ដោយ: គង់ លាងហួរ
អន្តរជាតិ: ខេត្តតៃនិញ(Tay Ninh) ស្ថិតនៅភាគខាងត្បូងប្រទេសវៀតណាម និងមានព្រំប្រទល់ជាប់កម្ពុជា គ្រោងសាងសង់ព្រលានយន្តហោះមួយនៅក្នុងស្រុក Duong Minh Chau របស់ខ្លួន ដោយចំណាយទុនវិនិយោគជាង៤,៧ទ្រីលានដុង (ប្រហែល១៨៤,៨២លានដុល្លារអាមេរិក)។

ព្រលានយន្តហោះទំហំ៤២០ហិកតានេះ នឹងមានចម្ងាយ៧៤គីឡូម៉ែត្រពីព្រលានយន្តហោះ Tan Son Nhat របស់ទីក្រុងហូជីមិញ និងមានចម្ងាយ១០៦គីឡូម៉ែត្រពីព្រលានយន្តហោះ Long Thanh ដែលកំពុងស្ថិតក្រោមការដ្ឋានសាងសង់ក្នុងខេត្តដុងណាយ (Dong Nai)។

ជាពិសេស គម្រោងព្រលានយន្តហោះថ្មីនៅក្នុងខេត្តតៃនិញមួយនេះ មានចម្ងាយត្រឹមតែ៤៤គីឡូម៉ែត្រប៉ុណ្ណោះពីព្រំដែនកម្ពុជា-វៀតណាម។នេះបើយោងតាមការចុះផ្សាយដោយទីភ្នាក់ងារពត៌មាន Vnexpress ។

ការសាងសង់ព្រលានយន្តហោះថ្មីនេះនឹងបំពេញតាមស្តង់ដារ 4E របស់អង្គការអាកាសចរណ៍ស៊ីវិលអន្តរជាតិ ដែលមានន័យថា ព្រលានយន្តហោះនេះអាចផ្ទុកយន្តហោះធំៗដូចជាយន្តហោះ Boeing 777 យន្តហោះ Boeing 787 និងយន្តហោះ ដែលប្រើជាទូទៅសម្រាប់ជើងហោះហើរអន្តរជាតិរយៈពេលវែង។

ព្រលានយន្តហោះនេះមានសមត្ថភាពផ្ទុកអ្នកដំណើរបានចំនួនមួយលាននាក់ក្នុងមួយឆ្នាំ និងអាចផ្ទុកអ្នកដំណើរចំនួន៤០០នាក់ក្នុងមួយម៉ោង។ នេះបើយោងតាមសំណើរបស់រដ្ឋបាលខេត្តតៃនិញដាក់ជូនទៅកាន់ក្រសួងដឹកជញ្ជូន។

គម្រោងព្រលាន​យន្តហោះ​ក្នុងខេត្តតៃនិញ នឹង​មាន​ផ្លូវ​រត់​ប្រវែង​៣.២០០​ម៉ែត្រ និង​មានចំណតយន្តហោះចំនួន៦កន្លែង។

ក្នុងចំណោមទុនវិនិយោគសរុបចំនួន៤,៧៣ទ្រីលានដុង ក្នុងនោះ ទុនចំនួន១៧% នឹងត្រូវបានរ៉ាប់រងដោយរដ្ឋាភិបាលវៀតណាម ខណៈទុនចំនួន៨៣%ទៀតនឹងទទួលបានពីក្រុមអ្នកវិនិយោគក្រោមគំរូភាពជាដៃគូរវាងសាធារណៈ និងឯកជន។

ខេត្តតៃនិញលាតសន្ធឹងលើផ្ទៃដីជាង៤.០០០គីឡូម៉ែត្រក្រឡា និងមានប្រជាជនជិត១,៤លាននាក់ ជាច្រកទ្វារអន្តរជាតិដ៏សំខាន់មួយរវាងប្រទេសវៀតណាម កម្ពុជា និងប្រទេសថៃ៕ប្រភព: Vnexpress ៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះក្នុងការជួញដូរនៅព្រឹកថ្ងៃសុក្រនេះ ខណៈក្រុមអ្នកវិនិយោគកំពុងរង់ចាំមើលតម្រុយអំពីសេដ្ឋកិច្ចរបស់សហរដ្ឋអាមេរិកដើម្បីព្យាករណ៍ទិសដៅអត្រាការប្រាក់របស់ធនាគារកណ្តាលអាមេរិកសម្រាប់ឆ្នាំ២០២៥ និងគោលនយោបាយរបស់រដ្ឋបាលថ្មីរបស់លោកដូណាល់ ត្រាំ។

