ដោយ វុត្ថា
ភ្នំពេញ៖ សន្ទស្សន៍ទីផ្សារអចលនទ្រព្យរបស់ប្រទេសម៉ាឡេស៊ី នឹងនៅតែបន្តរក្សាបាននូវស្ថេរភាព និងសុខភាពល្អសម្រាប់ឆ្នាំខាងមុខៗទៀត បើទោះបីមានការស្នើរសុំបញ្ចុះតម្លៃលំនៅដ្ឋានចុងក្រោយនេះយ៉ាងណាក្តី។
ក្រុមហ៊ុន PropertyGuru Malaysia បានបង្ហាញរបាយការណ៍របស់ខ្លួននាពេល ថ្មីៗនេះថា ក្នុងត្រីមាសទី៣នៃឆ្នាំ២០១៨នេះ ការស្នើសុំបញ្ចុះតម្លៃពីអ្នកអភិវឌ្ឍន៍ និងម្ចាស់លំនៅដ្ឋាន បានធ្វើឲ្យតម្លៃអចលនទ្រព្យនៅទូទាំងប្រទេសបានធ្លាក់ចុះ មកនៅត្រឹម១.៨ភាគរយ ពី២.៥ភាករយ។
លោក Sheldon Fernandez នាយកក្រុមហ៊ុន PropertyGuru ប្រចាំប្រទេសម៉ាឡេស៊ីបានឲ្យដឹងថា ប្រទេសម៉ាឡេស៊ីនៅតែត្រូវបានគេចាត់ទុកថា មានទីផ្សារអចលនទ្រព្យប្រកបដោយសុវត្ថិភាពក្នុងការវិនិយោគ ទិញ និងលក់អចលនទ្រព្យ ខណៈប្រទេសមួយនេះមិនដែលទទួលរងការធ្លាក់ចុះទីផ្សារ រវាងតម្រូវការនិងការផ្គត់ផ្គង់។ តែយ៉ាងណាក៏ដោយ ការប្រឈមនៅក្នុងទីផ្សារនៅតែកើតមាន រហូតដល់មានការប្រកាសឲ្យមានការដោះស្រាយសមរម្យ ជាពិសេសបញ្ហារវាងកម្រិតប្រាក់ចំណូល និងតម្លៃអចលនទ្រព្យ។
លោកបន្តថា “កម្រិតប្រាក់ចំណូលមានការកើនឡើងខ្ពស់ ដែលធ្វើឲ្យតម្លៃអចនទ្រព្យនឹងមិនចុះទៅតាមតម្រូវការការឡើយ។ លោកបន្តថា “រដ្ឋាភិបាលត្រូវតែបន្តគិតពីតួនាទីរបស់ខ្លួនក្នុងការដោះស្រាយបញ្ហាសមស្រប បើមិនដូច្នោះទេ វានឹងមានផលប៉ះពាល់ដំណើរការសេដ្ឋកិច្ចនៅក្នុងប្រទេស និងការរស់នៅរបស់ប្រជាពលរដ្ឋទាំងមូល។
លោកបន្តថា វិស័យឯកជនគួរតែមានការសហការ ដើម្បីធ្វើឲ្យសមតុល្យភាពរវាង ការផ្គត់ផ្គង់ និងតម្រូវការយោងទៅតាមស្ថានភាពបច្ចុប្បន្ន៕
