ដោយ៖ គង់ សូរិយា
ភ្នំពេញ៖ ទំនាក់ទំនងកម្ពុជា និងប្រទេសបង់ក្លាដេសបានឈានដល់ដំណាក់កាលថ្មីមួយ ដោយប្រមុខរដ្ឋាភិបាលនៃប្រទេសទាំងពីរ បានប្តេជ្ញាបង្កើនកិច្ចសហ ប្រតិបត្តិការលើពាណិជ្ជកម្ម និងការវិនិយោគ។
ទំនាក់ទំនង កម្ពុជា-បង់ក្លាដេស បានឈានដល់ដំណាក់កាលថ្មីមួយ
ក្នុងជំនួបជាមួយសម្តេចតេជោ ហ៊ុន សែននាយករដ្ឋមន្ត្រីកម្ពុជា លោកជំទាវសេក្ខ ហាស៊ីណានាយករដ្ឋមន្ត្រីបង់ក្លាដេស ដែលបានអញ្ជើញមកទស្សនកិច្ចនៅកម្ពុជាចាប់ពីថ្ងៃទី៣ដល់៥ ធ្នូខាងមុខ ប្រមុខរដ្ឋាភិបាលបង់ក្លាដេសបាន ប្តេជ្ញាចិត្តជំរុញឲ្យអ្នកវិនិយោគបង់ក្លាដេស មកវិនិយោគលើវិស័យកសិកម្មនៅកម្ពុជាឲ្យបានច្រើន ខណៈដែលទំហំពាណិជ្ជកម្មកម្ពុជា បង់ក្លាដេសមានទឹកប្រាក់ត្រឹម៦លានដុល្លារប៉ុណ្ណោះកាលពីឆ្នាំ២០១។
ជាមួយគ្នានេះនៅព្រឹកថ្ងៃទី៤ ធ្នូនេះ ប្រមុខរដ្ឋាភិបាលប្រទេសទាំងពីរបានអញ្ជើញជាអធិបតី ក្នុងពិធីចុះហត្ថលេខាលើកិច្ចព្រមព្រៀងចំនួន១១ ជាកិច្ចព្រមព្រៀង ដែលផ្តោតលើកិច្ចសហប្រតិបត្តិការលើវិស័យកាទូត ពាណិជ្ជកម្ម និងការវិនិយោគ។ ការចុះហត្ថលេខានេះ ជាការចុះហត្ថលេខាធំបំផុត និងច្រើនបំផុតមិនធ្លាប់មានរវាងប្រទេសទាំងពីរ។
ក្នុងជំនួបភិភាក្សាគ្នានេះ នាយករដ្ឋមន្ត្រីបង់ក្លាដេសនិងកម្ពុជាបានផ្តោតលើកិច្ចការសំខាន់ៗមួយចំនួនរួមមានទី១ សម្រេចជ្រើសរើសយកផ្លូវមួយខ្សែនៅប្រទេសរៀងៗខ្លួន ដើម្បីយកព្រះនាមមេដឹកនាំល្បីឈ្មោះប្រទេសទាំងពីរ ដាក់ឈ្មោះផ្លូវនៅប្រទេសរៀសងៗខ្លួន ទី២ ប្រទេសទាំងពីរប្តេជ្ញាបង្កើនការវិនិយោគ និងពាណិជ្ជកម្មកាន់តែធំ។
ប្រទេសបង់ក្លាដេសនាំចេញកំណាត់ ស្បែកជើងរបស់របរប្រើប្រាស់ជាស្បែកមកកម្ពុជា ហើយប្រទេសកម្ពុជាវិញ នាំចេញផលិតផលមួយចំនួន ដូចជា កប្បាស ប្រេងឆា និងជីជាដើមត្រឡប់ទៅប្រទេសបង់ក្លាសដេស។
យោងតាមរបាយការណ៍របស់សភាពាណិជ្ជកម្មកម្ពុជាបានឲ្យដឹងថា បច្ចុប្បន្នមានក្រុមហ៊ុនបង់ក្លាដេស ជាង១០០កំពុងវិនិយោគនៅកម្ពុជា ប៉ុន្តែក្រុមហ៊ុនកម្ពុជាទៅវិនិយោគនៅប្រទេសបង់ក្លាដេសមានចំនួនតិចតួចប៉ុណ្ណោះ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានថ្លែងថា ប្រទេសកម្ពុជា និងបង់ក្លាដេសមានឳកាសធ្វើការរួមគ្នា បានច្រើនជាមួយកម្ពុជា លើវិស័យកសិកម្ម ដោយសារប្រទេសបង់ក្លាដេសមានជំនាញខាងកសិកម្ម និងជាប្រទេសកសិកម្មដូចកម្ពុជាដែរ។ លើសពីនេះ កិច្ចសហប្រតិបត្តិការលើវិស័យទេសចរណ៍ក៏មានសក្តានុពលផងដែរ ព្រោះទេសចរណ៍បង់ក្លាដេសចេញមកកំសាន្តនៅប្រទេសថៃមានប្រមាណ៣០ម៉ឺននាក់ក្នុងមួយឆ្នាំ។
លោកឧកញ៉ាបានបន្តថា “ខ្ញុំគិតថាប្រទេសទាំងពីរមានឳកាសច្រើនធ្វើការរួមគ្នា ដើម្បីពង្រីកទំហំពាណិជ្ជកម្មរវាងប្រទេសទាំងពីរ ព្រោះទំហំពាណិជ្ជកម្មប្រទេសទាំងពីរមានចំនួនតូចនៅឡើយ។លោកបន្តថា “ ក្រុមហ៊ុនបង់ក្លាដេសវិនិយោគនៅមកម្ពុជាភាគច្រើនផ្តោតលើការនាំចូលឳសថ ព៌តមានវិទ្យា និងកសិកម្មជាដើម។
ជាមួយនឹងឆន្ទៈរួមគ្នាក្នុងការពង្រឹង និងពង្រីកកិច្ចសហប្រតិបត្តិការលើពាណិជ្ជកម្ម និងវិនិយោគ លោកជំទាវសេក្ខ ហាស៊ីណានារសៀលថ្ងៃនេះបានអញ្ជើញចូលរួមក្នុងវេទិកាធុរកិច្ចកម្ពុជា បង់ក្លាដេស ដោយមានការចូលរួមពីមន្ត្រីពាក់ព័ន្ឋនិងថ្នាក់ដឹកនាំសភាពាណិជ្ជកម្មនៃប្រទេសទាំងពីរផងដែរ៕
