ចំនួនអផាតមិនកំពុងបន្តកើនឡើង ខណៈដែលចំនួនតម្រូវការមានការធ្លាក់ចុះ

December 25, 2017

ដោយ រ៉ាវី

ភ្នំពេញ៖ បើទោះជាសភាពការណ៍នយោបាយនេពេលបច្ចុប្បន្ននេះបានធ្វើឱ្យបណ្តាអ្នកវិនិយោគលើវិស័យអចលនទ្រព្យមួយចំនួនបានបង្ហាញពីការរារែក ក៏ប៉ុន្តែបើគេសម្លឹកមើលពីសកម្មភាពជាក់ស្ដែងក្នុងការសាងសង់វិញ គឺនៅតែមានភាពមមាញឹកឥតស្រាកស្រាន ជាពិសេស លើការសាងសង់សំណង់អាផាតមិនតែម្ដង បើទោះជាតម្រូវការនៅចំពៅមុខត្រូវបានធ្លាក់ចុះគួរឱ្យកត់សម្គាល់ ។

ផ្អែកតាមរបាយការណ៍ដែលសិក្សាឡើងដោយក្រុមហ៊ុន ប៊ុណ្ណារៀលធីគ្រុប បានបង្ហាញថា ចំនួនសំណង់អាគារអាផាតមិននៅក្នុងរាជធានីភ្នំពេញ នៅតែបន្តកើតឡើង ប្រើប្រៀបធៀបទៅនឹងរយៈពេលដូចគ្នាកាលពីឆ្នាំកន្លងទៅ ពោលគឺកើនឡើងរហូតដល់ចំនួនប្រមាណជា 20% ។ ដោយឡែកងាកមកចំនួនតម្រូវការនៃការជួលស្នាក់នៅ ក៏ដូចជាជួលសម្រាប់ការិយាល័យផ្សេងៗ គឺមានការថយចុះប្រមាណ 8%។

លោក សន សៀប ប្រធានក្រុមហ៊ុន Key Real Estate Co, Ltd បានទទួលស្គាល់ថា របាយការណ៍ដែលបង្ហាញខាងលើនេះពិតជាត្រឹមត្រូវ ខណៈដែលការធ្លាក់ចុះនូវចំនួនតម្រូវការនៅលើទីផ្សារជួលអាផាតមិននេះ ក៏ព្រោះតែបច្ចុប្បន្នការវិនិយោគលើវិស័យនេះមានភាពទូលាយ និងមានការប្រកួតប្រជែងគ្នាខ្លាំង។ ប្រកាសនេះបានធ្វើឱ្យមានផលលំបាកក្នុងការស្វែងរកអតិថិជនគោលដៅ។ លោកបញ្ជាក់ថា ៖ «ការកើតមានការផ្គត់ផ្គង់កាន់តែច្រើន វាបានបើកឱកាសឱ្យអតិថិជនមានជម្រើសកាន់តែច្រើនក្នុងការសម្រេចចិត្តជួលសម្រាប់ស្នាក់នៅ ក៏ដូចជាសម្រាប់ធ្វើជាការិយាល័យជាដើម ។ ប៉ុន្តែត្រឡប់មកវិញ អ្នកដែលទទួលរងនូវផលប៉ះពាល់នោះគឺអ្នកផ្គត់ផ្គង់នេះឯង ក្នុងការស្វែងរកអតិថិជន ដែលភាគច្រើនជាជនជាតិបរទេស ខណៈដែលជនជាតិខ្មែរភាគច្រើន មិនមានទំនោរចិត្តការជួលអាគារអាផាតមិនដើម្បីរស់នៅនោះទេ » ។

លោកឧកញ៉ា នួន រិទ្ធី អគ្គនាយកក្រុមហ៊ុន Khmer Foundation Appraisal ក៏បានមានប្រសាសន៍ទទួលស្គាល់ផងដែរថា ទីផ្សារតម្រូវការអាផាតមិនពិតជាមានការធ្លាក់ ជាក់ស្ដែងកាលពីឆ្នាំកន្លងទៅ តម្រូវការបានកើនឡើងប្រមាណ90% ប៉ុន្តែនៅឆ្នាំនេះគឺធ្លាក់មកនៅត្រឹម 70% តែប៉ុណ្ណោះ ។ លោកឧកញ៉ាបានបញ្ជាក់ទៀតថា សម្រាប់អតិថិជនដែលមានតម្រូវការជួយអាផាតមិនជាក់ស្ដែងគឺមានទាំងជនជាតិបរទេស ទាំងជនជាតិខ្មែរ ហើយក្នុងនោះអាចពាក់ព័ន្ធទៅនឹងតម្លៃ ពោលតម្លៃក្រោម1000ដុល្លារ ជាអតិថិជនអាស៊ី អាចជាចិន ថៃ សាំងហ្គាពួរ ជាដើម ប៉ុន្តែបើតម្លៃចាប់ពី1000ដុល្លារឡើងទៅជា ភាគច្រើនជាអ្នកវិនិយោគ ឬជាអ្នកបម្រើការងារក្រុមហ៊ុនឯកជន ដែលជាជនជាតិអឺរ៉ុប ៕

បុណ្យសមុទ្ររយៈពេលបីថ្ងៃកម្ពុជាទទួលបានចំណូល២៥លានដុល្លារ

December 25, 2017

0

ដោយ ដែន ចែងចាំង

ភ្នំពេញ៖ មន្រ្តីជាន់ខ្ពស់ក្រសួងទេសចរណ៍បានអះអាងថា ប្រជាពលរដ្ឋបានចំណាយប្រាក់ប្រមាណ២៥លានដុល្លារ ចូលរួមកំសាន្តក្នុងពិធីបុណ្យសមុទ្រនៅខេត្តកែប ក្នុងរយៈពេលបីថ្ងៃកន្លងមកនេះ។

