អ្នកនាងបន្តថា “អ្នកវិនិយោគអន្តរជាតិជាច្រើនបានសម្លឹងមកកាន់ទីនេះ ក្នុងរូបភាពវិជ្ជមានជាងមុន សុទិដ្ឋិនិយមជាងមុន ដោយសារពួកគេមើលឃើញកាលានុវត្តន៍ភាពច្រើននៅទីនេះ”។អ្នកនាងបន្តថា “លំហូរទុនវិនិយោគផ្ទាល់ពីបរទេសនៅឆ្នាំនេះរំពឹងកើនដល់៣០០០លានដុល្លារ ខណៈកាលពីឆ្នាំមុនលំហូរទុនវិនិយោគផ្ទាល់ពីបរទេសនៅកម្ពុជាមានចំនួនច្រើនជាងប្រទេសថៃផងដែរ”៕
