រដ្ឋាភិបាលអនុម័តគម្រោងវិនិយោគ៣ក្នុងទំហំទឹកប្រាក់ជិត២០លានដុល្លារ

 ដោយៈវឌ្ឍនៈ

ភ្នំពេញៈ តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិ​យោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនចំនួន៣ មានទឹកប្រាក់ចំនួន ជាង១៨លានដុល្លារអាមេរិក។

យោងតាមសេចក្តីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជា នៅល្ងាចថ្ងៃទី២៩ មេសា ២០២២បានឲ្យដឹងថា ក្រុមហ៊ុនចំនួន៣បានទទួលការអនុម័តគំរោងវិនិយោគរបស់ពួកគេ ពីស្ថាប័ននេះ ដែលគំរោងទាំងនោះរួមមាន ទី១ក្រុមហ៊ុនORIENT HONGYE (CAMBODIA) KNITTING CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវណតប្រ៊ីត ភូមិដំណាក់ធំ សង្កា​ត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ មានទុនវិនិយោគប្រមា​ណ៣លានដុល្លារអាមេរិក និងអាចបង្កើតការងារបានចំនួន៥១៤កន្លែង។

ទី២.ក្រុមហ៊ុន KYLIN (CAMBODIA) SPORTS CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ២ ភូមិកណ្តោល សង្កាត់រលួស ខណ្ឌដង្កោរាជធានីភ្នំពេញ មានទុនវិនិយោគប្រមាណ៥,៣លានដុល្លារអាមេរិក និងអាចបង្កើតការងារបានចំនួន ៧១៤កន្លែង។

ទី៣ ក្រុមហ៊ុនSPEARHEAD COMMODITIES (CAMBODIA) CO., LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិរោងគោ ឃុំសំរោងទង ស្រុកសំរោងទង ខេត្តកំពង់ស្ពឺ មានទុនវិនិយោគចំនួន១០,៥ លានដុល្លារអាមេរិក និងអាចបង្កើតការងារបានចំនួន៧៧៧កន្លែង៕