តួយ៉ាង តម្លៃមាស Spot Gold បានស្ថិតនៅទ្រឹងត្រឹម២.៦៣៥ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,០៩ភាគរយដល់២៦៥១,៤០ដុល្ល្លារក្នុងមួយអោនគិតត្រឹមម៉ោង១០:៣៨នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៨៩,៣ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់ឱ្យនៅថេរក្នុងកិច្ចប្រជុំគោលនយោបាយរបស់ខ្លួននៅថ្ងៃទី២៩ ខែមករា ឆ្នាំ២០២៥ខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៨,១៧ពិន្ទុនៅព្រឹកថ្ងៃសុក្រនេះ បន្ទាប់ពីបានបិទការជួញដូរក្នុងរង្វង់១០៨,១៣ពិន្ទុកាលពីថ្ងៃព្រហស្បតិ៍ម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,០៧ភាគរយដល់៣០,៤១ដុល្លារក្នុងមួយអោន ខណៈតម្លៃផ្លាទីនបានធ្លាក់ចុះ០,០១ភាគរយដល់៩៦៥ដុល្លារក្នុងមួយអោន ហើយតម្លៃ palladium បានងើបឡើង០,៥១ភាគរយដល់៩២៧ដុល្លារក្នុងមួយអោនគិតត្រឹមម៉ោង១០:៤០នាទីព្រឹក៕

ដោយ: គង់ លាងហួរ
ប៉េកាំង: ប្រទេសចិនកំពុងសម្រុកសាងសង់ព្រលានយន្តហោះនៅលើកោះសិប្បនិម្មិតធំជាងគេនៅលើពិភពលោក ដែលមានឈ្មោះថា “Dalian Jinzhou Bay International Airport”។នេះបើយោងតាមការចុះផ្សាយដោយទីភ្នាក់ងារពត៌មាន CNN។

នៅពេលសាងសង់រួចរាល់ ព្រលានយន្តហោះអន្តរជាតិមួយនេះនឹងលាតសន្ធឹងលើផ្ទៃដីកោះទំហំ២០គីឡូម៉ែត្រការ៉េ ហើយមានផ្លូវរត់ (Runways) ចំនួន៤ខ្សែ។

បច្ចុប្បន្ន ព្រលានយន្តហោះអន្តរជាតិហុងកុង “Hong Kong International Airport” ដែលមានទំហំ១២,៤៨គីឡូម៉ែត្រការ៉េ និងព្រលានយន្តហោះអន្តរជាតិ Kansai International Airport ដែលមានទំហំ១០គីឡូម៉ែត្រការ៉េ កំពុងជាប់ឈ្មោះក្នុងបញ្ជីតារាងអាកាសយានដ្ឋានធំបំផុតនៅលើពិភពលោក ដែលសាងសង់នៅលើកោះសិប្បនិម្មិត។ ប៉ុន្តែ នៅពេលព្រលានយន្តហោះ Dalian Jinzhou Bay International Airport ត្រូវបានសាងសង់រួចរាល់ នោះព្រលានយន្តហោះថ្មីនេះនឹងឈរនៅលំដាប់ទី១វិញ។

ព្រលានយន្តហោះរបស់ប្រទេសចិនមួយនេះនឹងអាចទទួលអ្នកដំណើរប្រមាណ៨០លាននាក់ និង ជើងហោះហើរប្រមាណ៥៤០.០០០ជើង ក្នុងមួយឆ្នាំៗ។ ការសាងសង់ត្រូវបានបែងចែកជាដំណាក់កាល ដោយដំណាក់ទី១ គ្រោងនឹងបញ្ចប់រួចរាល់នៅក្នុងឆ្នាំ២០៣៥ខាងមុខ។

ទីក្រុង Dalian ជាទីក្រុងកំពង់ផែដ៏ធំរបស់ខេត្ត Liaoning។ ទីក្រុងនេះបានក្លាយជាសសៃឈាមទ្រទ្រង់សេដ្ឋកិច្ចរបស់ខេត្ត ដោយសារតែទីតាំងស្ថិតនៅជាប់សមុទ្រ និងជាគោលដៅពេញនិយមសម្រាប់ភ្ញៀវទេសចរណ៍ជប៉ុន និងកូរ៉េខាងត្បូង។

