ដោយ គង់ សូរិយា
ភ្នំពេញ៖ ក្រោយរដ្ឋាភិបាលអាណត្តិទី៦បង្កើតឡើងបានប្រមាណ២សប្តាហ៍ សកម្មភាពវិនិយោគពីអ្នកវិនិយោគជាតិ អន្តរជាតិបានកើនឡើងនៅកម្ពុជា។នេះបើតាមអ្នកជំនាញក្នុងវិស័យអចលនទ្រព្យនានា។
លោកស្រី តាំង ហួរ អគ្គនាយិកាក្រុមហ៊ុន AMATAK Property Service Co, Ltd បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៧ កញ្ញានេះថា លោកស្រីបានជួបជាមួយអ្នកវិនិយោគជាតិ អន្តរជាតិជាច្រើនក្នុងមួយរយៈពេលចុងក្រោយនេះ ដោយពួកគេបានសម្តែងការកោតសរសើរសម្តេចតេជោហ៊ុន សែនដែលបាននាំមកនូវសុខសន្តិភាព ពិសេសការបង្រួបបង្រួមគណបក្សនយោបាយចំនួន១៩ទៀត ឲ្យចូលរួមផ្តល់មតិយោបល់ផ្សេងៗ ដើម្បីជាចំណែកចូលរួមអភិវឌ្ឍន៍ប្រទេស។
លោកស្រីបន្តថា “ដោយសារសកម្មភាពនយោបាយ មានលក្ខណៈល្អប្រសើរនិងមានភាពចាស់ទុំនេះ បានធ្វើឲ្យអ្នកវិនិយោគជាតិ អន្តរជាតិបានចាប់ផ្តើមសកម្មភាពវិនិយោគកាន់តែច្រើននៅកម្ពុជា”។លោកស្រីបន្តថា “ការរក្សាបានសន្តិភាព ស្ថិរភាពនយោបាយ ពិសេសសេដ្ឋកិច្ចល្អប្រសើរនេះហើយ ទើបតម្លៃដីបានឡើងថ្លៃស្ទើរគ្រប់ទីកន្លែង”។
យោងតាមរបាយការណ៍របស់ក្រសួងរបចំដែនដី នគរូបនីយកម្មនិងសំណង់បានឲ្យដឹងថា រយៈពេល៨ខែឆ្នាំ២០១៨នេះ ទុនវិនិយោគក្នុងវិស័យសំណង់មានចំនួនទឹកប្រាក់ជិត៣០០០លានដុល្លារអាមេរិក ដោយមានគំរោងសំណង់ជាង២០០០ត្រូវបានចុះបញ្ជីរ។
អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឲ្យដឹងផងដែរថា ជាការពិតក្រោយការរៀបចំរដ្ឋាភិបាលថ្មីរួច អ្នកវិនិយោគក្នុងស្រុក និងអ្នកវិនិយោគអន្តរជាតិ បានចាប់ផ្តើមវិនិយោគឡើងវិញយ៉ាងឆាប់រហ័ស។ ពួកគេសម្រេចចិត្តលឿនៗជាងមុន ធៀបនឹងការបោះឆ្នោតអាណត្តិមុន ដោយសារពួកគេមិនមានអ្វីគួរឲ្យបារម្ភនោះទេ។
អ្នកនាងបន្តថា “អ្នកទាំងនោះបានវិនិយោគលើផ្នែកចម្រុះ រួមមាន សណ្ឋាគារ អាផាតម៉ិន ការិយាល័យ និងវិនិយោគលើដីធ្លីជាដើម”។អ្នកនាងបន្តថា “ថ្មីៗនេះមានព៌តមានថាអ្នកវិនិយោគពីអឺរ៉ុប និងអាមេរិកនឹងចូលមកស្វែងរកឳកាសវិនិយោគនៅកម្ពុជា នេះជាចំណុចវិជ្ជមាន ហើយយើងស្វាគមន៍”៕