ដោយ គង់ សូរិយា
ភ្នំពេញ៖ ឧកញ៉ាធំៗជាច្រើននៅកម្ពុជា បានចាប់ផ្តើមវិនិយោគដាំចេកអំបូងលឿង ដើម្បីធ្វើការនាំចេញទៅក្រៅប្រទេស ដោយសារមានតម្រូវការខ្ពស់ពីបណ្តាប្រទេសរីកចំរើននានា។
លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១៨ កញ្ញានេះថា លោកបាននិងកំពុងចាប់ផ្តើមវិនិយោគដាំចេកអំបូងលឿងលើផ្ទៃដី១០០០ហិកតា នៅក្នុងខេត្តត្បូងឃ្មុំ កំពង់ចាម និងខេត្តស្ទឹងត្រែងដើម្បីធ្វើការនាំចេញទៅកាន់ទីផ្សារប្រទេសចិន និងទីក្រុងឌូបៃ ដោយសារប្រទេសទាំងពីរមានតម្រូវការចេកប្រភេទនេះខ្ពស់។ លោកឧកញ៉ាបន្តថា យើងមានទីផ្សារទូលំទូលាយ តែអ្វីសំខាន់នាពេលនេះយើងត្រូវដាំចេកឲ្យបាន ដើម្បីនាំចេញទៅកាន់ទីផ្សារទាំងនោះ។
ចេកអំបូងលឿង ជាពូជចេកមកពីសហរដ្ឋអាមេរិក ដែលជាចេកមានរសជាតិឆ្ងាញ់ និងមានភាពរមួតល្អ។
លោកឧកញ៉ាលឹម ហេងបានបន្តថា ជាមួយនឹងគំរោងដាំចេកដើម្បីនាំចេញនេះ យើងមានគំរោងបង្កើតរោងចក្រផលិតម្សៅចេកផងដែរ ព្រោះផ្លែចេកដែលយើងប្រមូលផលបាន មិនប្រាកដអាចនាំចេញបានទាំងអស់ទេ។ ហេតុនេះយើងទាមទារការកែច្នៃវា ទៅជាម្សៅ ដើម្បីប្រើប្រាស់ផលិតអ្វីផ្សេងៗទៀត។
ទោះជាយ៉ាងណាលោកឧកញ៉ា មិនបញ្ជាក់ឲ្យដឹងពីទុនវិនិយោគក្នុងគំរោងនេះទេ។
ជាមួយគ្នានេះលោកឧកញ៉ាហ៊ុន ឡាក់អនុប្រធានសហព័ន្ឋស្រូវអង្ករកម្ពុជាដែលបានបោះទុន៣០លានដុល្លារដាំចេកអំបូងលឿង លើផ្ទៃដី១០០០ហិកតានៅក្នុងស្រុកឈូក ខេត្តកំពតបានមានប្រសាសន៍ឲ្យដឹងផងដែរថា ទីផ្សារចេកអំបូងលឿងមានភាពល្អប្រសើរ និងមានតម្លៃល្អខ្លាំងធៀបជាមួយចេកធម្មតានៅក្នុងស្រុករបស់យើង។លោកបន្តថា ចេកនេះមិនមែនដាំបាននៅគ្រប់ប្រទេសនោះទេ ប៉ុន្តែសម្រាប់កម្ពុជាមានដីដែលមានងំណោយផលសម្រាប់ដាំចេកនេះ ប៉ុន្តែកន្លងមកមិនសូវមានអ្នកចាប់អារម្មណ៍ ទើបចេកនេះមិនសូវមានដាំនៅកម្ពុជា។
លោកបន្តថា យើងអាចនាំចេញចេកប្រភេទនេះបានទូទាំងពិភពលោក ដោយសារវាជាចេកមានរសជាតិឆ្ងាញ់ និងជាចេករក្សាទុកបានយូរ ងាយស្រួលក្នុងការនាំចេញ ទៅកាន់ក្រៅប្រទេស។លោកបន្តថា ចេកអំបូងលឿងដាំនៅកម្ពុជាជាលើកដំបូង នឹងអាចនាំចេញពីកម្ពុជានៅដើមឆ្នាំ២០១៩ខាងមុខនេះ ប៉ុន្តែបរិមាណនៃការនាំចេញមិនទាន់អាចព្យាករណ៍បាននៅឡើយទេ៕
