ដោយៈ គង់ ហ្វីអួណា
ភ្នំពេញៈ កម្ពុជា អាមេរិកបានឈានទៅមុខមួយជំហ៊ានទៀត ដែលកាលពីថ្ងៃចន្ទ ក្រុមប្រឹក្សាអភិវឌ្ឍន៍កម្ពុជា និងស្ថានទូតសហរដ្ឋអាមេរិកប្រចាំកម្ពុជា បានពិភាក្សាគ្នាអំពីវិធីបង្កើតយន្តការរួមមួយ ដែលអាចឲ្យកម្ពុជាដោះស្រាយកង្វល់របស់អ្នកវិនិយោគអាមេរិក។
ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោកស៊ុន ចាន់ថុល បានទទួលជួបសម្តែងការគួរសមពីលោក Andrew Herrup ភារធារីនៃស្ថានទូតអាមេរិកប្រចាំកម្ពុជា និងបានពិភាក្សាអំពីបញ្ហាពាណិជ្ជកម្ម និងការវិនិយោគ។
-->
យោងតាមការចេញផ្សាយ របស់ក្រុមប្រឹក្សាអភិវឌ្ឍន៍កម្ពុជា ជំនួបនេះត្រូវបានរៀបចំឡើង ដើម្បីពង្រឹងកិច្ចសហប្រតិបត្តិការសេដ្ឋកិច្ច និងវិនិយោគរវាងកម្ពុជា និងសហរដ្ឋអាមេរិក។
ក្នុងជំនួបនោះ លោក Andrew Herrup បានបញ្ជាក់សារជាថ្មីនូវការតាំងចិត្តរបស់សហរដ្ឋអាមេរិក ក្នុងការជំរុញទំនាក់ទំនងទ្វេរភាគី លំហូរពាណិជ្ជកម្ម និងការវិនិយោគរវាងប្រទេសទាំងពីរ ដើម្បីផលប្រយោជន៍រួម។ ជាមួយគ្នានេះ លោកក៏មានបំណងធ្វើការយ៉ាងជិតស្និទ្ធ ជាមួយរាជរដ្ឋាភិបាលកម្ពុជា ដើម្បីដោះស្រាយកង្វល់របស់អ្នកវិនិយោគ បង្កើតបរិយាកាសវិនិយោគអំណោយផល ដើម្បីទាក់ទាញពាណិជ្ជករអាមេរិកអោយបានកាន់តែច្រើន។
ឆ្លៀតក្នុងឱកាសនេះ លោកបានសម្តែងនូវចំណាប់អារម្មណ៍ជាវិជ្ជមាន ចំពោះលទ្ធផលនៃដំណើរទស្សនកិច្ចរបស់លោក ស៊ុន ចាន់ថុល ទៅកាន់សហភាពអ៊ឺរ៉ុប ក្នុងគោលដៅទាក់ទាញការវិនិយោគបន្ថែមទៀតផងដែរ ជាពិសេសនៅប្រទេសអេស្ប៉ាញ និងអាល្លឺម៉ង់ ចាប់ពីថ្ងៃទី ៩-១៨ ខែមិថុនា។
លោក ស៊ុន ចាន់ថុល បានជម្រាបជូនអំពីលទ្ធផលប្រកបដោយផ្លែផ្កា ពីបេសកកម្មគោះទ្វារវិនិយោគ នៅសហភាពអ៊ឺរ៉ុបកាលពីសប្តាហ៍មុន។
លោកក៏បានជម្រាបជូន ពីលទ្ធភាពនៃការធ្វើការរួមគ្នារវាងក្រុមប្រឹក្សាអភិវឌ្ឍន៍កម្ពុជា និងស្ថានទូតអាមេរិក ដើម្បីសម្របសម្រួលរៀបចំព្រឹត្តិការណ៍ ជំរុញវិនិយោគនៅសហរដ្ឋអាមេរិក តាមរយៈការរៀបចំជាវេទិការធុរកិច្ច និងការគោះទ្វារវិនិយោគ តាមក្រុមហ៊ុនដែលមានបំណងពង្រីក ខ្សែច្រវាក់ផលិតនិងផ្គត់ផ្គង់ក្នុងតំបន់ ដើម្បីបញ្ជ្រាបព័ត៌មានវិនិយោគ និងកញ្ចប់លើកទឹកចិត្តនានា ជូនដល់ធុរជនអាមេរិក។
បន្ថែមពីលើកិច្ចខិតខំប្រឹងប្រែង ពន្យល់អំពីច្បាប់ និងបទប្បញ្ញត្តិពាក់ព័ន្ធនឹងការវិនិយោគ លោកក៏បានជម្រាបជូនលោក Andrew Herrup ពីលទ្ធភាពធ្វើការរួមគ្នា ដើម្បីដោះស្រាយកង្វល់របស់វិនិយោគិន អាមេរិកនៅកម្ពុជា តាមរយៈការរៀបចំនូវយន្តការរួម សម្រាប់កិច្ចសន្ទនាជាប្រចាំ លើកិច្ចការងារវិនិយោគ ដើម្បីអាចឱ្យកម្ពុជាមានលទ្ធភាព សម្របសម្រួលដោះស្រាយបញ្ហានានា របស់វិនិយោគិនអាមេរិក បានកាន់តែឆាប់រហ័ស៕
