ដោយៈវិវត្តន៍
ភ្នំពេញៈ អនុរដ្ឋលេខាធិការ និងជាអ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានថ្លែងថា ភាគីថៃបានទាក់ទងមកក្រសួង ដើម្បីពិភាក្សាពីការបើកច្រកព្រំដែនស្ទឹងបត់ ណងអៀននាពេលខាងមុខ។
លោកបានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី២១ កុម្ភៈថា ភាគីថៃពិតជាបានទាក់ទងមកយើង ខណៈហេដ្ឋារចនាសម្ព័ន្ឋនៅទឹកដីថៃ នឹងបញ្ចប់នៅខែកញ្ញាខាងមុខនេះ ប៉ុន្តែផ្នែកខាងកម្ពុជាអាចនឹងត្រូវរង់ចាំរហូតដល់ឆ្នាំ២០២៣ទើបបញ្ចប់រួចរាល់។
លោកបន្តថា “ហេតុនេះការបើកច្រកព្រំដែននាពេលណា មិនទាន់មានភាពច្បាស់លាស់នៅឡើយ ដោយភាគីថៃហាក់បង្ហាញពីឆន្ទៈ ចង់បើកច្រកព្រំដែននេះ”។
លោកវ៉ាស៊ីម សូរិយាបានបន្តថា ប្រសិនជាច្រកព្រំដែនត្រូវបើក អាចនឹងបើកទាំងអស់នាពេលខាងមុខ ប៉ុន្តែយ៉ាងណាវាអាស្រ័យលើការសម្រេចចិត្តពីប្រមុខរាជរដ្ឋាភិបាលប្រទេសទាំងពីរ។
ច្រកព្រំដែលស្ទឹងបត់ ណងអៀន នឹងក្លាយជាច្រកព្រំដែនសំរាប់ផ្ទេរទំនិញយ៉ាងសំខាន់នាពេលអនាគត ពិសេសការដោះដូរទំហំពាណិជ្ជកម្ម ដែលបានបន្តកើនឡើងរវាងកម្ពុជា ថៃ៕