លោកថោង ខុនរដ្ឋមន្រ្តីក្រសួងទេសចរណ៍បានថ្លែងឲ្យដឹងតាមទូរស័ព្ទនៅព្រឹកថ្ងៃទី២៥ ធ្នូនេះថា ក្នុងរយៈពេលបីថ្ងៃនៃការប្រារពពិធីបុណ្យសមុទ្រ ដែលបានចាប់ផ្តើមពីថ្ងៃទី២២ ដល់២៤ធ្នូ កន្លងមកនេះមានភ្ញៀវទេសចរណ៍ជាតិ អន្តរជាតិទៅទស្សនាកំសាន្ត ចំនួនប្រមាណ៥០ម៉ឺននាក់ ហើយពួកគេចំណាយប្រាក់ក្នុងម្នាក់គិតជាមធ្យម៥០ដុល្លារអាមេរិក ដែលស្មើនឹងប្រមាណ២៥លានដុល្លារ។លោកបន្តថា ការរៀបចំពិធីបុណ្យសមុទ្រឆ្នាំនេះ មានការចូលរួមពីអាជីវករ ប្រតិបត្តិករទេសចរណ៍ជាង៥០០ស្តង់ ក្នុងនោះស្តង់លក់ផលិតផលក្នុងស្រុកមានជាង៣០០ស្តង់ និងស្តង់ផលិតផលថៃមានជិត២០០ស្តង់។

លោកបន្តថា “ការចំណាយបុណ្យសមុទ្រឆ្នាំនេះ មានចំនួនច្រើន ប៉ុន្តែអាជ្ញា ធរខេត្ត និងក្រសួងក៏បានទទួលចំណូលច្រើនផងដែរ ពីការឧបត្ថម្ភនានា”។

ការប្រារពពិធីបុណ្យសមុទ្រនៅខេត្តកែប គឺជាការប្រារពបុណ្យលើកទី៦ ជុំទី២ បន្ទាប់ពីកម្ពុជាបានដាក់ឆ្នេរសមុទ្រ ចូលទៅក្នុងក្លឹបឆ្នេរសមុទ្រស្អាតជាងគេនៅលើពិភពលោកកាលពីឆ្នាំ២០១២។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា ការប្រារពពិធីបុណ្យសមុទ្រ ពិតជាមានសារៈសំខាន់ណាស់ ដើម្បីឲ្យប្រជាជនបានយល់ដឹងពីសមុទ្រ និងចូលរួមថែររក្សាបរិស្ថានសមុទ្រឲ្យបានស្អាត និងនិរន្តរភាព ពិសេសជាការលើកកំពស់ការផ្សព្វផ្សាយ ពីសក្តានុពលទេសចរណ៍នៅតំបន់ឆ្នេរទៅកាន់ពិភពលោកឲ្យបានស្គាល់ច្រើនថែមទៀត។

លោកបន្តថា “ពិធីនេះក៏ជាការផ្តល់ផលប្រយោជន៍ច្រើន ដល់សហគមន៍ជុំវិញ តំបន់នោះ ដោយពួកគេអាចលក់ផលិតផលរបស់ពួកគេដល់ភ្ញៀវជាតិ និងអន្តរជាតិផងដែរ”។លោកបន្តថា “វិស័យទេសចរណ៍ជាវិស័យស្នូលមួយ ក្នុងការបង្កើតសកម្មភាពសេដ្ឋកិច្ច ដោយភ្ញៀវទេសចរណ៍ទៅដល់ទីណា សកម្មភាពសេដ្ឋកិច្ចបានបង្កើតឡើងនៅទីនោះ”៕

តោះទៅមើលគំរោងអភិវឌ្ឍន៍ហេដ្ឋារចនាសម្ព័ន្ឋរបស់រដ្ឋាភិបាលនៅឆ្នាំ២០១៨

December 25, 2017

0

ដោយ គង់ សូរិយា

ភ្នំពេញ៖ មន្ត្រីជាន់ខ្ពស់ក្រសួងសាធារណៈការ និងដឹកជញ្ជូនបានបង្ហាញពីគំរោងអភិវឌ្ឍន៍ហេដ្ឋារចនាសម្ព័ន្ឋជាច្រើន សម្រាប់ឆ្នាំ២០១៨ និងបណ្តាឆ្នាំខាងមុខ ដើម្បីបង្កើនភាពប្រកួតប្រជែងរបស់កម្ពុជា។

ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល បានថ្លែងឲ្យដឹងកាលពីពេលថ្មីៗនេះ ដោយបានប្រកាសពីគម្រោងធំៗចំនួន ១៥ ដែលក្រសួង កំពុងអនុវត្តក្នុងការសាងសង់ផ្លូវជាតិ ផ្លូវល្បឿនលឿន ផ្លូវរថភ្លើង និងកំពុងផែ ព្រមទាំងគម្រោងដឹកជញ្ជូនតាមផ្លូវទឹក។

តាមក្រសួងសាធារណការ និងដឹកជញ្ជូន គម្រោងទាំង ១៥ រួមមាន ទី១ផ្លូវក្រវ៉ាត់ក្រុងទី២ កំពុងសាងសង់ ទី២ផ្លូវក្រវាត់ក្រុងទី៣ បានចរចារចប់ហើយ ទី៣ផ្លូវជាតិលេខ៥ ពីបាត់ដំបង ទៅសិរីសោភ័ណ ពង្រីកជា៤គន្លង កំពុងសាងសង់ ទី៤ ផ្លូវជាតិលេខ៥ ពីព្រែកក្តាម ទៅបាត់ដំបង ពង្រីកជា ៤គន្លង ដេញថ្លៃរួចហើយ ទី៥ ផ្លូវរថភ្លើងពីរ៉ា ទៅព្រលានយន្តហោះភ្នំពេញ កំពុងសាងសង់ បញ្ចប់ខែមីនា ឆ្នាំ២០១៨ ទី៦ ផ្លូវរថភ្លើង ពីភ្នំពេញ ទៅប៉ោយប៉ែត កំពុងសាងសង់ បញ្ចប់ខែវិច្ឆិកា ឆ្នាំ២០១៨។

