ដោយ៖ វុទ្ធី

អន្តរជាតិ៖ ធនាគារកណ្តាលអឺរ៉ុប បានបញ្ចេញទឹកប្រាក់ ៥០០ ពាន់លានអឺរ៉ូ (៦០០ ពាន់លានអាមេរិក) បន្ថែមទៀត ខណៈការរាតត្បាតជំងឺកូវីដ១៩ បានបិទផ្នែកមួយចំនួនធំនៃសេដ្ឋកិច្ច និងប៉ះពាល់ដល់ប្រាក់ចំណូលពីការលក់ទំនិញ មុនថ្ងៃបុណ្យណូអែល ដែលជាបុណ្យដ៏មានសារសំខានបំផុត។

ក្រុមប្រឹក្សាដែលមានសមាជិក ២៥ នាក់ បានសម្រេចចិត្តកាលពីថ្ងៃព្រហស្បតិ៍ ដើម្បីបង្កើនបញ្ចប់សង្គ្រោះសេដ្ឋកិច្ចតាមរយៈទិញប័ណ្ណបំណុលរបស់ខ្លួនរហូតទៅ ៥០០ ពាន់លានអឺរ៉ូ ស្មើនឹង ១,៨៥ លានដោដិផោន (២,២ ទ្រីលានដុល្លារ) ។ បញ្ចាប់ថវិកានេះ នឹងពន្យាររយៈពេលយ៉ាងហោចណាស់ខែមីនា ឆ្នាំ២០២២ ដែលជំនួសឱ្យកាលបរិច្ឆេទបញ្ចប់ដំបូងបំផុតនៅពាក់កណ្តាលឆ្នាំ២០២១។ វាក៏បានផ្តល់ប្រាក់កម្ចី ដែលមានការប្រាក់ទាបបំផុតដល់ធនាគារផងដែរ។

ការទិញប័ណ្ណបំណុលនេះ បានជួយធ្វើឱ្យឥណទានមានតំលៃសមរម្យ និងអាចរកបាននៅទូទាំងសេដ្ឋកិច្ចសម្រាប់អតិថិជន អាជីវកម្ម និងរដ្ឋាភិបាល។ វាពិតជាមានសារៈសំខាន់ខ្លាំងណាស់ ក្នុងការជួយអាជីវកម្មឱ្យរស់រានរហូតដល់ការរីករាលដាលនៃជំងឺរាតត្បាតបញ្ជប់ ហើយដើម្បីគាំទ្រដល់រដ្ឋាភិបាល ដែលកំពុងខ្ចីប្រាក់យ៉ាងច្រើន ដើម្បីផ្តល់ជំនួយដល់អាជីវកម្ម និងកម្មករ។

លោក Christine Lagarde ប្រធានធនគារកណ្តាលអឺរ៉ុប (ECB) បានមានប្រសាសន៍ថា សកម្មភាពក្នុងអាជីវកម្មសេវាកម្មកំពុងត្រូវបាន “រារាំង” យ៉ាងខ្លាំង ដោយការកើនឡើងថ្មីនៃជំងឺកូវីដ១៩។ ហើយទិន្នន័យសេដ្ឋកិច្ចថ្មីៗនេះ “បង្ហាញពីផលប៉ះពាល់នាពេលខាងមុខកាន់តែធ្ងន់ធ្ងរលើសេដ្ឋកិច្ច ដែលបានអូសបន្លាយយូរជាងការរំពឹងទុក”។

គោលដៅរបស់ធនាគារកណ្តាល គឺដើម្បីបង្កើនអតិផរណា ដែលមានចំនួនប្រចាំឆ្នាំ ០,៣ ភាគរយក្នុងខែវិច្ឆិកា សម្រាប់គោលដៅរបស់ខ្លួន ក្រោម ២ភាគរយ ដែលជាកម្រិតមួយត្រូវបានចាត់ទុកថាល្អបំផុតសម្រាប់សេដ្ឋកិច្ច។

