ដោយៈ សុខុម
វៀងចន្ទន៍: តំបន់សេដ្ឋកិច្ចពិសេសស៊ីថានដន (Sithandon SEZ) បានចាប់ផ្តើមសាងសង់ហើយ នូវសណ្ឋាគារដែលមានរាង ដូចឧបករណ៍ភ្លេងគែន នៅលើកោះ៤.០០០ ស្ថិតក្នុងភូមិសាស្ត្រស្រុកខុង (Khong) នៃខេត្តចម្ប៉ាសាក់ ប្រទេសឡាវ។
ការសាងសង់សណ្ឋាគារឈ្មោះថា Mekong Intercontinental Hotel នេះគឺជាផ្នែកមួយនៃការអភិវឌ្ឍដំណាក់កាលដំបូង នៃតំបន់សេដ្ឋកិច្ចពិសេសស៊ីថានដន (Sithandon SEZ) ដែលត្រូវបានអនុម័តក្នុងឆ្នាំ២០១៧ និងទុនវិនិយោគតម្លៃ៦០០លានដុល្លារអាមេរិក។ នេះបើយោងតាមសារព័ត៌មាន Laotian Times ចុះផ្សាយកាលពីថ្ងៃអង្គារ ទី២១ ខែកុម្ភៈ។
-->
ប្លង់គម្រោងសណ្ឋាគារមានរាងដូចគែន ដែលជាឧបករណ៍ជាតិប្រពៃណីរបស់ប្រទេសឡាវ នេះត្រូវបានសម្រេចចុងក្រោយនៅថ្ងៃទី២៥ ខែកក្កដា ឆ្នាំ២០២២ ហើយគេរំពឹងថា វានឹងក្លាយជាសណ្ឋាគារខ្ពស់បំផុត ប្រចាំប្រទេសឡាវ ជាមួយនឹងកម្ពស់២៣៨ម៉ែត្រ។
ក្រៅពីរចនាបថឧបករណ៍ភ្លេងបុរាណគែន សណ្ឋាគារនេះក៏មានរចនាបថជាកញ្ជើយក្សមួយ ដែលនៅអមនឹងគែនផងដែរ។
យោងតាមការចុះផ្សាយរបស់គេហទំព័រ tourismmekong.com ឱ្យដឹងថា សណ្ឋាគារនេះ នឹងមានបន្ទប់គេងចំនួនជាង៤០០បន្ទប់។
ទោះជាយ៉ាងណា គ្មានការបញ្ជាក់ជាផ្លូវការពីកាលបរិច្ឆេទ បញ្ចប់ការសាងសង់ និងការសម្ពោធដាក់ឱ្យដំណើរការ សណ្ឋាគារនេះនៅឡើយទេ៕ Laotian Times៕