ទី៧ ផ្លូវជាតិលេខ៣ ពីភ្នំពេញ ដល់ថ្នល់បំបែក ពង្រីកជា ៤គន្លង ទី៨ ផ្លូវជាតិលេខ១១ ពីអ្នកលឿង ដល់ថ្នល់ទទឹង (ផ្លូវជាតិលេខ៧) ទី៩ ស្ពានឆ្លងកាត់ទន្លេមេគង្គ ស្ទឹងត្រង់ កំពុងសាងសង់ ទី១០ ផ្លូវល្បឿនលឿន ភ្នំពេញ-ព្រះស៊ីហនុ ចរចាចប់ហើយ នៅរងចាំចុះហត្ថលេខាអនុវត្តគម្រោង ទី១១ ផ្លូវល្បឿនលឿនភ្នំពេញ-បាវិត កំពុងសិក្សាឡើងវិញ ដោយ JICA ជប៉ុន ទី១២ផ្លូវរថភ្លើងអាកាស AGT នៅភ្នំពេញ កំពុងវាយតម្លៃដោយ JICA ជប៉ុន ទី១៣ កំពង់ផែទឹកជ្រៅខេត្តព្រះសីហនុ នឹងបញ្ចប់នៅឆ្នាំ២០២២ ទី១៤ គម្រោងដឹកអ្នកដំណើរតាមផ្លូវទឹកនៅភ្នំពេញ កំពុងវាយតម្លៃ ទី១៥គម្រោងផ្លូវពីបាត់ដំបងទៅកោះកុង បន្តទៅខេត្តព្រះសីហនុ កំពុងសិក្សា៕

Century21 Cambodia ប្រគល់ពានរង្វាន់ដល់ក្រុមហ៊ុនដៃគូចំនួន១៣

December 25, 2017

0

ដោយ គង់ សូរិយា

ភ្នំពេញ៖ ក្រុមហ៊ុនអចលនទ្រព្យលំដាប់ពិភពលោក Century21 Cambodiaនឹងធ្វើការផ្តលា់នរង្វាន់ដល់ក្រុមហ៊ុនជាដៃគូ ដែលបានទិញ Franchise ពីក្រុមហ៊ុននេះ ដើម្បីប្រកបអាជីវកម្មលើវិស័យអចលនទ្រព្យនៅកម្ពុជា។

អ្នកនាង Grace Rachny Fong នាយិការប្រតិបត្តិនៃក្រុមហ៊ុន Century21 Cambodia បានថ្លែងឲ្យដឹងតាមទូរស័ព្ទនាថ្ងៃទី២៥ ធ្នូនេះថា នៅថ្ងៃនេះក្រុមហ៊ុនCentury21 Cambodia នឹងផ្តល់ពានរង្វាន់ដល់ក្រុមហ៊ុនដៃគូ ដែលបានទិញFranchiseពីក្រុមហ៊ុនមេចំនួន១៣ក្រុមហ៊ុន ដែលបានទទួលជោគជ័យក្នុងនាមជាក្រុមហ៊ុនផ្តល់សេវាកម្មល្អប្រសើរ ក្រុមហ៊ុនដែលមានភ្នាក់ងារច្រើន និងទទួលបានជោគជ័យ និងក្រុមហ៊ុនដែលបានផ្តល់សេវាកម្មបានល្អប្រសើរ គឺ Top performance, Top Service និង Top Agent។

អ្នកនាងបន្តថា “ការផ្តល់ពានរង្វាន់នេះ ជាការលើកទឹកចិត្តដល់ក្រុមហ៊ុនទាំងនេះ ដែលបានស្រលាញ់ និងបានចូលរួមប្រកបអាជីវកម្ម ឬមុខរបរក្នុងវិស័យ អចលនទ្រព្យយ៉ាងជោគជ័យ។អ្នកនាងបន្តថា “នេះជាលើកទី១ ដែលក្រុមហ៊ុន Century21 Cambodia ផ្តល់ពានរង្វាន់នេះ ហើយឆ្នាំក្រោយយើងនឹងផ្តល់ពានរង្វាន់ដល់គ្រប់ភ្នាក់ងារទាំងអស់។

កាលពីដើមឆ្នាំនេះ ក្នុងចំណោមក្រុមហ៊ុនចំនួន១៣ ដែលបានទិញសិទ្ឋអាជីវកម្មពីក្រុមហ៊ុន Century21 Cambodia គឺមានក្រុមហ៊ុនចំនួន៥ ដែលបានទទួលពានរង្វាន់ពីក្រុមហ៊ុន Century21 នៅសហរដ្ឋអាមេរិក។ ក្រុមហ៊ុនទាំងនោះរួមមាន Century21 Mekong, Century21 Imperial, Century21 Fortuna, Century21 Dream Property, និងក្រុមហ៊ុន Century21 Fugi Realty។

អ្នកនាង Grace Rachny Fong បានបន្តថា “ក្រុមហ៊ុនទាំង១៣ដែលទទួលបានពានរង្វាន់នាឆ្នាំនេះ បានទទួលលទ្ឋផលយ៉ាងជោគជ័យ លើអាជីវកម្មរបស់ពួកគេក្នុងវិស័យអចលនទ្រព្យ។

Century21 Cambodia ត្រូវបាននាំចូល Master Franchise ពីសហរដ្ឋអាមេរិក ដោយក្រុមហ៊ុន VTRUST GROUP នៅឆ្នាំ២០១៤ ក្នុងនាមជាប្រទេសទី៧៥ ដែលបាននាំចូលនូវសិទ្ឋអាជីវកម្មនៃក្រុមហ៊ុននេះ។ បច្ចុប្បន្នក្រុមហ៊ុន Century21 បានពង្រីកទៅកាន់៧៩ប្រទេស មានការិយាល័យសរុប៧២៥០ និងមានភ្នាក់ងារចំនួនជាង១៣ម៉ឺននាក់នៅទូទាំងពិភពលោក៕

