ដោយ: ម៉ាលីស
កំពង់ឆ្នាំង: កំពង់ឆ្នាំង ជាខេត្តមានសក្តានុពលទេសចរណ៍ទាំងបែបធម្មជាតិ និងប្រវត្តិសាស្រ្ត ហើយរមណីយដ្ឋានកែច្នៃជាច្រើន ក៏ចាប់ផ្តើមមានវត្តមានឡើង ជាបន្តបន្ទាប់ ដោយសារខេត្តនេះស្ថិតជាប់ខេត្តកណ្តាល ដែលស្ថិតនៅមិនឆ្ងាយពីភ្នំពេញផងនោះ ធ្វើអោយនៅតែមានមានកំណើនអ្នកវិនិយោគអចលនទ្រព្យ ទោះស្ថិតក្នុងវិបត្តិជាសកលក៏ដោយ។
តាមការបង្ហើបពីលោក ហ៊ិន រស់ ម្ចាស់គំរោងផ្ទះនិងដីឡូតិ៍លំហែរចំការដូង Resort បានមាប្រសាសន៍ប្រាប់ គេហទំព័រ Property Area កាលពីរសៀលថ្ងៃ១៨ កុម្ភៈនេះអោយដឹងថា សព្វថ្ងៃមានវិនិយោគិនជាច្រើន បានមកអភិវឌ្ឍគំរោងអចលនទ្រព្យ ជាពិសេស ជាប្រភេទដីឡូត៍ និងផ្ទះលំហែរកាយតែម្តង ដោយមើលឃើញពីសក្តានុពលខេត្តកំពង់ឆ្នាំង ដែលជាតំបន់មានអំណោយផលពីធម្មជាតិស្រាប់ រួមមានភ្នំ មានទឹក ដីមានជីជាតិ បង្កើតបានរមណីយដ្ឋានជាច្រើនផងដែរ។
លោកបន្តថា “ដោយសារខេត្តនេះជាប់ខេត្តកណ្តាល ដែលស្ថិតមិនឆ្ងាយពីភ្នំពេញផងនោះ រួមជាមួយដីដែលមានតំលៃសមរម្យ បូកផ្សំនិងបរិបទកូវីត ដែលរាំងស្ទះការធ្វើដំនើរក្រៅប្រទេសរបស់ប្រជាពលរដ្ឋ វិនិយោគិនងាកមកចាប់អរម្មណ៍ ក្នុងការអភិវឌ្ឍន៍ជាដី និងផ្ទះលំហែរនៅតំបន់នេះ ដើម្បីការសំរាកលំហែរ សំរាប់ប្រជាជននៅក្នុងប្រទេស”។
ម្ចាស់ចំការដូងក្រអូប Resort លោក ហ៊ិន រស់ បញ្ជាក់ទៀតថា ជាក់ស្តែង គំរោងលោកគឺស្ថិតក្នុងតំបន់ កៀកនឹងផ្លូវជាតិលេខ៥ នៃខេត្តកំពង់ឆ្នាំងតែម្តង ដែលមានទាំងប្រភេទដីឡូតិ៍ និងផ្ទះលំហែរកាយ រួមជាប្រភេទដីដាំដូងក្រអូប ដែលបង្កើតជារមណីយដ្ឋានប្លែកភ្នែក ទាក់អារម្មណ៍មួយផងដែរ។ លោកបានបន្ថែមថាក្នុងឆ្នាំ២០២២ គំរោងអភិវឌ្ឍន៍ដីឡូតិ៍និងផ្ទះលំហែរនិងអាចមានកំណើន ច្រើនឡើងជាលំដាប់ថែមទៀត។
ជាមួយគ្នានេះ លោកច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានមានប្រសាសន៍ផងដែរថា “បច្ចប្បន្នក្នុងខេត្តកំពង់ឆ្នាំង មានរមណីយដ្ឋាន និងមានការវិនិយោគអចលនទ្រព្យ លេចវត្តមានឡើងជាបន្តបន្ទាប់ ខណៈតំលៃដីមានតំលៃសមរម្យ មិនឡើងខ្ពស់នៅឡើយទេ”៕