លោកស្រីបាននិយាយថា “ហេតុផលមួយដែលយើងកំពុងធ្វើ គឺច្បាស់ណាស់ដើម្បីចៀសវាងហានិភ័យ និងដើម្បីធ្វើឱ្យក្រុមហ៊ុនទាំងនោះ សាជីវកម្ម សហគ្រិន និងគ្រួសារទាំងនោះ ចេញផុតពីវិបត្តិជំងឺរោគរាតត្បាត”៕

ដោយ ៖ គង់ ម៉ាលីន

ភ្នំពេញ ៖ ផ្ទុយពីវិស័យមួយចំនួនដែលកំពុងទទួលរងនូវផលប៉ះពាល់ពីវិបត្តិជំងឺកូវីដ១៩ ដែលកំពុងបន្តរីករាយដាលទាំងនៅលើសាកលលោក ក៏ដូចជានៅក្នុងប្រទេសកម្ពុជាផងដែរនោះ សម្រាប់តែផ្នែកវាយណភ័ណ្ឌនៅកម្ពុជា ហាក់មិនទទួលរងនូវសំពាធធ្ងន់ធ្ងរនោះឡើយ ជាពិសេសក្រោយព្រឹត្តិការណ៍សហគមន៍២៨វិច្ឆិកាថ្មីៗនេះតែម្ដង នៅមិនទាន់មានរោងចក្រសហគ្រាសក្នុងផ្នែកវាយណភ័ណ្ឌណាមួយស្នើសុំផ្អាកដំណើរការនោះទេ។

លោក ប៊ុន សុគន្ធ តំណាងរោងចក្រកាត់ដេរសម្លៀកបំពាក់ និងមួកគ្រប់ប្រភេទសៅលែន (ខេមបូឌា) ដែលស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បានប្រាប់ឱ្យដឹងនៅព្រឹកថ្ងៃទី១១ ខែធ្នូ ឆ្នាំ២០២០នេះថា គិតចាប់ពីជំងឺឆ្លងកូវីដ១៩បង្ហាញវត្តមាននៅកម្ពុជា ក្នុងអំឡុងពេលនេះខាងរោងចក្រលោកនៅតែបន្តចូលរួមទប់ស្កាត់ និងបង្ការការពារ ដូចអ្វីដែលរដ្ឋាភិបាលបានណែនាំនិងដាក់ចេញនាពេលកន្លងមក។

លោកឱ្យដឹងទៀតថា សព្វថ្ងៃមុន នឹងអនុញ្ញាតឱ្យកម្មករនិយោជិតចូលបំពេញការងារ តម្រូវឱ្យពួកគាត់ពាក់ម៉ាស វាស់កំដៅ និងលាងដៃជាមួយទឹកអាលកុលសិន ដោយសកម្មភាពនេះ គឺធ្វើឡើងជាប់ជាប្រចាំនិងជារៀងរាល់ថ្ងៃ។ ជាមួយគ្នានេះ លោកបានអំពាវនាវទៅដល់កម្មករនិយោជិតគ្រប់រោងចក្រ សហគ្រាស សូមឱ្យចូលរួមទប់ស្កាត់ និងការពារទាំងអស់គ្នា ចៀងវាងការកើតមាន ឬឆ្លងកូវីដ១៩ ដែលជំងឺដ៏កាចសាហាវនេះ៕

ប្រធាននាយកដ្ឋានអធិការកិច្ចការងារ នៃក្រសួងការងារនិងបណ្តុះបណ្តាលវិជ្ជាជីវៈ លោក អ៊ុក ចាន់ធូ បានមានប្រសាសន៍ឱ្យដឹងនៅព្រឹកថ្ងៃទី១១ ខែធ្នូ ឆ្នាំ២០២០នេះថា ក្រោយវិវត្តន៍នៃព្រឹត្តិការណ៍២៨វិច្ឆិកា ជុំវិញករណីឆ្លងជំងឺកូវីដ១៩ គិតមកទល់ថ្ងៃនេះមិនមានរោងចក្រ សហគ្រាសក្នុងវិស័យវាយនភណ្ឌកាត់ដេរសម្លៀកបំពាក់ និងផលិតស្បែកជើងណាមួយទេស្នើរសុំបិទ ឬផ្អាកដំណើរការផលិតកម្មទេ ពោលគឺបន្តការងារជាធម្មតា និងប្រុងប្រយ័ត្នខ្ពស់។