មហាយក្សចិនជំរុញឲ្យប្រទេសក្នុងតំបន់មេគង្គ ឡានឆាងអភិវឌ្ឍន៍ខ្សែរថភ្លើងដោយខ្លួនឯង

December 25, 2017

0

ដោយ ដួង ចន្ទ្រា

ភ្នំពេញ៖ មន្ត្រីជំនាញផ្នែកបណ្តាញផ្លូវរថភ្លើងរបស់ចិន បានជំរុញឲ្យប្រទេសក្នុងតំបន់មេគង្គ ឡានឆាងធ្វើការអភិវឌ្ឍ និងគ្រប់គ្រងដោយខ្លួនឯង ដើម្បីតភ្ជាប់បណ្តាញផ្លូវរថភ្លើងក្នុងគំរោងខ្សែក្រវ៉ាត់មួយ ផ្លូវមួយជាមួយប្រទេសចិន។

លោក Yang Zhongming នាយករងវិស្វករ នៃក្រុមហ៊ុន China Railway និងជានាយកក្រុមហ៊ុន China Railway អន្តរជាតិបានលើកឡើងក្នុងកិច្ចប្រជុំមេគង្គ ឡានឆាងកាលពីសប្តាហ៍មុនថា គម្រោងរថភ្លើងនេះបច្ចុប្បន្នប្រទេសចិនបានអនុវត្តន៍ផ្លូវរថភ្លើងក្នុងស្រុករួចហើយ។ ប្រទេសចិននឹងរំពឹងទុកថា ្លូវរថភ្លើងក្នុងគំរោងខ្សែក្រវ៉ាត់មួយ ផ្លូវមួយជាមួយប្រទេសចិន។ភិវឌ្ឍ និងគ្រប់គ្រងការគម្រោងអនុវត្តន៍ផ្លូវរថភ្លើងចំនួន៣ខ្សែ នៅក្នុងតំបន់ប្រទេសឡានឆាង មេគង្គ ដែលគម្រោងខ្សែទី១ ដែលចេញពីខេត្តគុណមិញនៃប្រទេសចិន ចូលទៅប្រទេសវៀតណាម កម្ពុជា ថៃ ម៉ាឡេស៊ី ទៅសាំងហ្គាព្យួរ ខ្សែទី២ជាគម្រោងរថភ្លើងកណ្តាល ចូលប្រទេសឡាវ និងប្រទេសថៃ និងគម្រោងទី៣ ចូលទៅប្រទេស ភូមា ថៃ ម៉ាឡេស៊ី ទៅសាំងហ្គាព្យួរ។

លោកបន្តថា ប្រទេសនៅក្នុងតំបន់ឡានឆាង មេគង្គ មិនទានអនុវត្តន៍នៅ ឡើយទេ ដែលទាមទារឲ្យរដ្ឋាភិបាលប្រទេសនីមួយៗ ធ្វើការគ្រប់គ្រងដោយខ្លួនឯង ក្នុងការអភិវឌ្ឍន៍គម្រោងខ្សែក្រវ៉ាត់ One Belt, One road ក្នុងការជម្រុញឲ្យមានការអភិវឌ្ឍន៍រួមគ្នា ព្រោះបញ្ហាផ្លូវរថភ្លើងនេះ គឺជាផ្នែកមួយដែលមានសារៈសំខាន់ ដើម្បីប្រាស្រ័យទាក់ទងគ្នា ការធ្វើពាណិជ្ជកម្ម និងការធ្វើដំណើររបស់ភ្ញៀវទេសចរណ៍ជាដើម ។

ទោះជាយ៉ាងណាដំណើរការនេះ ហាក់ដូចជាស្ថិតនៅវែងឆ្ងាយនៅឡើយ សម្រាប់កម្ពុជា ដោយសារបញ្ហាកង្វះថវិកា ខណៈបច្ចុប្បន្នកម្ពុជាកំពុងតភ្ជាប់បណ្តាញរថភ្លើងជាមួយប្រទេសថៃ ដែលគ្រោងនឹងបញ្ចប់ការសាងសង់នៅឆ្នាំ២០១៨ខាងមុខនេះ។នេះបើតាមការឲ្យដឹងពីរដ្ឋមន្ត្រីក្រសួងសាធារណៈការ និងដឹកជញ្ជូន៕

ការធ្វើដំណើរតាមកាណូតផ្លូវទឹកនឹងចាប់ផ្តើមមុនពិធីបុណ្យចូលឆ្នាំខ្មែរខាងមុខ

December 25, 2017

0

ដោយ ដែន ចែងចាំង

ភ្នំពេញ៖ មន្ត្រីជាន់ខ្ពស់ក្រសួងសាធារណៈការ និងដឹកជញ្ជូនបានថ្លែងថា ការធ្វើដំណើរតាមកាណូត តាមផ្លូវទឹកចេញពីតំបន់ភាគខាងជើងក្រុងភ្នំពេញ ទៅកាន់ក្រុងតាខ្មៅ ក្នុងខេត្តកណ្តាលនឹងចាប់ផ្តើមមុខពិធីបុណ្យចូលឆ្នាំខ្មែរខាងមុខនេះ។

លោកវ៉ា ស៊ីមសូរិយាអ្នកនាំពាក្យក្រសួងខាងលើនេះបានថ្លែងឲ្យដឹងតាមទូរស័ព្ទនាព្រឹកថ្ងៃទី២៥ ធ្នូនេះថា បច្ចុប្បន្ននាយកដ្ឋានជំនាញនានាកំពុងរៀបចំផែនការនេះ ព្រោះតាមអ្វីដែលឯកឧត្តមទេសរដ្ឋមន្ត្រីចង់បាន គឺធ្វើយ៉ាងណាឲ្យការដឹកជញ្ជូនតាមផ្លូវទឹកដំណើរការបាន មុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ។លោកបន្តថា នាយកដ្ឋានជំនាញកំពុងសិក្សាពីការកសាងកាណូតដឹកជញ្ជូន នៅក្នុងស្រុក ជាជាងទិញកាណូតនាំចូលពីប្រទេសជិតខាង ព្រោះវាមានភាពស្មុគ្រស្មាញច្រើនលើបែបបទ និងនិតិវិធីនានា។

