ដោយស៊ីវ ម៉េង
ភ្នំពេញ : មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា កម្ពុជាមានយុទ្ធសាស្រ្ត សម្រាប់ដោះស្រាយបញ្ហាសេដ្ឋកិច្ចសំខាន់ៗចំពោះមុខ ដើម្បីធ្វើយ៉ាងណាឲ្យសេដ្ឋកិច្ចកម្ពុជាសម្រេចបានកំនើនរ៉ឹងមាំរយៈពេលវែង។
លោកវង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងក្នុងបាឋកថា ស្តីពីកានុវត្តន៍ភាពនានា និងការប្រឈមក្នុងការកសាងជាតិ ដែលរៀបចំនៅសាលាភូមិន្ទរដ្ឋបាល ថ្ងៃទី៤ ខែធ្នូ ឆ្នាំ២០១៨ នេះថា កម្ពុជាក្រោយការអនុវត្តប្រជាធិបតេយ្យសេរីពហុបក្ស និងនៅពេលដែលកម្ពុជាមានសន្តិភាពជាង២០ឆ្នាំមកនេះ បញ្ហាសេដ្ឋកិច្ចកម្ពុជាមានការប្រែប្រួលយ៉ាងខ្លាំង ពោលគឺធ្វើឲ្យកម្ពុជាមានការប្រកួតប្រជែង ដើម្បីបង្កើនកំនើនសេដ្ឋកិច្ចជាតិ និងមានការរៀបចំកែទម្រង់ជាច្រើន ដើម្បីជម្រុញឲ្យមានប្រសិទ្ធភាព និងមានគុណភាព ដើម្បីអភិវឌ្ឍន៍ឈានទៅរកការប្រកួតប្រជែងប្រកបដោយជោគជ័យ ។
លោកបន្តថា “រដ្ឋាភិបាលបាននិងកំពុងប្រែក្លាយឧស្សាហកម្ម ដែលពឹងផ្អែកកំលាំងពលកម្ម ទៅជាឧស្សាហកម្មពឹងផ្អែកលើជំនាញ ការតភ្ជាប់វិស័យវិស័យSME ទៅទីផ្សារអន្តរជាតិ និងការធ្វើទីផ្សារខ្លួនឯង ព្រមទាំងរៀបចំប្រព័ន្ធហេដ្ឋារចនាសម្ព័ន្ធ និងការពង្រឹងគុណភាពវិស័យអប់រំជាដើម”។
យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា សូចករសំខាន់ៗដែលកម្ពុជានឹងសម្រេចបាន នៅក្នុងឆ្នាំ២០១៨នេះ រួមមានផលិតផលសរុបក្នុងស្រុក (ផសស) មានចំនួន៩២,២៤៥ ប៊ីលានរៀល ត្រូវជាប្រមាណ២៤,ពាន់៤៨៧ លានដុល្លារអាមេរិក។ ជាមួយគ្នានេះវិស័យកសិកម្ម នឹងសម្រេចបានកំណើនវិស័យកសិកម្មមានចំនួន២២ភាគរយ វិស័យឧស្សាហកម្ម៣២ភាគរយ និងវិស័យសេវាកម្ម៤០ភាគរយ។
ចំណែកផលទុនសរុបសម្រាប់មនុស្សម្នាក់ ក្នុងមួយឆ្នាំនៅឆ្នាំ២០១៨នេះ នឹងកើនឡើងដល់១៥៥៥ដុល្លារអាមេរិក ហើយសេដ្ឋកិច្ចកម្ពុជារំពឹងនឹងសម្រេចបាន កំណើនសេដ្ឋកិច្ចខ្ពស់ក្នុងរង្វង់អត្រា៧,១ភាគរយផងដែរ។
លោកវង្សី វិស្សុតបានបន្តថា រាជរដ្ឋាភិបាលមានទិសដៅ និងគោលនយោបាយសំខាន់ៗ ដើម្បីចាប់យកកាលានុវត្តភាព និងការដោះស្រាយបញ្ហាប្រឈមសម្រាប់សេដ្ឋកិច្ច តាមរយៈការដាក់ចេញនូវគោលនយោបាយជាច្រើន រួមមានដូចជា គោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥-២០២៥ យុទ្ធសាស្រ្តចតុកោណដំណាក់កាលទី៤ និងចក្ខុវិស័យឆ្ពោះទៅឆ្នាំ២០៥០ជាដើម៕
