ដោយ គង់ សូរិយា
ភ្នំពេញ៖ ក្រុមប្រឹក្សាអភិវឌ្ឍន៍កម្ពុជាហៅកាត់ CDC បានសម្រេចផ្តល់វិញ្ញាបនប័ត្រចុះបញ្ជីជាស្ថាពរជូនដល់ក្រុមហ៊ុនវិនយោគចំនួន២ ដែលគ្រោងបោះទុនវិនិយោគជាង៧លានដុល្លារ និងផ្តល់ការងារថ្មីប្រមាណជិត៦ពាន់កន្លែង បន្ថែមទៀតនៅក្នុងវិស័យឧស្សាហកម្ម។
យោងតាមសេចក្តីប្រកាសព័ត៌មានរបស់ CDC ដែល Propertyarea.asia ទទួលបាននាព្រឹកថ្ងៃទី២៥ កញ្ញានេះបានឲ្យដឹងថា គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនវិនិយោគចំនួន២ផ្សេងៗគ្នា ដោយមានប្រាក់វិនិយោគប្រមាណជាង៧លានដុល្លាអាមេរិក និងត្រូវការកំលាំងថ្មីជិតពាន់កន្លែងបន្ថែមទៀត ខណៈកម្ពុជាបច្ចុប្បន្នមានកំលាំងពលកម្មធ្វើការជាង១លាននាក់ កំពុងបម្រើក្នុងវិស័យឧស្សាកម្ម និងវិស័យផ្សេងៗទៀត។
សេចក្តីប្រកាសព៌តមានដដែលបានឲ្យដឹងថា គម្រោងបង្កើតរោងចក្រថ្មីនោះ រួមមានក្រុមហ៊ុន GIN AN PAPER CO.,LTD. មានគម្រោងបង្កើតរោងចក្រផលិតកេសកាតុង ដែលមានទីតាំងវិនិយោគស្ថិតនៅផ្លូវហាណូយ ភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ មានទុនវិនិយោគប្រមាណ២,១៤លានដុល្លារអាមេរិក និងអាចបង្កើតការងារបានចំនួន២០៧កន្លែង និងក្រុមហ៊ុន EASY LIFE SHOE CO.,LTD មានគម្រោងបង្កើតរោងចក្រផលិតស្បែកជើង ដែលមានទីតាំងវិនិយោគ ស្ថិតនៅភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ៥,៣៦លានដុល្លារអាមេរិក និងអាចបង្កើតការងារបានចំនួន១,៦០៩កន្លែងផងដែរ។
របាយការណ៍ក្រសួងឧស្សាហកម្ម និងសិប្បកម្មបានឲ្យដឹងថា គិតត្រឹមខែមិថុនា ឆ្នាំ២០១៨នេះ វិស័យឧស្សាហកម្មកាត់ដេរ និងស្បែកជើង មានកំលាំងពលកម្មសរុបជាង៨០ម៉ឺន ហើយបើបូករួមជាមួយវិស័យផ្សេងៗទៀត កម្ពុជាមានកំលាំងពលកម្មសរុបជាង១លាននាក់៕