លោកបន្តថា តាមគំរោងក្រសួងរៀបចំកំពង់ផែចំនួន១៨ទីតាំង ចេញពីតំបន់ព្រែកព្នៅ មកកាន់ក្រុងតាខ្មៅ ប៉ុន្តែជំហ៊ានតំបូងធ្វើតែ២ទៅ៣កំពង់ផែសិន ដើម្បីដំណើរការសាកល្បង។

ទោះជាយ៉ាងណាលោកវ៉ា ស៊ីមសូរិយាមិនបញ្ជាក់ឲ្យដឹងពីទំហំថវិកាត្រូវចំណាយសម្រាប់វិនិយោគក្នុងគំរោងនេះទេ។

លោកស៊ុន ចាន់ថុលរដ្ឋមន្ត្រីក្រសួងសាធារណៈការ និងដឹកជញ្ជូនបានថ្លែងឲ្យដឹងកាលពីពេលថ្មីៗនេះថា ក្រសួងមានកញ្ចប់ថវិកាមួយចំនួនរួចហើយ ដើម្បីរៀបចំកំពង់ផែតូចៗ ដើម្បីធ្វើជាចំណតមធ្យោបាយដឹកជញ្ជូនតាមផ្លួវទឹក ចេញពីតំបន់ព្រែកព្នៅ ឆ្ពោះទៅក្រុងតាខ្មៅខេត្តកណ្តាល។លោកបន្តថា ការធ្វើដំនើរតាមផ្លូវទឹកនឹងជួយកាត់បន្ថយការចំណាយ និងការកកស្ទះចរាចរណ៍ ព្រោះវាជាមធ្យោបានធ្វើដំនើរមួយទៀត ដែលក្រសួងកំពុងគិតគូ៕

សេដ្ឋកិច្ចកម្ពុជានឹងកាន់តែរ៉ឹងមាំតាមរយៈកំពង់ផែទឹកជ្រៅ

December 25, 2017

0

ដោយ គង់ សូរិយា

ភ្នំពេញ៖ សេដ្ឋកិច្ចកម្ពុជាកាន់តែរ៉ឹងមាំតាមរយៈការតភ្ជាប់កំពង់ផែទឹកជ្រៅរបស់កម្ពុជា ដែលគ្រោងនឹងបញ្ចប់នៅឆ្នាំ២០២២ខាងមុខនេះ ដែលកំពង់ផែនេះនឹងជួយសម្រួល ការតភ្ជាប់ការដឹកជញ្ជូនទំនិញកម្ពុជាទៅកាន់ពិភពលោក។

ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូនលោកស៊ុន ចាន់ថុលបានថ្លែងឲ្យដឹងកាលពីពេលថ្មីៗនេះថា កំពង់ផែទឹកជ្រៅនេះមានជម្រៅទឹករហូតដល់១៤,៥0ម៉ែត្រ ដែលអនុញ្ញាត្តឲ្យកប៉ាល់ធំ៩៣ភាគរយ នៃពិភពលោកអាចចូលចតដឹកទំនិញបាន។លោកបន្តថា កំពង់ផែនេះនឹងបញ្ចប់នៅឆ្នាំ២០២២ ខាងមុខនេះ ដែលនឹងអនុញ្ញាត្តឲ្យកម្ពុជា អាចដឹកទំនិញនិងតភ្ជាប់ប្រព័ន្ឋដឹកជញ្ជូនទៅកាន់ពិភពលោក។

លោកបន្តថា ជាមួយគ្នានេះក្រសួងបាន និងកំពុងសិក្សាកសាងផ្លួវថ្មីមួយតភ្ជាប់ពីខេត្តបាត់ដំបង ទៅកាន់ខេត្តកោះកុង ដើម្បីសម្រួលការធ្វើដំនើរ និងដឹកជញ្ជូនកសិផលកម្ពុជាមកកាន់កំពង់ផែនេះ ដើម្បីកាត់បន្ថយការពឹងផ្អែកទីផ្សារប្រទេសថៃ។

លោកស៊ុន ចាន់ថុលបានបន្តថា ការសាងសង់ផ្លូវនេះ នឹងជួយសម្រួលនិងលើកកំពស់ជីវភាពប្រជាពលរដ្ឋ និងលើកកំពស់សេដ្ឋកិច្ចកម្ពុជា ក្នុងក្របខ័ណ្ឌកម្ពុជាអាចឈរដោយខ្លួនឯង ជាជាងពឹងផ្អែកដង្ហើមគេដក ព្រោះការពឹងដង្ហើមគេដក(ពឹងប្រទេសថៃ)វាពិបាកណាស់។

យ៉ាងណាក៏ដោយលោកទេសរដ្ឋមន្ត្រី មិនបញ្ជាក់ឲ្យដឹងពីការសិក្សាសាងសង់ផ្លូវនេះបញ្ចប់នាពេលណាទេ ហើយផ្លូវនេះមានប្រវែងប៉ុន្មាន និងចំណាយថវិកាចំនួនប៉ុន្មានរយលានដុល្លារ មិនទាន់ដឹងនៅឡើយទេ៕

រយៈពេល២២ឆ្នាំ ឧកញ៉ាម៉ុង រិទ្ឋី វិនិយោគ១០០លានដុល្លារលើចំការដូងប្រេង

December 24, 2017

0

ដោយវុត្ថា
ភ្នំពេញ ៖ សេដ្ឋីកសិកម្មកម្ពុជា អ្នកឧកញ៉ាម៉ុង រិទ្ឋីបានវិនិយោគលើ់ទឹកប្រាក់១០០លានដុល្លារអាមេរិក ដើម្បីដាំដើមដូងប្រេងនៅស្រុកព្រៃនប់ ខេត្តព្រះសីហនុក្នុងរយៈពេល២២ឆ្នាំកន្លងមកនេះ។