វិស័យអាកាសចរណ៍របស់ប្រទេសចិន ត្រូវបានគេរំពឹងថា នឹងអាចវ៉ាដាច់សហរដ្ឋអាមេរិក ដោយក្លាយជាទីផ្សារធំជាងគេនៅលើពិភពលោក និងទាមទារឱ្យចិនត្រូវតែមានព្រលានយន្តហោះប្រមាណ៤៥០ទីតាំងនៅឆ្នាំ២០៣៥ ដើម្បីផ្គត់ផ្គង់តម្រូវការរបស់អ្នកដំណើរ៕ប្រភព: CNN៕

ដោយ: គង់ លាងហួរ
អន្តរជាតិ: មន្ត្រីជាន់ខ្ពស់ម៉ាឡេសុីមួយរូប បានបង្ហើបឱ្យដឹងថា ប្រទេសម៉ាឡេស៊ី បានយល់ព្រមលើសំណើក្នុងការបន្តស្វែងរកបំណែកយន្តហោះ​មួយ​គ្រឿង​របស់​ក្រុមហ៊ុនអាកាសចរណ៍ Malaysia Airlines ដែល​មាន​ជើង​ហោះហើរ​លេខ MH370 ក្រោយការបាត់ខ្លួនយ៉ាងអាថ៌កំបាំងបំផុតលើពិភពលោក ក្នុងរយៈពេលជាង១០ឆ្នាំកន្លងមកនេះ ។

រដ្ឋមន្ត្រីក្រសួងដឹកជញ្ជូនម៉ាឡេសុីបច្ចុប្បន្ន លោក Anthony Loke បានថ្លែងថា សំណើស្វែងរកនៅឯតំបន់ថ្មីមួយ ស្ថិតនៅភាគខាងត្បូងមហាសមុទ្រឥណ្ឌា ធ្វើឡើងដោយក្រុមហ៊ុន Ocean Infinity ដែលធ្លាប់បានធ្វើការស្វែងរកជើងហោះហើរនេះ ក្នុងឆ្នាំ២០១៨ រួចម្តងមកហើយ។ប៉ុន្តែ ក្រុមហ៊ុននេះមិនទទួលបានជោគជ័យឡើយ។

ការស្វែងរកលើកទី១ ពីសំណាក់ក្រុមហ៊ុន Ocean Infinity បានធ្វើឡើង ក្រោយពីមានកិច្ចខិតខំស្វែងរកដោយប្រទេសម៉ាឡេស៊ី អូស្ត្រាលី និងចិន នៅក្នុងតំបន់មហាសមុទ្រឥណ្ឌាភាគខាងត្បូង ក្នុងទំហំ១២០.០០០គីឡូម៉ែត្រការ៉េ ដោយផ្អែកលើទិន្នន័យរវាងផ្កាយរណបអុីនម៉ាសាត់ (Inmarsat) និងយន្តហោះ នៅចន្លោះឆ្នាំ២០១៤ ដល់ឆ្នាំ២០១៨ ។

ក្នុងអំឡុងសន្និសីទសារព័ត៌មានមួយ លោក Loke បានលើកឡើងថា ក្រុមហ៊ុននឹងទទួលបានទឹកប្រាក់ចំនួន៧០លានដុល្លារអាមេរិក ប្រសិនបើអាចរកឃើញបំណែកសំខាន់ៗរបស់ជើងហោះហើរដែលបានបាត់ខ្លួនខាងលើនេះ។

លោក Loke បានសង្កត់ធ្ងន់ថា រដ្ឋាភិបាលម៉ាឡេស៊ីជាបន្តបន្ទាប់បានប្តេជ្ញាចិត្តចំពោះក្រុមគ្រួសារសាច់ញាតិរបស់អ្នកដំណើររងគ្រោះទាំងអស់ ហើយលោកបានសម្តែងក្តីសង្ឃឹមថា កិច្ចការស្វែងរកសារជាថ្មីនេះ នឹងអាចរកឃើញបំណែកយន្តហោះ ដោយនាំមកនូវដំណោះស្រាយសម្រាប់ក្រុមគ្រួសាររបស់ជនរងគ្រោះ។

តើមានមូលហេតុអ្វីនៅពីក្រោយការបាត់ខ្លួននេះ?

