ដោយ គង់ សូរិយា
ភ្នំពេញ៖ យោងតាមប្រភពស្និទ្ធនឹងក្រសួងមហាផ្ទៃបានឲ្យដឹងថា ក្រសួងមហាផ្ទៃបានដាក់សំណើសុំបង្កើតខ័ណ្ឌចំនួន ៣បន្ថែមទៀត នៅរាជធានីភ្នំពេញ ទៅសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ប្រភពពីមន្ត្រីជាន់ខ្ពស់ក្រសួងមហាផ្ទៃ បានមានប្រសាសន៍ឲ្យដឹងក្នុងលក្ខខ័ណ្ឌមិនបញ្ចេញឈ្មោះកាលពីដើមសប្តាហ៍នេះថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដាក់សំណើលើគម្រោងពង្រីកខ័ណ្ឌទាំងបីនេះ ទៅប្រមុខរដ្ឋាភិបាលរួចហើយ ប៉ុន្តែមិនទាន់ដឹងថាសម្តេចនឹងយល់ព្រម ឬយ៉ាងណាឡើយ។
-->
ប្រភពដដែលបានឲ្យដឹងថា ខ័ណ្ឌចំនួនបីនោះរួមមាន ខ័ណ្ឌបឹងកេងកង ដោយបំបែកចេញពីខ័ណ្ឌចំការមន ខ័ណ្ឌកំបូលដោយបំបែកចេញពីខ័ណ្ឌព្រែកព្នៅ និងខ័ណ្ឌសែនសុខ និងខ័ណ្ឌមួយទៀតមិនទាន់បញ្ចេញនៅឡើយ។ ទោះជាយ៉ាងណាគំរោងពង្រីកខ័ណ្ឌនេះមិនដឹងមានការសម្រេចបែបណានៅឡើយទេ។
ក្នុងដំណើរទស្សនកិច្ចទៅកាន់ប្រទេសបារាំងកាលពីចុងឆ្នាំមុន លោក ឃួង ស្រេងអភិបាលក្រុងភ្នំពេញ បានស្នើសុំអ្នកជំនាញបារាំងជួយសិក្សាលទ្ឋភាព ពង្រីកទីក្រុងភ្នំពេញបន្ថែមទៀតនាពេលខាងមុខនេះ។
រាជធានីភ្នំពេញបច្ចុប្បន្នមានខ័ណ្ឌចំនួន១២រួចហើយ និងមានផ្ទៃក្រឡា៦៧៨គីឡូម៉ែត្រក្រឡា។
ទោះជាយ៉ាងណាលោក មាស ម៉េតភ័ក្តី អ្នកនាំពាក្យរដ្ឋបាលរាជធានីភ្នំពេញបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១៦ មករានេះថា លោកមិនបានដឹងពីព៌តមាននេះនៅឡើយទេ៕
