ដោយៈ សុផារី
សៀមរាបៈ នាពេលខាងមុននេះ ព្រលានយន្តហោះអន្តរជាតិខេត្តសៀមរាប នឹងមានសមត្ថភាពទទួលនូវយន្តហោះធំៗ ខណៈពេលនេះ ទទួលបានតែយន្តហោះតូចៗតែប៉ុណ្ណោះ។
សម្ដេចតេជោ ហ៊ុន សែន លើកឡើងបែបនេះនៅក្នុងពិធីសម្ពោធដាក់ឱ្យប្រើប្រាស់ អគារមជ្ឈមណ្ឌលត្រចៀក ច្រមុះ បំពង់ក នៃមនី្ទរពេទ្យព្រះអង្គឌួង នៅព្រឹកថ្ងៃចន្ទ ទី២៨ ខែមីនា ឆ្នាំ២០២២នេះ។
សម្តេចតេជោថ្លែងថា “ខ្ញុំក៏ទៅត្រួតពិនិត្យផងដែរ នូវព្រលានយន្តហោះថ្មីមួយ ដែលបាននិងកំពុងសាងសង់។ ហើយមិនយូរប៉ុន្មានទេព្រលានយន្តហោះនោះ នឹងត្រូវបានសម្ពោធដាក់ឱ្យប្រើប្រាស់”។ សម្តេចបានបន្តថា “ព្រលានយន្តហោះនេះ អាចមានសមត្ថភាពទទួលយន្តហោះធុនធំ ដែលមកពីចម្ងាយមកចុះចតនៅក្នុងខេត្តសៀមរាបតែម្តង។ ព្រោះថាសៀមរាបបច្ចុប្បន្ននេះ ចុះចតបានតែប្រភេទធុនតូចតែប៉ុណ្ណោះ មិនអាចទទួលបានយន្តហោះធុនធំនោះទេ”។
សម្តេចតេជោថ្លែងបន្ថែមថា “ខេត្តសៀមរាបក៏មានផ្លូវល្អ។ ខ្ញុំនឹងទៅសម្ភោធផ្លូវ៣៨ខ្សែនៅខេត្តសៀមរាប ដែលបានប្រើប្រាស់ទុនជាង២០០លានដុល្លាអាមេរិក ដើម្បីធ្វើឱ្យប្រសើរឡើងនូវហេដ្ឋារចនាសម្ព័ន្ធក្នុងខេត្តសៀមរាប ដែលជាខេត្តទេសចរណ៍ដ៏សំខាន់របស់យើង”៕
