ដោយ គង់ សូរិយា
ភ្នំពេញ៖ អាកាសយានដ្ឋានអន្តរជាតិភ្នំពេញ បានបញ្ចប់ការពង្រីកប្រវែងផ្លូវរត់របស់ខ្លួន ដែលអនុញ្ញាត្តឲ្យព្រលានយន្តហោះនេះ មានសមត្ថភាពអាចទទួលយន្តហោះធុនធំបានដោយសុវត្ថិភាព និងមានភាពងាយស្រួលជាងមុន។
អគ្គនាយកក្រុមហ៊ុនសម្បទានព្រលានយន្តហោះកម្ពុជា លោក Eric Delobel បានឲ្យដឹងថាផ្លូវរត់យន្តហោះថ្មីនេះកាលពីថ្ងៃទី១៥ វិច្ឆិកាកន្លងមកថា ព្រលានយន្តហោះនេះ មានលទ្ធភាពទាក់ទាញការចុះចតយន្តហោះ អន្តរជាតិធំៗកាន់តែច្រើនរហូតដល់រយៈពេល១៥ឆ្នាំទៅមុខទៀត ដែលនឹងជួយលើកកម្ពស់វិស័យដឹកជញ្ជូន តាមផ្លូវអាកាសកាន់តែមានលក្ខណៈល្អ ប្រសើរ។
-->
លោកបន្តថា “ផ្លូវថ្មីនេះបានប្រើប្រាស់បច្ចេកទេសសាងសង់ទំនើប ដែលធានាបានទាំងសុវត្ថិភាពនៃការចុះចត និងការរត់ឡើងរបស់យន្តហោះ។
អនុរដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល លោកសយ សុខាន់បានមានប្រសាសន៍ឲ្យដឹងផងដែរថា ការស្ថាបនាផ្លូវរត់យន្តហោះថ្មីនេះ គឺបានបង្កើនភាពកក់ក្តៅដល់អ្នកធ្វើដំណើរ ខណៈដែលចំនួនអ្នកធ្វើដំណើរតាមផ្លូវអាកាសនេះ កំពុងមានកំណើនខ្ពស់ច្រើនពីមួយឆ្នាំទៅមួយឆ្នាំ។
ផ្លូវរត់យន្តហោះថ្មីនេះមានប្រវែង៣ពាន់ម៉ែត្រ ដែលចំណាយទឹកប្រាក់វិនិយោគ ជាង១២លានដុល្លាអាមេរិក ហើយគ្រោងសាងសង់ចំណតយន្តហោះចំនួន១០ចំណតបន្ថែមទៀត ដើម្បីកាន់តែផ្តល់ភាពងាយស្រួល ក្នុងការទទួលយន្តហោះធំៗមកពីក្រៅប្រទេស។
លោកពេជ្រ សុប៉ុនតារាប្រធានផ្នែកបង្កើនការហោះហើរនៃអាកាសយានដ្ឋានកម្ពុជាធ្លាប់បានមានប្រសាសន៍ឲ្យដឹងថា បន្ទាប់ពីសាងសង់ពង្រីកផ្លូវរត់បន្ថែមនេះ ព្រលានយន្តហោះអន្តរជាតិភ្នំពេញ អាចមានលទ្ឋភាពទទួលអាកាសចរណ៍ ដែលអាចផ្ទុកអ្នកដំណើរបានជាង៤០០នាក់ និងមានសមត្ថភាពទទួលយន្តហោះចុះចតកាន់តែច្រើនជាងមុនផងដែរ៕
