ដោយវុត្ថា
ភ្នំពេញ៖ ក្នុងគៅលដៅបង្កើនភាពទាក់ទាញបន្ថែមសម្រាប់ខេត្ត អាជ្ញាធរខេត្តមណ្ឌលគិរី តាមរយៈមន្ទីរបរិស្ថានខេត្ត កំពុងរៀបចំវិនិយោគអភិវឌ្ឍន៍ទេសចរណ៍ធម្មជាតិខ្នាតតូចលើទំហំផ្ទៃដីមិនលើសពី១០ហិកតា) នៅក្នុងភូមិសាស្ត្រភូមិពូត្រំ សង្កាត់រមនាក្រុងសែនមនោរម្យ ខេត្តមណ្ឌលគិរី។
គំរោងនេះស្ថិតក្នុងដែនជម្រកសត្វព្រៃកែវសីមា ក្រោមការគាំទ្រអភិបាលក្រុងសែនមនោរម្យ អង្គការ WCS និងអាជ្ញាធរមូលដ្ឋាន ដើម្បីទាក់ទាញភ្ញៀវទេសចរណ៍ឲ្យមកលេងកម្សាន្តខេត្តមួយនេះកាន់តែច្រើនបន្ថែមទៀត។
លោក រ័ត្ន វិរៈ អនុរដ្ឋលេខាធិការក្រសួងបរិស្ថានបានចុះពិនិត្យជាក់ស្ដែងលើទីតាំងស្នើសុំវិនិយោគកាលថ្ងៃទី១៤ ខែធ្នូ ឆ្នាំ២០១៨ម្សិលមិញនេះដោយបានគាំទ្រ និងឯកភាពលើគម្រោងស្នើសុំ អភិវឌ្ឍន៍តំបន់ទេសចរណ៍ធម្មជាតិមួយនេះ ពីព្រោះគម្រោងនេះបានជួយរួមចំណែកដល់កិច្ចការងារអភិរក្សធនធានធម្មជាតិ និងទាក់ទាញភ្ញៀវទេសចរចូលមកកម្សាន្តក្នុងខេត្ត ដែលសម្បូរទៅដោយសម្រស់ធម្មជាតិ ដ៏មានសក្ដានុពលគួរឲ្យទាក់ទាញមួយនេះ។
លោកបន្តថា “គម្រោងអភិវឌ្ឍន៍ទេសចរណ៍ធម្មជាតិ នឹងជួយលើកកម្ពស់កម្រិតជីវភាពរស់នៅរបស់សហគមន៍មូលដ្ឋាន តាមរយៈអេកូទេសចរណ៍ដែលជាវិស័យឧស្សាហកម្មគ្មានផ្សែង។ តែយ៉ាងណាក៏ដោយលោកមិនបានបង្ហាញ ពីទំហំទឹកប្រាក់វិនិយោគលើតំបន់នេះនោះទេ។
កិច្ចប្រជុំនេះផងដែរ ក៏បានផ្ដោតសំខាន់ និងគិតគូរជាពិសេសទៅដល់អត្ថប្រយោជន៍របស់សហគមន៍មូលដ្ឋាន ដែលនឹងត្រូវទទួលបានពីការស្នើ សុំវិនិយោគអភិវឌ្ឍន៍វិស័យអេកូទេសចរណ៍នេះផងដែរ៕