លោកបានបញ្ជាក់ថា “មុន និងក្រោយព្រឹត្តការណ៍២៨វិច្ឆិកា ពុំមានអី្វប្រែប្រួលទេសម្រាប់វិស័យកាត់ដេរទាំងអស់ គឺនៅតែដំណើរការជាធម្មតា ពិសេសទៀតនោះនៅតាមរោងចក្រ សហគ្រាសគាត់មានការយកចិត្តទុកដាក់ ប្រសិនជាគាត់ដឹងថាមានកម្មករនិយោជិតណាម្នាក់ដែលមានជាប់ពាក់ព័ន្ធ ឬប្រយោលជាមួយព្រឹត្តិការណ៍នោះ គាត់នឹងឱ្យធ្វើចត្តាឡីស័កដែរ”។

លោកបន្តថា “និយាយយ៉ាងខ្លីក្នុងវិស័យរោងចក្រ សហគ្រាសកាត់ដេរ គឺអត់មានអ្វីប៉ះពាល់ទេ សម្រាប់យើងមើលតាមរូបភាពបងប្អូនកម្មករខាងក្រៅ ប៉ុន្តែបើចូលទៅខាងក្នុងរោងចក្រ មុននឹងចូលរោងចក្រ ខាងរោងចក្រមានការយកចិត្តទុកដាក់ និងមានគ្រប់ឧបករណ៍ទាំងអស់…ខ្ញុំសង្ស័យថាស្ថាប័នមួយចំនួនអត់ដល់វិស័យឯកជនទេ ខ្ញុំឃើញជាក់ស្តែងគឺមានការប្រុងប្រយ័ត្ននិងមានសម្ភារះគ្រប់បែបយ៉ាង ដើម្បីធ្វើការត្រួតពិនិត្យ អញ្ចឹងពុំទាន់មានឃើញរូបភាពណាមួយដែលនៅក្នុងរោងចក្រ សហគ្រាស”។

ដោយមានការណែនាំពីថ្នាក់ដឹកនាំក្រសួងពីថ្នាក់ឯកឧត្តមរដ្ឋមន្ត្រី ក្រុមអធិការកិច្ច ក៏ដូចជាក្រុមមន្ទីរបានធ្វើការត្រួតពិនិត្យជាប្រចាំទៅតាមរោងចក្រ សហគ្រាស ដែលស្ថិតនៅក្រោមដែនអនុវត្តរបស់សមត្ថកិច្ចនីមួយៗ ថ្នាក់ក្រសួងក៏ដូចជាថ្នាក់រាជធានីខេត្ត គឺឃើញការរាយការណ៍រាល់ថ្ងៃពុំមានអ្វីជាគួរឱ្យកត់សម្គាល់ គឺរឹតតែមានការយកចិត្តទុកដាក់រៀបចំក្នុងការផ្តល់ជូន ឬក៏មានឧបករណ៍ត្រួតពិនិត្យកំដៅ ទឹកអាល់កុល ជាពិសេសនៅក្រសួងការងារ ដែលឃើញមានបងប្អូនកម្មករចូលមកច្រើនដូចជាមកពិនិត្យសុខភាព ពិនិត្យកាយសម្បទាមកធ្វើសៀវភៅការងារគឺក្រសួងបានយកចិត្តទុកដាក់និងគិតគូរយ៉ាងម៉ត់ចត់ទៅដល់គាត់គ្រប់ៗគ្នា៕

