ដោយៈ គង់ សូរិយា
ភ្នំពេញៈ មជ្ឈមណ្ឌលពាណិជ្ជកម្មចម្រុះ លំដាប់អន្តរជាតិChief Tower បាននិងកំពុងត្រៀមបញ្ចប់ការសាងសង់ តាមផែនការរបស់ខ្លួនជាមួយការនាំមកនូវម៉ាកយីហោ សណ្ឋាគារលំដាប់អន្តរជាតិមកកាន់រាជធានីភ្នំពេញ។
Chief Towerត្រូវបានវិនិយោគដោយក្រុមហ៊ុនJS Property Co Ltd ជាបុត្រសម្ព័ន្ឋរបស់ក្រុមហ៊ុនJS Property Group ដែលមានមូលដ្ឋាននៅទីក្រុងហុងកុង ហើយក្រុមហ៊ុននេះ បានបង្កើតធនាគារChief Bankដែលជាធនាគារពាណិជ្ជ លេចធ្លោមួយផងដែរនៅកម្ពុជា។
យោងតាមប្រភពថ្នាក់ដឹកនាំក្រុមហ៊ុននេះ បាននិយាយក្នុងលក្ខខ័ណ្ឌមិនបញ្ចេញឈ្មោះថា Chief Tower នឹងក្លាយជាការិយាល័យកណ្តាលរបស់ធនាគារChief Bankនៅកម្ពុជា ដែលអាគារកំពស់៤០ជាន់នេះ នឹងមានរួមបញ្ចូលនូវការិយាល័យសម្រាប់ជួល និងសណ្ឋាគារលំដាប់អន្តរជាតិមកពីសហរដ្ឋអាមេរិក។
អាគារពាណិជ្ជកម្មចម្រុះនេះ មានទីតាំងនៅលើមហាវិថីព្រះមុនីវង្ស ស្ថិតក្នុងសង្កាត់បឹងកេងកង១ ខ័ណ្ឌបឹងកេងកងរាជធានីភ្នំពេញ។ ទីតាំងសាងសង់អាគារពាណិជ្ជChief Tower ជាអតីតការិយាល័យរបស់មជ្ឈមណ្ឌលជាតិកំចាត់ជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត ក្រសួងសុខាភិបាល។
ក្រុមហ៊ុន JS Property International Group បានចូលមកកាន់កម្ពុជាជាង១០ឆ្នាំមកហើយ ដែលក្រុមហ៊ុននេះក៏បានវិនិយោគខុនដូ សាងសង់រោងចក្រ និងសណ្ឋាគារមួយចំនួននៅរាជធានីភ្នំពេញផងដែរ។
អាគារChief Towerនឹងប្រើប្រាស់២៥ជាន់ ជាការិយាល័យសំរាប់ជួល ៥ជាន់ជាផ្សារទំនើបលក់រាយ និង១០ជាន់ផ្នែកខាងលើជាសណ្ឋាគារ ទីតាំងប្រជុំនៅជាន់កំពូល ស្ទីម សោណា និងកន្លែងសម្រាប់ជំនួបពិភាក្សាអំពីមុខជំនួញនានាផងដែរ៕
