ដោយ : វុត្ថា
ភ្នំពេញ : ស្របពេលដែលចំនួនវិនិយោគិនជប៉ុនមកកម្ពុជា កាន់តែមានចំនួនកើនឡើងច្រើន សាជីវកម្ម Starts (ខេមបូឌា) របស់ជប៉ុនបានអនុវត្តគម្រោងសណ្ឋាគារទី១ របស់ខ្លួនបានសម្ពោធដាក់អោយដំណើរការនូវ សណ្ឋាគារ អ៉ី មីអន ភ្នំពេញថ្មីយមួយទៀត កាលពីម្សិលមិញ។
សណ្ឋាគារនេះ បានកសាងប្រកបដោយភាពច្នៃប្រឌិត និងគិតគូរខ្ពស់ពីបរិស្ថាន ដែលមិនត្រឹមតែចូលរួមយ៉ាងសំខាន់ ដល់ការបង្កើតឱកាសការងារ និងបណ្តុះបណ្តាលវិជ្ជាជីវៈ និងដល់ការអភិវឌ្ឍវិស័យទេសចរណ៍កម្ពុជា ប្រកបដោយនិរន្តរភាព។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែង ក្នុងពេលចូលរួមសម្ភោធសណ្ឋាគារខាងលើថា កិច្ចខិតខំប្រឹងប្រែងរបស់សាជីវកម្ម Starts (ខេមបូឌា) របស់ជប៉ុន លើការអភិវឌ្ឍគម្រោងសណ្ឋាគារទី១ ដែលមានឈ្មោះថា អ៉ី មីអន ភ្នំពេញ ដែលមានកំពស់១៩ជាន់ ស្មើនឹង ២៤០បន្ទប់ គឺជាការរួមចំណែកដ៏សំខាន់ដល់វិស័យសណ្ឋាគារ និងការទាក់ទាញទេសចរ និងវិនិយោគិនជប៉ុនមកកម្ពុជាកាន់តែច្រើនថែមទៀត។
លោករដ្ឋមន្ត្រីបន្តថា តាមការព្យាករណ៍ កម្ពុជាអាចទទួលបានភ្ញៀវទេសចរអន្តរជាតិប្រមាណ៧លាននាក់ នៅឆ្នាំ២០២០ ដោយនាំមកនូវចំណូលប្រមាណ៥ពាន់លានដុល្លារ បង្កើតឱកាសការងារប្រមាណ១លាននាក់ និងភ្ញៀវទេសចរអន្តរជាតិប្រមាណ១៥លាននាក់នៅឆ្នាំ២០៣០ និងអាចនាំមកនូវចំណូលសរុបប្រមាណ១០ពាន់លានដុល្លារ បង្កើតឱកាសការងារប្រមាណ២លាននាក់។
ដោយឡែកកាលពីនៅឆ្នាំ២០១៧ កន្លងទៅ កម្ពុជាទទួលបានភ្ញៀវទេសចរជប៉ុនប្រមាណ២០ម៉ឺនាក់ ក្នុងនោះទេសចរជប៉ុនមកភ្នំពេញមានចំនួន៧៨.៣២២នាក់ កើន ២៧% និង៨ខែ ឆ្នាំ២០១៨ នេះកម្ពុជាទទួលបានទេសចរជប៉ុន ប្រមាណជាង១៣ម៉ឺននាក់ ក្នុងនោះទេសចរជប៉ុនមកភ្នំពេញមានចំនួន៦៩,២៧៩នាក់ កើន១៣.៤%។
លោក ថោង ខុន បានបញ្ជាក់ថា ដើម្បីបន្តត្រៀមទទួលស្វាគមន៍ភ្ញៀវទេសចរជប៉ុន ក្រសួងទេសចរណ៍ បាននិងកំពុងរៀបចំសេចក្តីព្រាង «យុទ្ធសាស្រ្តសិក្សាទីផ្សារទាក់ទាញភ្ញៀវទេសចរជប៉ុន» សំដៅទាក់ទាញ និងត្រៀមទទួលភ្ញៀវទេសចជប៉ុន ជាមួយការដាក់ចេញនូវវិធានការពង្រឹងការគ្រប់គ្រង និងអភិវឌ្ឍន៍គោលដៅទេសចរណ៍ដែលមានស្រាប់ និងការទាក់ទាញវិនិយោគបន្ថែម លើការបង្កើតផលិតផលទេសចរណ៍ថ្មីៗបន្ថែមទៀត។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឲ្យដឹងថា គម្រោងវិនិយោគខ្នាតធំដោយវិនិយោគិនជប៉ុន ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា (CDC) សរុបមកទល់នឹងបច្ចុប្បន្នមានចំនួន៧គម្រោង (៦គម្រោង ជាការវិនិយោគអាជីវកម្មសណ្ឋាគារ និង១គម្រោង ជាការវិនិយោគរមណីយដ្ឋានទេសចរណ៍ (V-Pine Kirirom Resort)។
ក្រៅពីការវិនិយោគធំៗលើអាជីវកម្មសណ្ឋាគារ ដោយវិនិយោគគិនជប៉ុន កម្ពុជាក៏មានសណ្ឋាគារធំៗល្បីៗ ដូចជា សណ្ឋាគារ Park Hyatt, Sofitel , le Meridien, អាម៉ាន់សារា, Raffles, Marriots, Rosewood, Great Duke ជាដើម ហើយក៏មានគម្រោងវិនិយោគសណ្ឋាគារធំៗផ្សេងទៀត ទាំងនៅភ្នំពេញ សៀមរាប និងព្រះសីហនុ កំពុងដំណើរការសាងសង់ផងដែរ។ ដោយឡែក នៅតំបន់កោះក៏មានរមណីយដ្ឋានទេសចរណ៍ល្អៗជាច្រើន ដូចជា កោះសង្សារ កោះក្របី តាតៃ កោះឫស្សី កោះស្តេចជាដើម៕
