ប្រទេសកម្ពុជាទទួលបានទេសចរអន្តរជាតិចំនួន២,២៨លាននាក់ កើនឡើងជាង១ពាន់ភាគរយ

ដោយ៖ សុផារី

ភ្នំពេញ៖ ប្រទេសកម្ពុជាទទួលបានទេសចរអន្តរជាតិសរុបចំនួនប្រមាណ២,២៨លាននាក់ ដោយទិន្នន័យនេះបានកើនឡើងចំនួន១.០៥៩% ធៀបនឹងឆ្នាំ២០២១ និងទេសចរផ្ទៃក្នុង។

នេះបើយោងតាមរបាយការណ៍ស្ថិតិទេសចរណ៍ឆ្នាំ២០២២ របស់ក្រសួងទេសចរណ៍បានបង្ហាញថា ទេសចរជាតិប្រមាណ១៣,៩៣លាននាក់ កើនឡើង១៩៩% និងទេសចរបរទេសប្រមាណ១,៨៨លាននាក់ កើនឡើង៥៧២%។

ជើងហោះហើរអន្តរជាតិចូលសរុបមានចំនួន១០.៩៣៨ ជើង (ឆ្នាំ២០២១ មាន ២.១៣៩ ជើង)។ ក្នុងនោះ អាកាសយានដ្ឋានអន្តរជាតិភ្នំពេញ (PHN) មានចំនួន៨.៧៤០ជើង អាកាសយានដ្ឋានអន្តរជាតិសៀមរាប (REP)មាន១.៧៣៨ ជើង និងអាកាសយានដ្ឋានអន្តរជាតិព្រះសីហនុ (KOS)មានចំនួន៤៦០ជើង។

ក្នុងនោះ ភ្ញៀវទេសចរលំដាប់កំពូលទាំង១០ប្រទេស មកទស្សនាកម្ពុជា រួមមាន ថៃ (៨៥៣.៣៧៦នាក់) វៀតណាម (៤៦៣.៩៩៥នាក់) ចិន (១០៦.៨៧៥នាក់) សហរដ្ឋអាមេរិក (៩៣.៣៨៦នាក់) ឡាវ (៩២.៦០៩នាក់) ឥណ្ឌូនេស៊ី (៧៥.៦៥៣នាក់) កូរ៉េ (៦៤.០៤០នាក់) បារាំង (៥៦.៥០៩នាក់) ម៉ាឡេស៊ី (៥៣.១២៣នាក់) អង់គ្លេស (៤៤.១២៣នាក់)៕