វិនិយោគិនបារាំងធំៗ គ្រោងចូលមកវិនិយោគនៅកម្ពុជា

លោករដ្ឋមន្រ្តីបានលើកនូវចំណុច ជាយុទ្ធសាស្រ្តសំខាន់មួយចំនួន និងបានស្នើឲ្យភាគីបារាំង យកចិត្តទុកដាក់លើវិស័យអាទិភាពមួយចំនួន ដើម្បីរួមចំណែកអភិវឌ្ឍវិស័យទេសចរណ៍នៅកម្ពុជា ប្រកបដោយនិរន្តភាព និងការទទួលខុសត្រូវ ដូចជាទី១ សារសំខាន់នៃជំនាញវិជ្ជាជីវៈទេសចរណ៍ តាមរយៈការដាក់ចេញនូវយុទ្ធនាការ «សេវាមួយ ស្តង់ដាមួយ» និង «បុគ្គលិកម្នាក់ ជំនាញមួយ» ដើម្បីរួមចំណែកពង្រឹង និងលើកកម្ពស់គុណភាពសេវាកម្មទេសចរណ៍។

ទី២ ការជំរុញអភិវឌ្ឍផលិតផលទេសចរណ៍កម្ពុជា ប្រកបដោយគុណភាព និងសម្បូរបែប ពិសេសអភិវឌ្ឍកម្ពុជាជាគោលដៅទេសចរណ៍ស្អាត និងបៃតង តាមរយៈការដាក់ចេញនូវចលនាប្រលងប្រណាំងទីក្រុងស្អាត រមណីដ្ឋានស្អាត សេវាល្អ បដិសណ្ឋារកិច្ចល្អ ហើយក្នុងពេលខាងមុខ នឹងមានរៀបចំចលនាប្រលងប្រណាំងឆ្នេរស្អាតគំរូនៅកម្ពុជាផងដែរ។

ទី៣ ការពង្រឹងការសិក្សាទីផ្សារ និងផ្សព្វផ្សាយទេសចរណ៍។ បច្ចុប្បន្ន ក្រុមប្រឹក្សាសិក្សាទីផ្សារ និងផ្សព្វផ្សាយទេសចរណ៍ត្រូវបាន បង្កើតឡើងដោយមានការចូលរួមយ៉ាងសំខាន់ពីគ្រប់ភាគីពាក់ព័ន្ធរដ្ឋ និងឯកជន ដើម្បីជំរុញ និងទ្រទ្រង់ការផ្សព្វផ្សាយទេសច​រណ៍កម្ពុជាឲ្យកាន់តែខ្លាំងក្លាថែមទៀត និងទី៤ ការពង្រឹងការគ្រប់គ្រង និងផ្សព្វផ្សាយទេសចរណ៍តាមប្រព័ន្ធបច្ចេកវិទ្យា និងប្រព័ន្ធអនឡាញ។

កាលពីឆ្នាំ២០១៧កម្ពុជាទទួលបានភ្ញៀវទេសចរណ៍បារាំងចំនួន១៦៦.៣៥៦នាក់ កើនឡើង១០,៧% ឈរលំដាប់ទី១០ ហើយក្នុងរយៈពេល៦ខែ ដើមឆ្នាំ២០១៨ កម្ពុជាទទួលទេសចរបារាំងចំនួន ៨៥.៩០៦នាក់ កើនឡើង៣ភាគរយ ធៀបនឹងរយៈពេលដូចគ្នាឆ្នាំ២០១៧ ឈរលំដាប់ទី៨៕