ដោយៈគង់ ម៉ាលីនណា
ភ្នំពេញៈ រាជរដ្ឋាភិបាលកម្ពុជា ត្រូវការទុនប្រមាណ ១៧,៥ពាន់លានដុល្លារ ដើម្បីវិនិយោគលើវិស័យឧស្សាហកម្មទូទៅ សម្រាប់ឆ្នាំ២០២២ ដល់២០២៤។
យោងតាមរបាយការណ៍ស្តីពី កម្មវិធីវិនិយោគសាធារណៈ ៣ឆ្នាំរំកិល (PIP) 2022-2024 របស់ក្រសួងផែនការបានឲ្យដឹងថា ឆ្នាំ២០២២នេះ រដ្ឋនឹងត្រូវការទុនប្រមាណ៥,៣ពាន់លានដុល្លារ ខណៈឆ្នាំ២០២៣ ត្រូវការ ៥,៩ពាន់លានដុល្លារ ហើយឆ្នាំ ២០២៤ ៦,២ពាន់លានដុល្លារ។
របាយការណ៍នេះបានបន្តថា វិស័យឧស្សាហកម្មទូទៅ សំដៅលើការរុករករ៉ែ ផលិតកម្ម អគ្គិសនី ឧស្ម័ន និងទឹក និងអនុវិស័យសំណង់។
អនុវិស័យសំណង់ នឹងត្រូវការថវិកាវិនិយោគ៩,២ពាន់លានដុល្លារ ខណៈវិស័យផលិតកម្មត្រូវការ៦ពាន់លានដុល្លារ ហើយវិស័យអគ្គិសនី ឧស្ម័ន និងទឹកត្រូវការ ១,៩ពាន់លានដុល្លារ។
រដ្ឋាភិបាលកម្ពុជាបាន និងកំពុងសាងសង់អគារសាធារណៈ ស្ពាន ផ្លូវថ្នល់ និងហេដ្ឋារចនាសម្ព័ន្ធផ្សេងៗទៀត ដែលជាផ្នែកមួយនៃចក្ខុវិស័យរបស់ខ្លួន ក្នុងការប្រែក្លាយកម្ពុជា ទៅជាប្រទេសដែលមានចំណូលមធ្យមនៅឆ្នាំ ២០៣០ខាងមុខនេះ៕