ដោយ ៖ រ៉ាណេត

កូរ៉េ ៖ ធនាគារដ៏ធំ និងល្បីឈ្មោះប្រចាំសាធារណរដ្ឋកូរ៉េ DGB Bank ដែលស្ថិតនៅក្នុងសម្ព័ន្ធ DGB Financial Group របស់កូរ៉េ បានបង្ហាញពីគោលការណ៍នៃរៀបចំទីស្នាក់កណ្តាលរបស់ខ្លួននៅក្នុងប្រទេសកម្ពុជា ខណៈដែលសាខាដែលកំពុងមានដំណើរនៅកម្ពុជាចំនួន៩សាខារួចទៅហើយនោះ។

តាមរយៈបណ្តាញទំនាក់ទំនងអេឡិចត្រូនិក លោក ឡុង ឌីម៉ង់ ស្ថានឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េបានបញ្ជាក់ឱ្យដឹងនៅព្រឹកថ្ងៃទី១១ ខែធ្នូ ឆ្នាំ២០២០នេះថា បច្ចុប្បន្ននោះ បើទោះជាស្ថានភាពប្រឈមទៅនឹងវិបត្តិនៃការរីករាយដាលនៃជំងឺឆ្លងនៅតែអូសបន្លាយ ប៉ុន្តែសម្រាប់កិច្ចទំនាក់ទំនងសេដ្ឋកិច្ច និងការទូតរវាងប្រទេសកម្ពុជា និងសាធារណៈរដ្ឋកូរ៉េ នៅតែបន្តដំណើរការវិវត្តន៍ជាបន្តបន្ទាប់គួរជាទីមោទនៈ។

លោក ឡុង ឌីម៉ង់ បានបញ្ជាក់ឱ្យដឹងទៀតថា “នៅក្នុងជំនួបពិភាក្សាយ៉ាងយកចិត្តទុកដាក់រវាងប្រតិភូរបស់សម្ព័ន្ធ DGB Financial Group ដឹកនាំដោយលោក KIM TAE OH ប្រធានក្រុមប្រឹក្សាភិបាល និងក្រុមការងារស្ថានទូតកម្ពុជា លើការពង្រឹងកិច្ចសហប្រតិបត្តិការយោគយល់គ្នា និងការផ្ដល់ជំនួយសប្បុរសធម៌ដល់កម្ពុជា បានពិភាក្សាគ្នាយ៉ាងច្រើន ដែលក្នុងនោះក៏បានផ្តោតសំខាន់ទៅលើគម្រោង និងផែនការវិនិយោគលើវិស័យហិរញ្ញវត្ថុនៅកម្ពុជាផងដែរ”។

លោកបានបញ្ចាក់ថា សម្ព័ន្ធ DGB Financial Group បានចាប់ផ្ដើមដំណើរការវិនិយោគទុនរកស៊ីក្នុងវិស័យធនាគារនៅកម្ពុជា (DGB Bank) ចាប់តាំងពីឆ្នាំ២០១២ ហើយរហូតមកដល់បច្ចុប្បន្នបានពង្រីកខ្លួនរហូត ៩សាខា ជាមួយបុគ្គលិកប្រមាណជាង ៦០០នាក់។

នៅន័យនេះ លោក ឡុង ឌីម៉ង់ បានថ្លែងអំណរគុណដល់លោកប្រធានសម្ព័ន្ធ DGB ដែលមានទំនុកចិត្ត និងបានបណ្ដាក់ទុនវិនិយោគនៅកម្ពុជា ហើយសន្យាជួយសហការបង្កលក្ខណៈ និងជម្រុញបន្ថែមអស់ពីលទ្ធភាពរបស់ស្ថានទូតកម្ពុជាប្រចាំសាធារណរដ្ឋកូរ៉េ សំដៅឱ្យមានសុខដុមរមនាសម្រាប់ក្រុមហ៊ុនដែលមានបំណង និងបានបណ្ដាក់ទុនវិនិយោគនៅកម្ពុជា។

