ដោយ វុត្ថា
ភ្នំពេញ៖ កម្មវិធី “ពិព័រណ៍កម្សាន្ត និងវិនិយោគប្រចាំតំបន់អាស៊ីប៉ាស៊ីអាគ្នេយ៍ ឆ្នាំ ២០១៨ ឬ Asia Entertainment and Investment Expo 2018 (AGE) “ រយៈពេល៣ថ្ងៃ គឺថ្ងៃទី ២៨ ២៩ និង ៣០ ខែវិច្ឆិកា ឆ្នាំ ២០១៨ បានចាប់ផ្តើមហើយនៅក្នុងប្រទេសកម្ពុជា ដើម្បីបង្ហាញនិងពង្រីកនូវគំនិតអាជីវកម្មទៅលើវិស័យផ្សេងៗ ដូចជាការវិនិយោគលើវិស័យអចលនទ្រព្យ សណ្ឋាគារ និងការកម្សាន្តជាដើម និងស្របទៅនឹងការរីចកម្រើនវិស័យសេដ្ឋកិច្ចរបស់ប្រទេសកម្ពុជា។
លោក សំហេង បូរ៉ា អនុរដ្ឋលេខាធិការនៃក្រសួងពាណិជ្ជកម្ម បានឲ្យដឹងថា កម្មវិធី “ពិព័រណ៍ កម្សាន្ត និងវិនិយោគប្រចាំតំបន់អាស៊ីប៉ាស៊ីអាគ្នេយ៍ ឆ្នាំ ២០១៨ ឬ Asia Entrainment and Investment Expo 2018 (AGE) “នេះ គឺជាឪកាសដ៏ឧត្តមមួយសម្រាប់ការជួបជុំ សហការ ដោះដូរ និងពង្រីកអាជីវកម្ម រវាងម្ចាស់អាជីវកម្ម អ្នកជំនាញ ជាពិសេសវិនិយោគគិនជាតិ និងវិនិយោគិនបរទេស ដែលសកម្មភាពទាំងនេះ បានបង្កើតការចាប់អារម្មណ៍លើការវិនិយោគ នៅកម្ពុជាកាន់តែខ្លាំងក្លា និងជួយជម្រុញសេដ្ឋកិច្ចកម្ពុជាមានភាពល្អប្រសើរឡើងថែមមួយកម្រិតទៀត។
-->
លោកបន្តថា ក្រសួងពាណិជ្ជកម្មពិតជាមានមោទនភាព ដែលប្រទេសកម្ពុជាត្រូវបានជ្រើសតាំងជាកន្លែងប្រជុំទីផ្សារសេដ្ឋកិច្ច ពាណិជ្ជកម្ម និងជជែកពិភាក្សាទាន់ទងនឹងការ វិនិយោគលើវិស័យអចលនទ្រព្យ សណ្ឋាគារ ភោជនីយដ្ឋាន កម្សាន្ត និងបដិសណ្ឋារកិច្ចប្រចាំតំបន់អាស៊ីអាគ្នេយ៍សម្រាប់ឆ្នាំ ២០១៨។
លោក ឃៀង វុទ្ធី ប្រធានសមាគមន៍អ្នកជំនាញអចលនទ្រព្យកម្ពុជា បានអោយដឹងដែរថា ការរៀបចំកម្មវិធីពិព័រណ៍នាពេលនេះ គឺដើម្បីឆ្លើយតបទៅនឹងវិស័យទេសចរណ៍ សណ្ឋាគារ ការស៊ីណូ និងវិស័យសំណង់មានការរីកចម្រើន សម្រាប់បម្រើដល់ភ្ញៀវទេសចរណ៍ដែលចូលមកលេងកម្សាន្តនៅក្នុងប្រទេសកម្ពុជា ។
លោកបន្តថា ព្រឹត្តិការណ៍នេះ ផងដែរគឺជាឪកាសសម្រាប់អ្នកវិនិយោគអន្តរជាតិបានស្វែងយល់ក្នុងវិនិយោគនៅក្នុងប្រទេសកម្ពុជា ហើយក៏គឺជាព្រឹត្តិការណ៍លើកទី ១ នៅក្នុងតំបន់អាស៊ីអាគ្នេយ៍ដែលប្រមូលផ្តុំទៅដោយក្រុមហ៊ុនអន្តរជាតិ ជាច្រើនចូលរួមតាំងពិព័រណ៍នេះ ។
លោកឃៀងវុទ្ធី បញ្ជាក់ទៀត ព្រឹត្តិការណ៍នេះ នឹងត្រូវរៀបចំជារៀងរាល់ឆ្នាំ ដើម្បីទាក់ទាញក្រុមហ៊ុនអន្តរជាតិជាច្រើនផ្សេងទៀតមកស្វែងរកឪកាសវិនិយោគនៅក្នុងប្រទេស ដើម្បីជម្រុញអោយវិសេដ្ឋកិច្ចរបស់ប្រទេសកម្ពុជាកាន់តែរីកចម្រើនមួយកម្រិតថែមទៀត៕