លោកឧកញ៉ាដែលមានរហ័សនាមជាជា “ស្តេចកសិកម្ម”នេះបានសរសេរលើបណ្តាញ ទំនាក់ទំនងសង្គមរបស់លោកថ្ងៃសៅរ៍ទី២៣ ខែធ្នូ ឆ្នាំ២០១៧ ក្នុងពិធីចូលរួម ក្នុងកម្មវិធីជប់លៀងបំណាច់ឆ្នាំ២០១៧ ២០១៨ជូនបុក្គលិក កម្មករក្រុមហ៊ុនម៉ុង ឫទ្ធីវិនិយោកទុនដំណាំដូងប្រេងកម្ពុជា និងក្រុមហ៊ុនកំពង់ផែឧកញ៉ាម៉ុង ឫទ្ធី ប្រមាណជាជាង3.000នាក់ ដែលមានទីតាំងស្ថិតនៅក្នុងភូមិអន្លុងក្រពើ ឃុំតានៃ ស្រុកព្រៃនប់ ខេត្តព្រះសីហនុខ្ញុំមានជំនឿថា ភូមិអន្លុងក្រពើនេះប្រជាជនខ្មែរយើងមិនងាយបានមកដល់ និងបានស្គាស់ណាស់ ពីព្រោះអីកាលពីប្រទេសយើងធ្លាក់ចូលក្នុងភ្លើងសង្គ្រាមឆ្នាំ១៩៧០ ជាតំបន់ប្រទាញប្រទង់ខ្មែរក្រហមគ្រប់គ្រងរហូតដល់ឆ្នាំ១៩៩៨ ទើបបានធ្វើសមារណកម្មសរុបរយ:ពេល២៨ឆ្នាំ នៅឆ្នាំ១៩៩៥។

លោកបន្តថា “ខ្ញុំបានស្នើសុំការអនុញ្ញាត្តិ ពីរាជរដ្ឋាភិបាលយកតំបន់នេះមកធ្វើការអភិវឌ្ឍន៍ដាំដំណាំកសិឧស្សាហកម្មដូងប្រេង និងនៅក្នុងឆ្នាំ២០១៥បានសាងសង់រោងចក្រកែច្នៃផ្លែដូងស្រស់ ដែលមានកម្លាំងផលិតបាន៤៥តោនក្នុងមួយម៉ោង បើគឹតជាការវិនិយោករយ:ពេល២២ឆ្នាំនេះសរុបទាំងដាំ និងរោងចក្រកែច្នៃផង អស់ទឹកប្រាក់ប្រមាណជាជាង100លានដុល្លារួចទៅហើយ”៕

ផ្លូវល្បឿនលឿនភ្នំពេញ ទៅក្រុងព្រះសីហនុនឹងចាប់ផ្តើមនៅពេលឆាប់នេះ

December 24, 2017

0

ដោយ ដែន ចែងចាំង
ភ្នំពេញ ៖ ផ្លូវល្បឿនលឿនចេញពីរាជធានីភ្នំពេញ ទៅកាន់ខេត្តព្រះសីហនុនឹងចាប់ផ្តើមសាងសង់នាពេលឆាប់ៗខាងមុខនេះហើយ ដែលវានឹងបញ្ចប់ការទន្ទឹងរង់ចាំជាយូររបស់ប្រជាពលរដ្ឋខ្មែរ។

ទេសរដ្ឋមន្រ្តី រដ្ឋមន្រ្តីក្រសូងសាធារណៈការ និងដឹកជញ្ជូនលោកស៊ុន ចាន់ថុលបានថ្លែងឲ្យដឹងកាលពីដើមសប្តាហ៍នេះថា ការចចាដើម្បីឈានទៅសាងសង់ផ្លូវល្បឿនលឿន ដែលគ្រោងចំណាយប្រាក់២០០០លានដុល្លារ បានបញ្ចប់សព្វគ្រប់អស់ហើយ នៅតែរង់ចាំការចុះហត្ថលេខា ដើម្បីចាប់ផ្តើមសាងសង់ប៉ុណ្ណោះ។លោកបន្តថា ផ្លូវល្បើនលឿននេះ នឹងមានបួនគន្លងពីរទៅ ពីរមកនិងសាងសង់ដោយក្រុមហ៊ុនចិន។

លោកវ៉ា ស៊ីមសូរិយាអ្នកនាំពាក្យក្រសួងសាធារណៈការ និងដឹកជញ្ជូនបានថ្លែងថា ការសាងសង់ផ្លូវល្បឿនលឿនមានសារៈសំខាន់ណាស់ ដើម្បីលើកកំពស់សេដ្ឋកិច្ច និងសង្គម ព្រោះដើម្បីជំរុញកំនើនសេដ្ឋកិច្ចកម្ពុជាបន្ថែមទៀត យើងត្រូវវិនិយោគលើហេដ្ឋារចនាសម្ព័ន្ឋកាន់តែច្រើន ដើម្បីសម្រួលការដឹកជញ្ជូន និងពា ណិជ្ជកម្មកម្ពុជា។

លោកបន្តថា “វាជាអាយុជីវិតជាតិ វាជាការជំរុញសេដ្ឋកិច្ចជាតិរបស់យើង ដើម្បីសេដ្ឋកិច្ចកម្ពុជាឈានទៅកាន់កម្រិតថ្មីមួយ”។

តាមគំរោងផ្លូវល្បឿនលឿននេះ មិនអនុញ្ញាត្តឲ្យមានផ្លូវឆ្លងកាត់ច្រើននោះទេ ព្រោះវាជាផ្លូវល្បឿនលឿន ហើយផ្លូវនេះនឹងមានរបង ដែលមិនឲ្យគោ ក្របីឆ្លងកាត់បានឡើយ។ លោកសូរិយាបញ្ជាក់ឲ្យដឹង។