ថ្នាក់ប្រធានដឹកនាំប្រតិភូរបស់សម្ព័ន្ធ DGB Financial Group លោក KIM TAE OH បានបញ្ជាក់ថាសម្ព័ន្ធ DGB Financial Group បានសម្រេចផ្ដល់អំណោយជាម៉ាស់ដល់កម្ពុជាដែលកំពុងមានតម្រូវការ តាមរយៈស្ថានទូត ដោយគិតជាទឹកប្រាក់ចំនួន ១០,០០០ដុល្លាអាមេរិក និងការបញ្ចុះអត្រាការប្រាក់ឥណទានសម្រាប់ពលករខ្មែរនៅប្រទេសកូរ៉េឱ្យកាន់តែប្រសើរ តបតាមការស្នើរបស់ស្ថានទូតកម្ពុជា។

បន្ថែមពីលើនេះលោកប្រធានក៏បានស្នើដល់ឯកអគ្គរាជទូតកម្ពុជា ដើម្បីជួយសិក្សាណែនាំអំពីទីតាំងដែលគ្រោងនឹងរៀបចំជាទីស្នាក់ការកណ្ដាលរបស់ធនាគានៅកម្ពុជា ក៏ដូចជាជួយណែនាំធនធានមនុស្សដែលមានសមត្ថភាពក្នុងការទទួលកិច្ចការសំខាន់ៗរបស់ធនាគារ DGB Bank នៅកម្ពុជាផងដែរ៕

ដោយ វុត្ថា

វៀង​ច័ន្ទ៖ ប្រទេស​វៀតណាម​កំពុង​ទិញ​អគ្គិសនី​ពី​រោងចក្រ​ថាមពល ដែល​សាងសង់​ដោយ​វិនិយោគិន​ឡាវ និង​វៀតណាម​ដើម្បី​យកទៅ​ផ្គត់ផ្គង់​តម្រូវ​នៅក្នុង​ប្រទេស​ខ្លួន។

អនុរដ្ឋមន្ត្រី​ក្រសួង​ថាមពល និង​រ៉ែ លោក Daovong Phonekeo បានអោយដឹង​កាលពីពេលថ្មីៗនេះ​ថា ចាប់ពីពេលនេះ​រហូតដល់​ឆ្នាំ ២០២៥ ប្រទេស​វៀតណាម​នឹង​ទិញ​អគ្គិសនី​ចំនួន ៣០០០មេ​ហ្កា​វ៉ា​ត់​ពី​ប្រទេស​ឡាវ​ក្នុងតម្លៃ ៦.៩៥សេន​ដុល្លារ​ក្នុង​មួយ​គីឡូវ៉ាត់ម៉ោង។

លោក​បន្តថា បរិមាណ​អគ្គិសនី​ដែល​បាន​លក់​ទៅឱ្យ​ប្រទេស​វៀតណាម​នឹង​កើន​ឡើងដល់ ៥,០០០មេ​ហ្កា​វ៉ា​ត់ រវាង​ឆ្នាំ ២០២៦ និង ២០៣០ ដោយ​តម្លៃនឹង ត្រូវបាន​កំណត់​ឡើងវិញ។

លោក Daovong បន្តថា ប្រទេស​ឡាវ​មាន​សក្តានុពល​ធំធេង​ក្នុង​ការផលិត​ថាមពល​ពី​រោងចក្រ​វា​រី​អគ្គិសនី​ថាមពល​ពន្លឺព្រះអាទិត្យ និង​ខ្យល់​សម្រាប់​លក់​ទៅ​ប្រទេស​វៀតណាម និង​ប្រទេស​កម្ពុជា។

បច្ចុប្បន្ន​ប្រទេស​ឡាវ​មាន​រោងចក្រ​វា​រី​អគ្គិសនី​ចំនួន៧៨ ដែលមាន​កម្លាំង​ដំឡើង ៩.៩៧២មេ​ហ្កា​វ៉ា​ត់​កំពុងដំណើរការ​ដែល​លើសពី​តម្រូវការ​ប្រើប្រាស់​ក្នុងស្រុក។ ជាមួយគ្នានេះ​ក៏មាន​រោងចក្រ​ថាមពល​ធ្យូងថ្ម​គម្រោង​ជីវម៉ាស ៤ និង​រោងចក្រ​ថាមពល​ពន្លឺព្រះអាទិត្យ​ចំនួន ៦ ផងដែរ។

