ដោយ គង់ សូរិយា
ភ្នំពេញ៖ មន្ត្រីជាន់ខ្ពស់គណៈកម្មាធិការផ្នែកពាណិជ្ជកម្ម និងវិនិយោគរបស់សាធារណរដ្ឋកូរ៉េបានឲ្យដឹងថា កូរ៉េវិនិយោគលើវិស័យសម្លៀកបំពាក់ និងដំឡើងរថយន្តមានទឹកប្រាក់ ៦០០លានដុល្លារអាមេរិក ខណៈប្រទេសនេះគ្រោងពង្រីកទំហំពាណីជ្ជកម្មជាមួយកម្ពុជាឲ្យកើនដល់ ១០០០លានដុល្លារនៅឆ្នាំ២០។
ប្រធានគណៈកម្មាធិការផ្នែកពាណិជ្ជកម្ម ឧស្សាហកម្មថាមពលនិងវិស័យ SMEនៃសាធារណរដ្ឋកូរ៉េ លោក Chan byoung Wan បានថ្លែងលើកឡើងក្នុងជំនួបជាមួយលោកទេសរដ្ឋមន្ត្រី ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មកាលពីដើមសប្តាហ៍នេះថា ទំនាក់ទំនង និងកិច្ចសហប្រតិបត្តិការកូរ៉េ និងកម្ពុជាជាទំនាក់ទំនងដ៏ល្អ ក្នុងនោះកម្ពុជា-កូរ៉េ នឹងខិតខំពង្រីកកិច្ចសហប្រតិបត្តិការនេះបន្ថែមទៀត ដើម្បីជំរុញការវិនិយោគឲ្យកាន់តែមានច្រើនវិស័យដូចជា ថាមពលកកើតឡើងវិញ ប្រព័ន្ធហេដ្ឋារចនាសម្ព័ន្ធ កិច្ចសហការលើជំនាញបច្ចេកទេស ការបង្កើតសួន ឧស្សាហកម្ម និងបច្ចេកវិទ្យា ជាពិសេសការអភិវឌ្ឍន៍វិស័យសហគ្រាសធុនតូច និងមធ្យម ដែលភាគីកូរ៉េបានចាត់ទុក ជាអាទិភាពសម្រាប់គាំទ្រឧស្សាហកម្មធុនស្រាល និងធ្ងន់ និងជាសរសៃឈាមចូលរួមអភិវឌ្ឍសេដ្ឋកិច្ចជាតិផងដែរ ។
លោក ចម ប្រសិទ្ធ ទេសរដ្ឋមន្ត្រីបានថ្លែងថា បរិយាកាសវិនិយោគនៅកម្ពុជាមានលក្ខណៈអំណោយផល និងឱកាសវិនិយោគដ៏ប្រសើរនៅកម្ពុជា ដោយកម្ពុជាមានសុខសន្តិភាពពេញលេញ និងភាពអនុគ្រោះពាណិជ្ជកម្ម ជាពិសេសការទទួលបានពីប្រទេសអភិវឌ្ឍ និងជាប្រទេសដៃគូ ជាច្រើន ដែលបានអនុញ្ញាតឲ្យទំនិញរាប់ពាន់មុខពីកម្ពុជា នាំចេញដោយរួចពន្ធ និងមិនជាប់កូតា រួមទាំងនាំចេញទៅ ប្រទេសកូរ៉េផងដែរ។
លោកបានបន្តថា កំណើនទេសចរណ៍របស់ភ្ញៀវទេសចរណ៍កូរ៉េ មកកម្ពុជា មានការកើនឡើង ក្នុងនោះឆ្នាំ២០១៦កន្លងមក ភ្ញៀវជនជាតិកូរ៉េមានចំនួន ៤សែននាក់ ដែលធ្វើឲ្យជើងហោះហើរដោយផ្ទាល់ ពីកូរ៉េមកកម្ពុជា មានចំនួន ៣៥ជើងក្នុងមួយសប្តាហ៍។ ជាមួយគ្នានេះពលករកម្ពុជាទៅធ្វើការនៅប្រទេសកូរ៉េ ប្រមាណជិត ៨ម៉ឺននាក់ អាចចាត់ទុកជាសក្តានុពលមួយ ពីព្រោះពួកគេបានទទួលបទពិសោធន៍ ចំណេះដឹង និងការអនុវត្តន៍ដោយផ្ទាល់ នឹងក្លាយជាកំលាំងចូលរួមយ៉ាងសំខាន់ ក្រោយពួកគេត្រឡប់មកកម្ពុជាវិញ នឹងអាចចូលរួមបម្រើការងារ ក្រុមហ៊ុនកូរ៉េនៅកម្ពុជាបានផងដែរ៕