អគារខ្ពស់កប់ពពកចំនួន ១០នៅលើពិភពលោក នឹងបញ្ចប់សាសង់ក្នុងឆ្នាំ ២០១៨

December 24, 2017

0

ការប្រកួតប្រជែងរវាងបណ្តាប្រទេសនៅលើពិភពលោកបានធ្វើឱ្យអគារខ្ពស់ៗកប់ពពកកើនឡើងយ៉ាងច្រើនក្នុងរយៈពេលប៉ុន្មានឆ្នាំចុងក្រោយនេះ។ បច្ចេកវិទ្យាថ្មី និងសម្ភារៈដែលបានអភិវឌ្ឍបានចាត់ទុកថាកម្ពស់របស់អគារអាចលើសពីធម្មតា។ ឧទាហរណ៍ អគារ Burj Khalifa នៅទីក្រុងឌូបៃមានកម្ពស់ខ្ពស់ជាងគេនៅលើពិភពលោកនាពេលបច្ចុប្បន្នដែលមានកំពស់៨២៨ ម៉ែត្រចាប់ពីបាតក្រោមឡើងទៅដល់កំពូលដែលខ្ពស់ពីដងទៅនឹងកម្ពស់អគារ Petronas នៅក្នុងទីកូឡាឡាំពួដែលធ្លាប់ជាអគារខ្ពស់ជាងគេនៅលើពិភពលោកកាលពី២០ ឆ្នាំកន្លងមុន។ សូមមកមើលអគារចំនួន១០ នៅក្នុងបញ្ជីអាគារខ្ពស់ទាំង ១០០ របស់ក្រុមប្រឹក្សាអគារខ្ពស់ និងទីលំនៅទីក្រុង (Tall Buildings and Urban Habitat )នៅលើពិភពលោកដែលកំពុងស្ថិតនៅក្នុងការសាងសាងក្នុងពិភពលោកដែលអាចនឹងបញ្ចប់នៅចាប់ពីឆ្នាំ ២០១៨តទៅ។

១. អគារ Skyfame Center Landmark Tower

អគារ Skyfame Center Landmark Tower មានកំពស់ ៥២៨ ម៉ែត្រនិង ១០៨ ជាន់ស្ថិតនៅក្នុងទីក្រុងណាននីងក្នុងប្រទេសចិន ហើយត្រូវបានគេរំពឹងថានឹងត្រូវបានបញ្ចប់នៅឆ្នាំ២០២១ ។ តែនេះជាព័ត៌មានដែលអាចរកបានទាក់ទងនឹងអគារទី ១០ នៅលើបញ្ជី។ មិនមានសេចក្តីថ្លែងការណ៍ផ្លូវការឬការបង្ហាញណាមួយត្រូវបានចេញផ្សាយដោយអ្នករចនាឬអ្នកអភិវឌ្ឍន៍ទេ។

Skyfame Center Landmark Tower (528m) – Nanning, China

២ អគារ China Zun Tower
អគារដែលប៉មដ៏ខ្ពស់មហិមារបស់ចិនមួយទៀតមានកម្ពស់ប្រមាណជា ៥២៨ ម៉ែត្រ ដែរនោះ គឺស្ថិតនៅក្នុងទីក្រុងប៉េកាំងក្នុងប្រទេសចិន។ អគារនេះ បានពង្រីកមុខមាត់ថ្មីនៃសង្កាត់ពាណិជ្ជកម្មកណ្តាលរបស់ក្រុងប៉េកាំង។ អគារនេះ ត្រូវបានរចនាឡើងដោយការអនុវត្តន៍ស្ថាបត្យកម្មអន្តរជាតិ Farrells ។ អគារនេះ នឹងត្រូវបានឧទ្ទិសដល់កន្លែងការិយាល័យ មានក្លឹ កន្លែងកម្សាន្តមើលទេសភាព និងកន្លែងជួលនៅជាន់ខាងលើផង។ ប៉មរបស់អគារនេះនឹងមានកម្ពស់ខ្ពស់ជាងគេនៅក្នុងប្រទេសចិន និងខ្ពស់ជាងគេនៅក្នុងតំបន់រងគ្រោះដោយសាររញ្ជួយដី។ គេរំពឹងថានឹងសាងសង់បញ្ចប់នៅក្នុងឆ្នាំ ២០១៨ ។

៣ អគារ Tianjin CTF Finance Cetre
អគារ Tianjin CTF Finance Cetre ស្ថិតនៅក្នុងប្រទេសចិន ខេត្ត Tianjin មានកម្ពស់ប្រមាណជា ៥៣០ ម៉ែត្រនិង ៩៧ ជាន់ត្រូវបានរចនាឡើងដោយក្រុមហ៊ុន Skidmore, Owings & Merrill (SOM) ដែលមានមូលដ្ឋាននៅទីក្រុងឈីកាហ្គោសហរដ្ឋអាមេរិកក្នុងគោលបំណងសម្រេចបាននូវគម្រោង Gold LEED ។ អគារនេះ មាននប៉មកោងរលូនស្រួចឡើងលើដែលមានប្រសិទ្ធភាពខ្ពស់រាំងពន្លឺព្រះអាទិត្យ និងកាត់បន្ថយផលប៉ះពាល់ខ្យល់នៅលើផ្ទៃរបស់ប៉ម។ អគារនេះត្រូវបានគេរំពឹងថានឹងបញ្ចប់នៅឆ្នាំ ២០១៨ ផងដែរ។

Tianjin CTF Finance Centre (530m) – Tianjin, China

៤ អគារ Lotte World Tower

អគារ Lotte World Tower មានកំពស់ ៥៥៤.៥ មានម៉ែត្រ និង ១២៣ ជាន់ខ្ពស់លំដាក់ទី៥ ក្នុងពិភពលោក ស្ថិតនៅក្នុងទីក្រុងសេអ៊ូលប្រទេសកូរ៉េខាងត្បូង ។ អគារនេះត្រូវបានគេបញ្ចប់រួចទៅហើយនូវប៉មរបស់វា ជាមួយគ្នានេះ ដែរការងារសំណង់ខាងក្រៅក៏ត្រូវបានបញ្ចប់ខ្លះដែរហើយ។ អគារនេះត្រូវបានគេរំពឹងថានឹងបើកដំណើរកាជាផ្លូវការនៅដើមឆ្នាំនេះ។ អាគារនេះ ប្រើប្រាស់ចម្រុះមានទាំងកន្លែងការិយាល័យ និងសណ្ឋាគារ។

