ដោយៈ ម៉ាលីនណា
ភ្នំពេញៈ និយ័តករគណនេយ្យ និងសវនកម្មនៃក្រសួងសេដ្ឋកិច្ច និងហិរញ្ញវត្ថុ បានប្រកាសផ្តល់ពេលវេលាបន្ថែម ៣០ ថ្ងៃទៀត ដល់សហគ្រាសមិនរងសវនកម្មណា ដែលមិនទាន់បានដាក់បញ្ចូលរបាយការណ៍ ហិរញ្ញវត្ថុប្រចាំឆ្នាំ ២០២១ មកកាន់និយ័តករគណនេយ្យ និងសវនកម្ម។
និយ័តកររគណនេយ្យទុកពេលបន្ថែមឲ្យសហគ្រាសនានារយៈពេល៣០ថ្ងៃ ដើម្បីបញ្ជូនរបាយការណ៍ហិរញ្ញវត្ថុ
យោងតាមសេចក្តីជូនដំណឹងរបស់និយ័តករគណនេយ្យ និងសវនកម្មនៃអជ្ញាធរសេវាហិរញ្ញវត្ថុមិនមែនធនាគារ ដែលកម្ពុជាថ្មីទទួលបាននៅថ្ងៃទី ១២ ខែ មេសានេះបានឱ្យដឹងថា ដោយសារតែប្រព័ន្ធដាក់បញ្ចូលទិន្នន័យ E-Filling System មានបញ្ហាបច្ចេកទេស ទើបធ្វើឲ្យការដាក់បញ្ចូលរបាយការណ៍ហិរញ្ញវត្ថុ របស់សហគ្រាសមានភាពរអាក់រអួល ហេតុដូចនេះ ទើបនិយ័តករគណនេយ្យនិងសវនកម្ម(ន.គ.ស) ផ្តល់ពេលបន្ថែម ៣០ថ្ងៃទៀត ដោយគិតចាប់ពីថ្ងៃ ១៦មេសា ដល់ ១២ ឧសភា ឆ្នាំ ២០២២នេះ ដើម្បីឲ្យសហគ្រាសមិនរងសវនកម្ម បានដាក់បញ្ចូលរបាយការណ៍របស់ខ្លួនទាន់កាលកំណត់។
សេចក្តីជូនដំណឹងដដែល បានបញ្ជាក់ថា ក្នុងករណីសហគ្រាសណាមិនបានដាក់បញ្ចូលរបាយការណ៍ហិរញ្ញវត្ថុឆ្នាំ២០២១ តាមការកំណត់ខាងលើទេ នោះសហគ្រាសនឹងត្រូវទទួលពិន័យអន្តរការណ៍ ដែលបានកំណត់នៅក្នុងអនុក្រិត្យលេខ ៧៩ អនក្រ.បក. ចុះថ្ងៃទី១ មិថុនា ឆ្នាំ២០២០ កន្លងទៅ៕