អគ្គិសនី​គឺជា​អ្នករក​ប្រាក់ចំណូល​ដ៏​សំខាន់​មួយ​របស់​ឡាវ​ជាពិសេស​តាមរយៈ​ការលក់​ទៅ​ប្រទេស​ថៃ វៀតណាម កម្ពុជា និង​មី​យ៉ាន់​ម៉ា។

ទន្ទឹមនឹង​នេះដែរ​តម្រូវ​ការ​អគ្គិសនី​នៅ​ប្រទេស​ឡាវ​មានការ​កើនឡើង​គួរឱ្យកត់សម្គាល់​ក្នុង​ឆ្នាំ ២០១៩ ដោយសារ​ការកើនឡើង​នៃ​ចំនួន​ប្រជាជន​និង​ចំនួន​រោងចក្រ។

នៅ​ឆ្នាំ ២០១៩ ការប្រើប្រាស់​អគ្គិសនី​នៅក្នុង​ស្រុក​មាន​ចំនួន ១,២២២ មេ​ហ្គា​វ៉ា​ត់​ហើយ​ក្រសួង​ថាមពល​និង​រ៉ែ​ឡាវ​បាន​បញ្ជាក់ថា​ការប្រើប្រាស់​អគ្គិសនី​នឹង​កើន​ឡើងដល់ ១.៨០០ មេ​ហ្គា​វ៉ា​ត់​នៅ​ចន្លោះ​ឆ្នាំ ២០២០ និង ២០២៥ ៕

ដោយ វុត្ថា

ភ្នំពេញ៖ មន្ត្រីជាន់ខ្ពស់​នៃ​ក្រសួង​សាធារណការ និង​ដឹកជញ្ជូន​បាន​អះអាងថា ការដឹកជញ្ជូន​គ្រប់​ប្រភេទ ជាពិសេស​ទំនិញ​តាម​នាវា​នៅតាម​ផ្លូវ​សមុទ្រ​របស់​កម្ពុជា​រហូត​មកដល់​បច្ចុប្បន្ននេះ មិនមាន​អ្វី​រាំងស្ទះ​ដោយសារ​បង្កឡើង​ដោយ ជំងឺ​កូ​វីដ-១៩ នោះទេ ។

លោក ម៉ក់ ស៊ី​ដេ​ត អគ្គនាយក​ដឹកជញ្ជូន​ផ្លូវទឹក ផ្លូវ​សមុទ្រ និង​កំពង់​ផែន​នៃ​ក្រសួង​សាធារណការ និង​ដឹកជញ្ជូន បានឱ្យដឹង​នៅ​ថ្ងៃ​ទ១០ ខែធ្នូ​ថា ការដឹកជញ្ជូន​ទំនិញ​តាមផ្លូវ​សមុទ្រ​ប្រព្រឹត្ត​ទៅតាម​ប្រក្រតី មិនមាន​បញ្ហា​នោះទេ បើ​ទោះ​ពិភពលោក​កំពុង​ប្រឈម​ទៅនឹង​វិបត្តិ​ជំងឺ​កូ​វីដ-១៩ ប៉ុន្តែ​លោក​ថា​មាន​ខែ​ខ្លះ​ក៏មាន​ចំនួន​ច្រើន ហើយ​ខ្លះទៀត ក៏មាន​ចំ​នួ​យ​ថយចុះ ទៅតាម​ការបញ្ជាទិញ។

លោក​បន្ថែមថា សម្រាប់​ការដឹកជញ្ជូន​ទំនិញ​នៅតាម​ផ្លូវ​សមុទ្រ​នេះ ហាក់​មាន​ទំនិញ​ឆ្លងកាត់​ក្នុង​ចំនួន​តិច បើ​ធៀប​ជាមួយនឹង​ផ្លូវ​ទឹកសាប​មាន​ច្រើន ។ លោក​ពន្យល់ថា បញ្ហា​នេះ គឺជា​រឿង​ធម្មតា​ទេ ប៉ុន្តែ​វា​មិន​ប៉ះពាល់​ធ្ងន់ធ្ងរ​លើក​ការដឹកជញ្ជូន​ទំនិញ​ពី​កម្ពុជា​ទៅកាន់​ពិភពលោក និង​ពិភពលោក​មកកាន់​កម្ពុ​ជា​ទេ ។

