ដោយៈ និស្ស័យ
ភ្នំពេញៈ ប្រធានសមាគមសហគ្រិនវ័យក្មេងកម្ពុជា លោកឧកញ៉ាប៉ិច បូឡែនបានបង្ហើបឲ្យដឹងថា គិតមកដល់ពេលសមាជិករបស់សមាគមសហគ្រិនវ័យក្មេងកម្ពុជា បានកើតឡើងដល់ជាង៦០០នាក់ និងគ្រោងពង្រីកសាខាទៅគ្រប់បណ្តារាជធានី ខេត្តនាឆ្នាំ២០២៦ខាងមុខនេះ។
លោកឧកញ៉ាប៉ិច បូឡែនៈសមាគមសហគ្រិនវ័យក្មេងនឹងពង្រីកសមាជិកភាពទូទាំងប្រទេសនៅឆ្នាំ២០២៦
លោកឧកញ៉ាបានបន្តថា បច្ចុប្បន្នសមាគមសហគ្រិនវ័យក្មេងមានសាខា នៅតាមបណ្តារាជធានីខេត្តចំនួន៦ ដូចជាភ្នំពេញ សៀមរាប បាត់ដំបង បន្ទាយមានជ័យ ត្បូងឃ្មុំ និងព្រះសីហនុ។ លើសពីនេះ សមាគមនឹងពង្រីងសាខារបស់ខ្លួន ឲ្យគ្រប់ខេត្តនៅឆ្នាំ២០២៦ ដែលធ្វើសមាជិកកើនឡើងដល់១៥០០នាក់។
លោកឧកញ៉ាបានមានប្រសាសន៍បែបនេះ ក្នុងពិធីចុះហត្ថលេខា លើអនុស្សរណៈនៃការយោគយល់គ្នា ស្ដីពី “កិច្ចសហប្រតិបត្តិការ លើការលើកកម្ពស់ការយល់ដឹង និងជំរុញការចូលរួមរបស់ សហគ្រាសធុនតូច និងមធ្យមក្នុងវិស័យមូលបត្រនៅកម្ពុជា” រវាងនិយ័តករមូលបត្រកម្ពុជា និងសមាគមសហគ្រិនវ័យក្មេងកម្ពុជា ដែលរៀបចំឡើងនៅមជ្ឈមណ្ឌលអភិវឌ្ឍធុរកិច្ច នៅថ្ងៃទី៣១ ខែមីនា ឆ្នាំ២០២៣។
លោកឧកញ៉ាប៉ិច បូឡែនបានពន្យល់ ដល់សមាជិករបស់ខ្លួន អំពីវិធី ក្នុងការជំរុញឲ្យអាជីវកម្មរបស់ខ្លួនរីកចម្រើន តាមរយៈការចូលក្នុងប្រព័ន្ធផ្លូវច្បាប់ គឺចុះបញ្ជីឲ្យបានត្រឹមត្រូវ ដោយកុំបារម្ភ ឬភ័យខ្លាចលើការបង់ពន្ធ។
លោកឧកញ៉ាបានបន្តថា ការចុះបញ្ជីត្រឹមត្រូវ SMEs នឹងទទួលបានការជួយជ្រោមជ្រែង ពីរាជរដ្ឋាភិបាល និងភាគីពាក់ព័ន្ធ ទាំងការទទួលបានឥណទាន ពង្រីកអាជីវកម្ម ហើយអាចពេលអនាគតឡើងផ្សារហ៊ុនទៀតផង៕
