ដោយៈ សុផារី
ភ្នំពេញៈ ការវិនិយោគលើដីធ្លី នៅបន្តជាជម្រើសវិនិយោគទី១ ក្នុងចំណោមប្រភេទអចលនទ្រព្យសំខាន់ៗ ក្នុងនោះរាជធានីភ្នំពេញ នៅបន្តជាទីតាំងវិនិយោគលំដាប់ទី១របស់ប្រទេស។
តាមការសិក្សាបានបង្ហាញថា មានខណ្ឌចំនួនបី ទទួលបានកំណើនការស្វែងរកដីធ្លី និងអចលនទ្រព្យ ស្របពេលខណ្ឌចំនួនពីរផ្សេងទៀតមានការធ្លាក់ចុះភាពពេញនិយម។
ការស្ទង់មតិថ្មីមួយរបស់ AmCham Cambodia ដែលបានចេញផ្សាយកាលពីពេលថ្មីៗនេះបានឱ្យដឹងថា ដីនៅតែជាការវិនិយោគ ដែលពេញនិយមបំផុត ដែលមានអ្នកឆ្លើយតបចំនួន៤៣% ជ្រើសរើសវិនិយោគលើដី។ បុរី ខុនដូ និងអចលនទ្រព្យពាណិជ្ជកម្ម ទទួលបានការពេញនិយមបន្ទាប់ ដោយមានអ្នកចង់វិនិយោគ២៣,៩៦% ២០,៨៣% និង ៦,២៥% រៀងៗគ្នា។
ទន្ទឹមនឹងនោះ អ្នកឆ្លើយសំណួរចំនួន៨២ភាគរយ បានជ្រើសរើសទីក្រុងភ្នំពេញ ជាទីតាំងដែលពេញនិយមបំផុតសម្រាប់ការវិនិយោគ។
លោក Tom O’Sullivan នាយកប្រតិបត្តិនៃ realestate.com.kh បានធ្វើបទបង្ហាញអំពីការស្ទង់មតិ ដោយលើកឡើងថា ក្នុងចំណោមខណ្ឌទាំង១៤នៃរាជធានីភ្នំពេញ ខណ្ឌជ្រោយចង្វារ បានក្លាយជាតំបន់ពេញនិយមបំផុតនៅក្នុងឆមាសទី១ ឆ្នាំ២០២២នេះ សម្រាប់អ្នកទិញអចលនទ្រព្យ ដែលមានអត្រាស្វែងរក២១ភាគរយ កើនឡើងពី១២,៧ភាគរយក្នុងឆ្នាំ២០១៧។ ចំណែកខណ្ឌសែនសុខ ទទួលការពេញនិយមកម្រិត១៥,២ភាគរយ និងខណ្ឌចំការមនក្នុងអត្រា១៣,៦ភាគរយ។
ផ្ទុយទៅវិញ ខណ្ឌទួលគោក មានភាពពេញនិយម ក្នុងអត្រាស្វែងរកអចលនទ្រព្យ១៤,៥ភាគរយ ក្នុងឆ្នាំ២០១៧ បានធ្លាក់ចុះយ៉ាងខ្លាំងមក៨,៣ភាគរយ ហើយខណ្ឌដូនពេញ ក៏បានធ្លាក់ចុះពីកម្រិត១០,៣ភាគរយ ដល់៥,៣ភាគរយ ក្នុងរយៈពេលដូចគ្នានេះ។
លោក Tom O’Sullivan បានលើកឡើងថា ទិន្នន័យទាំងនេះបានបង្ហាញថា ៥១ភាគរយនៃអ្នកទិញអចលនទ្រព្យ គឺជាជនជាតិខ្មែរ ខណៈជនជាតិចិនមាន២៦ភាគរយ និងជនជាតិអាមេរិកមាន២៣ភាគរយ។
លោកបន្តថា ធៀបនឹងកម្រិតមុនកូវីដ-១៩ ការទិញរបស់ចិនបានធ្លាក់ចុះ៤០ភាគរយ។
ការស្ទាបស្ទង់មតិរបស់ AmCham Cambodia នេះ បានមកពីអ្នកឆ្លើយសំណួរចំនួន៥១៧នាក់ នៅក្នុងផ្នែកផ្សេងៗគ្នា រួមមាន អ្នកធ្វើការតាមស្ថាប័នរដ្ឋាភិបាល ធនាគារ ស្ថាប័នហិរញ្ញវត្ថុ ច្បាប់ និងវិស័យឯកជន រួមទាំង អ្នកគ្រប់គ្រងអចលនទ្រព្យ អ្នកអភិវឌ្ឍន៍ អ្នកម៉ៅការ ស្ថាបត្យករ ភ្នាក់ងារអចលនទ្រព្យ ឬឈ្មួញកណ្តាល អ្នកផ្តល់សេវាវាយតម្លៃជាដើម៕