លោក​បន្ថែមថា ការដឹកជញ្ជូន​ទំនិញ​មកពី​ក្រៅ​ស្រុក​ចូលមក​កម្ពុជា​ក៏​មិនមាន​សញ្ញា​ណាមួយ​គួ​ឱ្យ​ព្រួយបារម្ភ​ទេ  ពីព្រោះ  ពួកគេ​ទំលាក់​ទំនិញ ហើយ​ដឹក​ត្រឡប់​ទៅវិញ ដូច្នេះ វា​មិនមាន​អ្វី​ជា​បញ្ហា​ទេ ប៉ុន្តែ​យ៉ាងណាក៏ដោយ លោក​មិន​បានដឹង​ពី​តួលេខ​ពិត​ប្រក​ដ​នោះទេ​ចំពោះ​ការដឹកជញ្ជូន​ទំនិញ​តាមផ្លូវ​សមុទ្រ​នេះ ព្រោះ​ខែ​ខ្លះ​ក៏​ឡើង ខែ​ខ្លះ​ក៏មាន​ការធ្លាក់ចុះ​ទៅតាម​តម្រូវ​ការបញ្ជាទិញ ពី​ក្នុងស្រុក និង​ក្រៅ​ស្រុក ។

លោក​ថ្លែងថា “ និយាយ​ជារួម​គឺ​មិនមាន​បញ្ហា​អ្វី​ទេ​ចំពោះ​ការដឹកជញ្ជូន​ទំនិញ​តាមផ្លូវ​សមុទ្រ​នេះ វា​មាន​ឡើង​ចុះ ជា​រឿង​ធម្មតា ប៉ុន្តែ​បើ​ឱ្យ​ធ្លាក់​ខ្លាំង គឺ​មិនមាន​ទេ” ។

បើទោះបី​មិន​មិន​បញ្ហា​នៅក្នុង​ការដឹកជញ្ជូន ក៏ដោយ លោក​ឧកញ៉ា ស៊ិន ច​ន្ធី ប្រធាន​សមាគម​ភ័ស្តុភារ​កម្ម​កម្ពុជា (CLA) តម្លៃ​សេវា​ដឹកទំនិញ​ពី​កម្ពុជា​ទៅកាន់​ទីផ្សារ​ប្រទេស​ចិន អឺរ៉ុប និង​អាមេរិក កំពុង​កើ​ឡើង​ខ្ពស់​នៅក្នុង​រយៈពេល​ប៉ុន្មាន​ខែ​ចុង​ក្រោយនេះ។

លោក​ថា តម្លៃ​ដឹកជញ្ជូន​ទំនិញ​តាម​នាវា​ពី​កំពង់ផែ​ស្វយ័ត​ក្រុងព្រះសីហនុ​ទៅ​ប្រទេស​ចិន​បាន​កើនឡើង​ពី ៦០០ ដុល្លារ​ដល់ ២ ០០០ដុល្លារ​ក្នុង ១ កុងតឺន័រ ៤០ហ្វី​ត​ចាប់តាំងពី​ខែសីហា​មក។

លោក ច​ន្ធី បាន​ពន្យល់ថា​តម្លៃ​ហ​ឡើង​នេះ​ដោយសារ​ចំនួន​នាវា​ផ្ទុក​កុងតឺន័រ​ដឹកទំនិញ​មក​កម្ពុ​ជាមាន​ការថយចុះ​ដែលជា​ការជះឥទ្ធិពល​អ​វិជ្ជមាន​នៃ​ការ​រាតត្បាត​ជំងឺ​កូ​វីដ-១៩ ជាស​កល ហើយ​អាច​នឹង​ធ្លាក់​ចុះមក​នៅ​ខែមករា ឬ​ខែកុម្ភៈ ឆ្នាំ ២០២១ ៕