៥ អគារ Global Financial Center Tower 1
អគារ Global Financial Center Tower 1 ឬហៅ ថា Baoneng Shenyang Global Financial Center មានកំពស់ ៥៦៨ម៉ែត្រនិង ១១៤ជាន់ស្ថិតនៅក្នុងខេត្ត Shenyang របស់ប្រទេសចិន។ អគារនេះ គូប្លង់ដោយក្រុមហ៊ុន ដ៏ល្បីល្បាញ គឺ British Multination Firm Atkins របស់ប្រទេសអង់គ្លេស។ អគារនេះ មានការិយាល័យធ្វើការ កន្លែងលក់រថយន្តនៅខាងលើកំពូលអគារ។ អគារនេះ ត្រូវបានសាងសង់ក្នុងចំណុចកណ្តាលខណ្ឌពាណិជ្ចកម្ម និងឧស្សាហកម្មប្រវត្តិសាស្ត្ររបស់ចិនង ហើយ គ្រោងនឹងបើកដំណើរកាផ្លូវការរនៅឆ្នាំ២០១៨ ។

៦ អគារ Goldin Finance 11
អគារ Goldin Finance 117 មានកំពស់ ៥៩៦.៥ ម៉ែត្រ និង ១២៨ ជាន់ស្ថិត ក្នុងខេត្ត Tianjin ក្នុងប្រទេសចិន ។ ហើយនេះ គឺជាអគារខ្ពស់កប់ពកទី២ របស់ខេត្ត Tianjin ដែលបានជាប់ក្នុងតារាងអគារខ្ពស់លំដាប់ទី ៥ ក្នុងប្រទេសចិន។ ការគូរប្លង់ និងរចនាប៉បនៃអគារនេះដោយក្រុមហ៊ុន Arup Group ដោយប្រើបច្ចេកទេសរចនាសម្ព័ន្ធទំនើបដើម្បីបង្កើនស្ថេរភា។ នៅលើកំពូលគេរចនាដោយដាក់ត្បូងពេជ្យដែលមើលទៅគួរអោយទាក់ទាញមួយកម្រិតទៀត។

៧ អគារ Ping An Finance Center
អគារ Ping An Finance Center មានកំពស់ ៥៩៩ ម៉ែត្រ និង ១១៥ ជាន់ ស្ថិតនៅក្នុង ខេត្ត Shenzhen ក្នុងប្រទេសចិន របស់ក្រុមហ៊ុន Kohn Pedersen Fox គ្រោងនឹងបើកដំណើរការនៅឆ្នាំ២០១៦ ប៉ុន្តែការបើកដំណើរការត្រូវបានពន្យារពេលរហូតដល់ចុងឆ្នាំនេះ។ វានឹងមានបន្ទប់ការិយាល័យ សណ្ឋាគារ និងកន្លែងលក់រាយ ក៏ដូចជាកន្លែងមើលទេសភាពនៅលើកំពូលកំពូលអគារផងដែរ។

៨ អគារ Merdeka PNB118
អគារ Merdeka PNB118 មានកំពស់ ៦៣០ ម៉ែត្រ និង ១១៨ ជាន់ ស្ថិតនៅក្នុងទីក្រុងកូឡាឡាំពួក្នុងប្រទេសម៉ាឡេស៊ី ហើយជា ជាអាគាររខ្ពស់កប់ពពកបំផុតទី៣នៅក្នុងប្រទេសអាស៊ីមួយ អាគារនេះ ត្រូវបានរចនាឡើងដោយស្ថាបត្យករជនជាតិAustralian លោក Fender Katsalidis ។ អគារនេះ គ្រោងនឹងបញ្ចប់នៅឆ្នាំ 2020 អគារនេះនឹងក្លាយជារចនាសម្ព័ន្ធខ្ពស់បំផុតរបស់ប្រទេសម៉ាឡេស៊ីបន្ទាប់អីអាគារ ប៉ម Petronas ។

៩ អគារ Wuhan Greenland Center

អគារ Wuhan Greenland Center មានកំពស់ ៦៣៦ ម៉ែត្រស្ថិតនៅក្នុងខេត្ត Wuhan របស់ប្រទេសចិន។ អគារនេះ ត្រូវបានគេរំពឹងថា នឹងសាងសង់បញ្ចប់នៅក្នុងឆ្នាំ ២០១៨ ខាងមុខនេះ ។ អគារនេះ ត្រូវបានប្លង់ដោយស្ថាបត្យករអាមេរិក Adrian Smith + Gordon Gill ដែលមានរាងកោងរលោង និងគ្រោងទំរង់ជើងសម្រាប់ភាពធន់ទ្រាំនឹងខ្យល់ដូចជា Burj Khalifa ដែរ។ វាក៏ត្រូវបានរចនាឡើងដោយមានលក្ខណៈពិសេសប្រកបដោយថាមពលជាច្រើន។

១០ អគារ Jeddah Tower
អគារ Jeda Tower មានកំពស់ប្រមាណជា ១០០០ ម៉ែត្រនិង ១៦៧ជាន់ ដែល អាគារខ្ពស់បំផុតនៅលើពិភពលោកថ្មីនេះទំនងជានឹងក្លាយជាការពិតនៅឆ្នាំ 2020របស់ទីក្រុងឌូបៃ។ អគារនេះនឹងមិនត្រឹមតែខ្ពស់បំផុតនោះទេប៉ុន្តែវាជាលើកដំបូងដែលមានកំពស់ មួយគីឡូម៉ែត្រ ប៉មនៃអគារនេះត្រូវបានរចនាឡើងដោយស្ថាបត្យករអាមេរិច លោក ស្មីតដែលជាអ្នករចនាអាគារខ្ពស់បំផុតនៅលើពិភពលោកមានដូចជាអគារ Burj Khalifa ។ អគារនេះ មានទាំងការិយាល័យ សណ្ឋាគារ ផ្ទះល្វែង និងកន្លែងលក់ដូច។ ដូច្នេះប្រសិនបើគ្មានអ្វីៗប្រែប្រួលនោះទេ គេរំពឹងទុកថាអគារ Jeddah Tower នឹងយកឈ្មោះរបស់ Burj Khalifa រយៈពេល ១០ ឆ្នាំបន្ទាប់ពីអគារ ១០១ នៅទីក្រុងតៃប៉ិកោះតៃវ៉ាន់ ។