យន្តហោះ​មួយ​គ្រឿង​របស់ក្រុមហ៊ុន Malaysia Airlines ប្រភេទ​ Boeing 777 ដែល​មាន​ជើង​ហោះហើរ​លេខ MH370 បាន​បាត់​ដំណឹង​សូន្យចាប់តាំង​ពី​ថ្ងៃទី ៨ ខែមីនា ឆ្នាំ ២០១៤ ក្រោយ​ពី​ហោះ​ឡើង​បាន​បន្តិច​ពី​ព្រលាន​យន្តហោះ​ក្នុង​ទីក្រុង​គូឡាឡំាពួ​រឆ្ពោះ​ទៅ​កាន់​ទីក្រុង​ប៉េកាំង ប្រទេស​ចិន។

យោងតាមតាម​ការ​សន្និដ្ឋាន​បានឱ្យដឹង​ថា បន្ទាប់​ពី​បានហោះ​ឡើង​បាន១ម៉ោង​ភ្លាម យន្តហោះ​នេះបាន​ប្តូរ​ទិសដៅ​​ ដោយ​អ្នក​បើកបរ​មិន​បាន​ប្រាប់​ពី​មូលហេតុ ដោយដំបូង​ធ្វើ​ដំណើរ​ទៅ​ទិស​ខាង​លិច រួច​ទៅ​ទិស​​ខាង​ត្បូង​ឆ្ពោះ​ទៅ​មហាសមុទ្រ​ឥណ្ឌា​ និង​ប្រហែល​ជា​បាន​ធ្លាក់​ទៅ​ក្នុង​ទឹកសមុទ្រ​ ក្រោយ​ពី​បាន​បន្ត​ហោះហើរ​ជា​ច្រើន​ម៉ោង​មក។

យ៉ាងណាមិញ អ្នក​បើកបរ​មិន​បាន​ផ្តល់​ព័ត៌មាន​អ្វី​ទំាង​អស់។ ប៉ុន្តែ ការ​សន្និដ្ឋាន​នេះ​ត្រូវ​បាន​ធ្វើ​ឡើង​ ដោយ​ផ្អែក​លើ​ទិន្នន័យ​ផ្តល់​ដោយ​ផ្កាយរណប។

ទោះជាយ៉ាងណាក្តី គេ​មិន​អាច​ដឹង​ពី​ទីកន្លែង​ពិត​ដែល​យន្តហោះ​នោះ​បាន​ធ្លាក់​នោះទេ ហើយ​គេ​ក៏នៅ​មិន​ទាន់​បាន​រក​ឃើញ​បំណែក​ណា​មួយ​របស់​យន្តហោះ​នេះនោះ​ដែរ ទោះ​បី​ជា​មាន​ការបើកប្រតិបត្តិការ​ស្វែង​រក​ដ៏ធំយ៉ាងណាក្តី។

ទីបំផុតនៅថ្ងៃទី២៩ ខែមករា ឆ្នាំ២០១៥ ប្រទេស​ម៉ាឡេស៊ី​បាន​ប្រកាស​ជា​ផ្លូវការ​ថា ការ​បាត់​ខ្លួនយន្តហោះ​មួយ​គ្រឿង​នេះ ជា​រឿង​គ្រោះថ្នាក់ ហើយអ្នកដំណើរ​ទាំង២៣៩នាក់​ ដែល​ជិះ​នៅ​ក្នុង​យន្តហោះ​នោះក៏​ប្រហែល​ជា​បានស្លាប់​អស់​បាត់​ទៅ​ហើយ។

នៅលើជើងហោះហើរនេះ មានជនជាតិចិនចំនួនជាង១៥០នាក់ ដោយក្រុមគ្រួសារសាច់ញាតិរបស់ពួកគេ បានធ្វើការទាមទារសំណងពីក្រុមហ៊ុនអាកាសចរណ៍ម៉ាឡេស៊ី ក្រុមហ៊ុន Boeing ក្រុមហ៊ុនផលិតម៉ាស៊ីនយន្តហោះ Rolls-Royce និងក្រុមហ៊ុនធានារ៉ាប់រង Allianz ក្នុងចំណោមក្រុមហ៊ុនផ្សេងៗទៀត ៕ប្រភព: BBC ៕