ដោយ: គង់ លាងហួរ
អន្តរជាតិ: អាជ្ញាធរទីក្រុងហាណូយកំពុងពិចារណាលើសំណើរបស់អ្នកអភិវឌ្ឍម្នាក់ក្នុងការប្រែក្លាយគម្រោងលំនៅដ្ឋានពាណិជ្ជកម្មរបស់ក្រុមហ៊ុននោះ ដែលមានអាផាតមុិនចំនួន៣.២០០យូនីត ទៅជាលំនៅដ្ឋានសង្គម។
គម្រោងនោះមានឈ្មោះថា Him Lam Phuc Loi ដែលស្ថិតនៅក្នុងស្រុក Long Bien និងជាកម្មសិទ្ធិរបស់ក្រុមហ៊ុន Him Lam ត្រូវបានអនុម័តក្នុងឆ្នាំ២០១៨ ដោយមានអាផាតមុិនចំនួន៣.២០០យូនីត លំនៅដ្ឋានសង្គមចំនួន១.៩៤៤យូនីត និងផ្ទះផ្លាស់ប្តូរទីលំនៅចំនួន៥០៤យូនីត។
ប៉ុន្តែនៅពេលក្រោយមក ក្រុមហ៊ុន Him Lam បានស្នើសុំដើម្បីប្តូរទៅជាគម្រោងលំនៅដ្ឋានសង្គមវិញ លើកលែងតែ២០%នៃដី ដែលទុកសម្រាប់អភិវឌ្ឍអចលនទ្រព្យពាណិជ្ជកម្មប៉ុណ្ណោះ។
ឥឡូវនេះ អាជ្ញាធរទីក្រុងហាណូយកំពុងព្យាយាមស្វែងរកការអនុម័តពីក្រសួងសំណង់សម្រាប់ការផ្លាស់ប្តូរនេះ។
ជាមួយគ្នានេះ ទីក្រុងហាណូយបានអះអាងថា ខ្លួនត្រូវការដីធ្លីចំនួន១,២១លានម៉ែត្រការ៉េសម្រាប់អភិវឌ្ឍលំនៅដ្ឋានសង្គមនៅឆ្នាំ២០២១រហូតដល់ឆ្នាំ២០២៥។
លើសពីនេះ ទីក្រុងហាណូយក៏គ្រោងនឹងអភិវឌ្ឍគម្រោងលំនៅដ្ឋានសង្គមចំនួន ៥ នៅតំបន់ជាយក្រុងផងដែរ ដូចជាតំបន់ Dong Anh តំបន់ Gia Lam តំបន់ Thanh Tri និងតំបន់ Thuong Tin។
គម្រោងទាំង៥នេះនឹងអាចជួយរួមចំណែកក្នុងការផ្គត់ផ្គង់ទំហំលំនៅដ្ឋានសង្គមលើផ្ទៃដីរហូតដល់២,៥លានម៉ែត្រការ៉េនៅពេលសាងសង់បញ្ចប់រួចរាល់។
លំនៅដ្ឋានសង្គម ឬ Social housing គឺជាផ្ទះ និងផ្ទះល្វែងដែលគ្រប់គ្រងដោយរដ្ឋាភិបាល ឬដោយអង្គការផ្សេងទៀតដែលមិនរកប្រាក់ចំណេញ ហើយត្រូវបានជួលឱ្យប្រជាជនដែលមានប្រាក់ចំណូលទាប៕