ដោយ ៖ រ៉ាណេត

ភ្នំពេញ ៖ តុលាការពាណិជ្ជកម្មកម្ពុជា ដែលផ្តួចផ្តើមឡើង និងជំរុញបង្កើតឡើងដោយសភាពាណិជ្ជកម្មកម្ពុជា ក្នុងគោលបំណងជួយដោះស្រាយនូវរាល់បញ្ហានានានៅក្នុងវិស័យពាណិជ្ជកម្មប្រកបដោយតម្លាភាពនោះ អាចនឹងចាប់ដំណើរការនៅក្នុងឆ្នាំ២០២១ខាងមុខនេះ ខណៈពេលដែលសមាសភាពនៃក្រុមអ្នកច្បាប់ និងអង្គចៅក្រមតុលាការមួយនេះត្រូវបានក្រសួងយុត្តិធម៌រៀបចំមន្ត្រីរួចរាល់ហើយនោះ ។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍នៅល្ងាចថ្ងៃទី១០ ខែធ្នូ ឆ្នាំ២០២០នេះថា ការបង្កើតឱ្យមានតុលាការពាណិជ្ជកម្មនេះគឺក្នុងគោលបំណងចម្បងបំផុតក្នុងការដោះស្រាយនូវរាល់បញ្ហាវិវាទនានាដែលតែងកើតមាន ដែលធានាបាននូវតម្លាភាព ដើម្បីជំរុញ និងបង្កើនភាពទាក់ទាញការធ្វើពាណិជ្ជកម្ម និងវិនិយោគបន្ថមនៅកម្ពុជា។

លោកឧកញ៉ាបន្តថា “ដោយសារតែបញ្ហា និងរឿងវិវាទនានាដូចដែលបានលើកឡើងខាងលើនេះ តែងតែកើតមាន បានធ្វើឱ្យប៉ះពាល់ដល់វិស័យពាណិជ្ជកម្ម ជាពិសេសទីផ្សារក្នុងស្រុក ដូច្នេះហើយបានជានៅពេលបច្ចុប្បន្ននេះ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានជំរុញ និងស្នើសុំទៅកាន់ក្រសួងយុត្តិធម៌ ក្នុងបង្កើតស្ថាប័នតុលាការពាណិជ្ជកម្ម ដើម្បីចូលរួមដោះស្រាយនូវរាល់បញ្ហាឱ្យបានកាន់តែឆាប់តាមដែលអាចធ្វើទៅបាន”។

លោកឧកញ៉ាបានបញ្ជាក់ថា “កាលពីពេលកន្លងទៅនេះ នៅតាមបណ្តាខេត្ត ក្រុង ស្ទើរទូទាំងប្រទេស តែងកើតមានបញ្ហារវាងពាណិជ្ជកម្ម និងស្ថាប័នតុលាការ ទៅលើការដោះស្រាយពាក្យបណ្តឹង ក្នុងការធ្វើពាណិជ្ជកម្មគ្មានតម្លាភាព។ ពេលនេះ ដើម្បីជាដំណោះស្រាយកាន់តែល្អ និងអាចជួយសម្រួលដល់បណ្តាពាណិជ្ជករផងដែរ សភាពាណិជ្ជកម្មកម្ពុជា បានស្នើសុំដល់ក្រសួងយុត្តិធម៌ក្នុងការរៀបចំ និងបង្កើតឱ្យមានតុលាការពាណិជ្ជកម្ម ដែលរហូតមកដល់ពេលនេះ ក៏ឯកឧត្តមរដ្ឋមន្ត្រីក្រសួងយុត្តិធម៌បានបង្ហាញពីកិច្ចគាំទ្រផងដែរ។ អ្វីដែលសំខាន់ គឺស្វែងរកទីតាំង ដែលជាបណ្តោះអាសន្នអាចនឹងដាក់ទីតាំងនៅក្នុងសភាពាណិជ្ជកម្ម ហើយអាចនឹងចាប់អនុវត្តនៅឆ្នាំ២០២១ខាងមុខនេះ”៕