ដោយ វុត្ថា
ភ្នំពេញ៖ អ្នកជំនាញក្នុងវិស័យទេសចរណ៍បានអះអាងថាប្រជាជនកម្ពុជាចំណាយប្រាក់ប្រមាណ ៨៨ ទៅ ១០០លានដុល្លារ ក្នុងឳកាសថ្ងៃឈប់សម្រាកក្នុងពិធីបុណ្យភ្ជុំបិណ្ឌដែលបានបញ្ចប់ក្នុងសប្តាហ៍នេះ។
យោងតាមរបាយការណ៍របស់មន្ទីរទេសចរណ៍រាជធានី-ខេត្ត ភ្ញៀវទេសចរ និងបងប្អូនប្រជាពលរដ្ឋ ដែលដើរកំសាន្តនៅតាមរមណីយដ្ឋានទេសចរណ៍នានា ក្នុងឱកាសឈ ប់សម្រាកពិធីបុណ្យភ្ជុំបិណ្ឌ (៨-១០ ខែតុលា ឆ្នាំ២០១៨) នេះមានចំនួន១,២៦១,៦៩១ កើនឡើង២០,៤២ភាគរយ ក្នុងនោះភ្ញៀវជាតិ១,២១៣,៦៨៧ កើនឡើង២០,២៩ភាគរយ និងភ្ញៀវអន្តរជាតិ៤៨,០០៤ កើនឡើង២៣,៩៣ភាគរយ ធៀបរយៈពេលដូចគ្នាកាលពីឆ្នាំមុន។
-->
យោងតាមរបាយការណ៍របស់មន្ទីរទេសចរណ៍រាជធានី ខេត្តដដែល បានសង្កេតឃើញផងដែរថា ការរៀបចំរមណីយដ្ឋាន និងគោលដៅទេសចរណ៍ មានការរីកចំរើនកាន់តែប្រសើរ ដោយក្នុងនោះ អាចទប់ស្កាត់ការតម្លើងថ្លៃហួសហេតុលើម្ហូបអាហារ និងសេវាកម្មទេសចរណ៍ ដោយមានការបិតតម្លៃជម្រាបជូនភ្ញៀវជាមុនបានត្រឹមត្រូវ។ បញ្ហាបរិស្ថានអនាម័យល្អប្រសើរជាងមុន ដោយភ្ញៀវទេសចរ និងបងប្អូនប្រជាពលរដ្ឋមានការយល់ដឹងនិងភ្ញាក់រលឹក និងដោយមានការចុះអប់រំណែនាំពីមន្ត្រីជំនាញ និងអាជ្ញាធរពាក់ព័ន្ធ ជាពិសេសមន្ទីរទេសចរណ៍ បានចាត់តាំងក្រុមការងារចុះអប់រំផ្ទាល់ដល់រមណីយដ្ឋាន បើទោះបីជាការទុកដាក់សំរាម នៅតែជាបញ្ហាដែលត្រូវយកចិត្តទុកដាក់បន្ថែម និងបញ្ហាសន្តិសុខសុវត្ថិភាពក៏មានភាពល្អប្រសើរ ដោយមន្ទីរទេសចរណ៍បានសហការណ៍យ៉ាងជិតស្និតជាមួយកំលាំងមានសមត្ថកិច្ច ចាត់តាំងក្រុមការងារប្រចាំការនៅតាមគោលដៅទេសចរណ៍សំខាន់ៗ និងមានការលើកស្លាកសញ្ញាគ្រោះថ្នាក់ នៅតាមតំបន់ដែលងាយរងគ្រោះ។
ទោះជាយ៉ាងណាលោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី១១ តុលានេះថា តាមការព្យាករណ៍របស់លោកបានគិតថា ចំនួនភ្ញៀវទេសចរណ៍ជាតិចេញទៅទស្សនា និងសម្រាកកំសាន្តនៅតាមរមណីយដ្ឋានទេសចរណ៍នានាទូទាំងប្រទេស គឺមានចំនួនច្រើនជាងរបាយការណ៍របស់ក្រសួងទេសចរណ៍ ព្រោះបើគិតពីប្រជាជននៅរាជធានីភ្នំពេញ ប្រមាណ៨០ភាគរយ បានចាកចេញទៅតាមបណ្តាខេត្តនានា ហើយចំនួននេះមិនទាន់គិតបញ្ចូលអ្នកនៅរាជធានីភ្នំពេញ និងអ្នកនៅតាមបណ្តាខេត្តនានា ដែលបានចល័តដើរកំសាន្តពីខេត្តមួយ ទៅកាន់ខេត្តមួយនៅឡើយទេ។
លោកបន្តថា “បើគិតលើការចំណាយវិញ ខ្ញុំគិតថាជាមធ្យមប្រជាជនម្នាក់ចំណាយប្រាក់ចន្លោះពី៧០ទៅ៨០ដុល្លារអាមេរិកក្នុងម្នាក់ ហេតុនេះប្រជាជនទូទាំងប្រទេស៨៨ទៅ១០០លានដុល្លារក្នុងពិធីនេះ។
លោកបន្តថា ជាទូទៅការដើរកំសាន្តក្នុងរយៈពេលបីថ្ងៃនេះ មានភាពល្អប្រសើរ ជាទូទៅ ប៉ុន្តែមានបញ្ហាកកស្ទះចរាចរណ៍ បញ្ហាអនាម័យ និងបញ្ហាឡើងថ្លៃម្ហូបអាហារនៅតំបន់មួយចំនួនមានការហក់ឡើងខ្ពស់ឡើងវិញ ដែលបញ្ហានេះទាមទារឲ្យមានការយកចិត្តទុកដាក់បន្ថែម។
ទោះជាយ៉ាងណាលោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកបានលើកឡើងផងដែរថា លោកយល់ស្របនឹងតួលេខរបស់ក្រសួងទេសចរណ៍ ដែលរយៈពេលបីថ្ងៃនេះមានភ្ញៀវទេសចរណ៍ជាតិ អន្តរជាតិជាង១,២លាននាក់បានចេញដើរកំសាន្តក្នុងរយៈពេលបីថ្ងៃនៃពិធីបុណ្យភ្ជុំបិណ្ឌនេះ ប៉ុន្តែលោកបានព្យាករណ៍ការចំណាយរបស់ប្រជាជនម្នាក់ជាមធ្យមគឺចំណាយ១៨០ដុល្លារអាមេរិក ដូច្នេះបើគិតចំនួនមនុស្សជាង១,២លាននាក់ គុណនឹងការចំណាយមានន័យថាប្រជាជនកម្ពុជាចំណាយប្រាក់រហូយដល់២២៧លានដុល្លារក្នុងពិធីបុណ្យដ៏ធំនេះ។
លោកបន្តថា “ខ្ញុំគិតបែបនេះ ប្រជាជនកម្ពុជាចំណាយច្រើនសម្រាប់ពិធីបុណ្យនេះ ដែលមនុស្សម្នាក់អាចចំណាយមិនក្រោម១៨០ដុល្លារនោះទេ”៕
