ដោយៈជេស៊ីកា
ព្រះសីហនុៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជា និងស ម្តេចកិត្តិព្រឹទ្ឋបណ្ឌិតប៊ុន រ៉ានី ហ៊ុន សែននឹងអញ្ជើញជាអធិបតីក្នុងពិធីសម្ភោធបដិមាភិសេក រូបសំណាក “ព្រះថោង នាងនាគ”នៅក្រុងព្រះសីហនុនៅថ្ងៃទី១៦ មេសាខាងមុខនេះ។
យោងតាមបណ្តាញទំនាក់ទំនងសង្គមរបស់លោកថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់បានឲ្យដឹងថា ជាតំណាងឱ្យកំណេីតទឹកដីនិងបុព្វការីជនខ្មែរ និងជាបដិមាដែលខ្ពស់ជាងគេបំផុតនៅកម្ពុជា បានលេចជារូបរាងហេីយ នៅក្រុងព្រះសីហនុ ក្រោមការផ្តួចផ្តេីមរបស់ឯកឧត្តមជា សុផារ៉ា ឧបនាយករដ្ឋមន្ត្រី រដ្ឋមន្ត្រី ក្រសួង រៀបចំដែនដី នគរូបនីយកម្ម និងសំណង់ និងជាប្រធានគណៈ កម្មាធិការជាតិ គ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា។
លោកបន្តថា សម្តេចតេជោនាយករដ្ឋមន្រ្តី នឹងអញ្ជេីញ ជាអធិបតីដ៏ខ្ពង់ខ្ពស់ ក្នុងពិធីបដិមាភិសេក នៅថ្ងៃទី១៦ ខែមេសា ឆ្នាំ ២០២២ “ មោទនភាពជាតិខ្មែរ”។
នៅជាមួយគ្នានេះ កាលពីវេលាម៉ោង ២២ និង០០នាទីយប់ថ្ងៃទី១០ ខែមេសា ឆ្នាំ២០២២ លោកគួច ចំរើន អភិបាល នៃគណៈអភិបាលខេត្តព្រះសីហនុ និងលោកជំទាវ បានអញ្ជើញសំណេះសំណាល ជាមួយកម្មករ និងក្រុមការងារជំនាញ ដែលកំពុងបំពេញការងារនៅរង្វង់មូល “ព្រះថោងនាងនាគ” ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។
ក្នុងឱកាសនោះ លោកអភិបាលខេត្ត បានមានប្រសាសន៍សំណេះសំណាល និងពាំនាំនូវការផ្ដាំផ្ញើ ក្តីនឹករលឹក សួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជូនដល់បងប្អួនកម្មករ និងក្រុមការងារជំនាញទាំងអស់ ដែលបានខិតខំប្រឹងប្រែងធ្វើការយ៉ាងយកចិត្តទុកដាក់ទាំងយប់ទាំងថ្ងៃ អស់ពីកំលាំងកាយចិត្ត នាឱកាសពិធីបុណ្យចូលឆ្នាំថ្មីប្រពៃណីខ្មែរ សូមទទួលបានសិរីសួស្តី ជ័យមង្គលគ្រប់ក្រុមគ្រួសារ៕
