ដោយ: គង់ លាងហួរ
ភ្នំពេញ: យុវជនម្នាក់មកពីស្រុកត្រាំកក់ ខេត្តតាកែវ លោក ណាល់ ដារិទ្ធ បានក្លាយជាជនជាតិខ្មែរដំបូងគេ ដែលបានទទួលចូលរៀននៅរាជបណ្ឌិត្យសភាយោធា Sandhurst (RMAS) ដ៏ល្បីល្បាញនៅចក្រភពអង់គ្លេស។
ដំបូងឡើយ លោកបានបញ្ចប់ការសិក្សានៅសាលាអន្តរជាតិ ICAN ហើយបន្ទាប់មកលោកបានចូលរៀន នៅសាលាអន្តរជាតិISPP ហើយបានប្រឡងជាប់ពិន្ទុល្អ។
ដោយសារតែលោកមានចំណង់ចំណូលចិត្តខាងយោធា និងការគាំទ្រពីឪពុកម្តាយ និងក្រុមគ្រួសារ លោកក៏បានចូលបម្រើជាកងទ័ព។
នៅឆ្នាំ២០២១ លោក ណាល់ ដារិទ្ធ បានដាក់ពាក្យសុំអាហារូបករណ៍ពីគម្រោងអាហារូបករណ៍ Queen Elizabeth II ដែលអាចឱ្យលោកសិក្សានៅរាជបណ្ឌិត្យសភាយោធា RMAS ។
មុនពេលទទួលបានអាហារូបករណ៍ទៅសិក្សានៅ RMAS លោក ណាល់ ដារិទ្ធ ត្រូវឆ្លងកាត់ការសម្ភាសន៍ដ៏ស៊ីជម្រៅជាច្រើន ការប្រឡងយ៉ាងលំបាកជាមួយនឹងមុខវិជ្ជាដ៏លំបាក ជាមួយមន្ត្រីយោធាមកពីចក្រភពអង់គ្លេសដែលមានមូលដ្ឋាននៅប្រទេសសិង្ហបុរី និងក្រោមការត្រួតពិនិត្យយ៉ាងតឹងរ៉ឹងពីស្ថានទូតអង់គ្លេសប្រចាំកម្ពុជា។
អតីតឯកអគ្គរាជទូតអង់គ្លេសប្រចាំនៅកម្ពុជា បានគាំទ្ររូបលោករួមជាមួយមន្ត្រីការទូតជាច្រើននាក់ទៀតនៅស្ថានទូត។
ទីបំផុត ដោយមានការណែនាំ លោក ណាល់ ដារិទ្ធ បានប្រឡងជាប់ និងទទួលបានអាហារូបករណ៍ ដែលជាកិត្តិយសដ៏ធំធេងសម្រាប់ក្រុមគ្រួសារ និងសាច់ញាតិរបស់លោកក្នុងខេត្តតាកែវ។
លោក ណាល់ ដារិទ្ធ បានមានប្រសាសន៍ថា “ដោយសារសន្តិភាព និងស្ថិរភាពនយោបាយ ក្រោមការដឹកនាំរបស់សម្តេចតេជោនាយករដ្ឋមន្ត្រី រួមជាមួយនឹងការជួយជ្រោមជ្រែង ពីលោកគ្រូ អ្នកគ្រូ ក្រុមគ្រួសារ និងអតីតឯកអគ្គរាជទូត និងសហការីរបស់ចក្រភពអង់គ្លេស ទើបខ្ញុំមានឱកាសទៅសិក្សានៅសាលាយោធា ដ៏មានកិត្យានុភាពនៅចក្រភពអង់គ្លេស”។
បន្ទាប់ពីបញ្ចប់ការសិក្សា លោក ណាល់ដារិទ្ធ បានសន្យាថា នឹងប្រើប្រាស់ចំណេះដឹង ដែលលោកទទួលបាន ដើម្បីបម្រើដល់យោធាកម្ពុជា និងរួមចំណែកក្នុងការអភិវឌ្ឍន៍ប្រទេសជាតិ និងការពារសន្តិភាព៕
