ដោយៈ គង់ ហ្វីអូណា
ភ្នំពេញៈ មន្ត្រីជាន់ខ្ពស់រាជរដ្ឋាភិបាលកម្ពុជា និងគណៈប្រតិភូនៃស្ថានទូតសាធារណរដ្ឋកូរ៉េ ប្រចាំកម្ពុជាបានជួបពិភាក្សាគ្នាអំពីលទ្ធភាព នៃការបង្កើតតំបន់សេដ្ឋកិច្ចពិសេសកម្ពុជា-កូរ៉េ។
គម្រោងនេះត្រូវបានផ្តួចផ្តើមឡើង ដោយសម្តេចធិបតីហ៊ុន ម៉ាណែត នាយករដ្ឋមន្រ្តីកម្ពុជា និងលោក YOON SUK YEOL ប្រធានាធិបតីកូរ៉េ ក្នុងដំណើរបំពេញទស្សនកិច្ចផ្លូវការ លើកដំបូងរបស់លោក ទៅកាន់ទីក្រុងសេអ៊ូល ចាប់ពីថ្ងៃទី ១៥ ដល់ ១៨ ឧសភា ឆ្នាំកន្លងមកនេះ។
-->
កាលពីថ្ងៃទី២០ ខែមិថុនា លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានទទួលជួបលោក PARK JUNG-WOOK ឯកអគ្គរដ្ឋទូតកូរ៉េប្រចាំកម្ពុជា នៅរាជធានីភ្នំពេញ ដើម្បីពិភាក្សាពិនិត្យលទ្ធភាពបង្កើតតំបន់សេដ្ឋកិច្ចពិសេសកម្ពុជា-កូរ៉េ។
កិច្ចប្រជុំនេះមានគោលបំណង ផ្តល់ព័ត៌មានអំពីអត្ថប្រយោជន៍សក្តានុពល នៃគម្រោងវិនិយោគ នៅក្នុងតំបន់សេដ្ឋកិច្ចពិសេសរបស់កម្ពុជា រួមជាមួយនឹងការខិតខំប្រឹងប្រែងរបស់រាជរដ្ឋាភិបាល ក្នុងការលើកទឹកចិត្ត និងសម្រួលដល់ប្រតិបត្តិការអាជីវកម្មក្នុងតំបន់។
ក្នុងកិច្ចពិភាក្សានោះ លោក ស៊ុន ចាន់ថុល បានជម្រាបជូនអំពីការត្រៀមខ្លួនរបស់កម្ពុជា ក្នុងការសម្របសម្រួលរាល់កិច្ចការងារវិនិយោគ របស់វិនិយោគិនក្នុងស្រុក និងក្រៅប្រទេស។
លោកក៏បានស្នើសុំឱ្យលោកឯកអគ្គរដ្ឋទូត សហការស្វែងរកវិនិយោគិន មានសក្ដានុពលពីប្រទេសកូរ៉េ ដែលមានបំណងដាក់ទុនវិនិយោគ លើការរៀបចំបង្កើត តំបន់សេដ្ឋកិច្ចពិសេសកម្ពុជា-កូរ៉េ ដើម្បីអនុញ្ញាតឱ្យគណៈប្រតិភូកម្ពុជា អញ្ជើញទៅប្រទេសកូរ៉េ ដើម្បីគោះទ្វារផ្ដល់ព័ត៌មានគ្រប់ជ្រុងជ្រោយ និងការគាំទ្រពេញទំហឹង របស់រាជរដ្ឋាភិបាលកម្ពុជា ជូនដល់វិនិយោគិនកូរ៉េ។
លោក ហែម វ៉ណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក កែវ រតនៈ រដ្ឋមន្ត្រីក្រសួងរ៉ែ និងថាមពល លោក ជា វុទ្ធី អគ្គលេខាធិការគណៈកម្មការ វិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា និងលោក យុន ហេង អគ្គលេខាធិការរងគណៈកម្មការ វិនិយោគកម្ពុជាក៏មានវត្តមាននៅក្នុងជំនួបពិភាក្សានោះផងដែរ។
យោងតាមសេចក្តីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជា ស្របតាមលទ្ធផលនៃដំណើរទស្សនកិច្ច ផ្លូវការនាសាធារណរដ្ឋកូរ៉េ កាលពីថ្ងៃទី១៦ ខែឧសភា ឆ្នាំ២០២៤ របស់លោក ហ៊ុន ម៉ាណែត នាយករដ្ឋមន្រ្តីក្នុងជំនួបជាមួយ លោកYoon Suk Yeolប្រធានាធិបតី នៃសាធារណរដ្ឋកូរ៉េ ថ្នាក់ដឹកនាំទាំងពីរបានផ្តួចផ្តើម ឱ្យមានការបង្កើតតំបន់សេដ្ឋកិច្ចពិសេសកម្ពុជា-កូរ៉េ ដើម្បីបង្កើតបរិយាកាសអំណោយផល សម្រាប់ការវិនិយោគរបស់ក្រុមហ៊ុនកូរ៉េ ដែលធ្វើអាជីវកម្មរបស់ខ្លួននៅកម្ពុជា។
កាលពីថ្ងៃទី១៦ ខែឧសភា ថ្នាក់ដឹកនាំទាំងពីរបានធ្វើជាអធិបតីក្នុងពិធីចុះហត្ថលេខា លើអនុស្សរណៈនៃការយោគយល់គ្នាចំនួន៤ និងកិច្ចព្រមព្រៀងចំនួនពីរ ក្នុងគោលបំណងពង្រីកកិច្ចសហប្រតិបត្តិការពហុភាគី ក្នុងការអភិវឌ្ឍន៍ហិរញ្ញវត្ថុ លំហូរវិនិយោគ កម្មសិទ្ធិបញ្ញា ការគ្រប់គ្រងគ្រឿងញៀន ការបណ្តុះបណ្តាលវិជ្ជាជីវៈ និងសម្បទានកម្ចីសម្រាប់អភិវឌ្ឍន៍ជនបទ។
ទន្ទឹមនឹងនេះ ក៏មានអនុស្សរណៈយោគយល់គ្នាមួយ ត្រូវបានចុះហត្ថលេខា រវាងក្រុមប្រឹក្សាអភិវឌ្ឍន៍កម្ពុជា និងក្រសួងពាណិជ្ជកម្ម ឧស្សាហកម្ម និងថាមពលនៃសាធារណរដ្ឋកូរ៉េដើម្បីពង្រឹងលំហូរវិនិយោគរវាងប្រទេសទាំងពីរ។
ក្នុងវេទិកាធុរកិច្ចកម្ពុជា-កូរ៉េ ដែលបានធ្វើឡើងនៅថ្ងៃដដែលនោះ សម្តេចធិបតីហ៊ុន ម៉ាណែត បានប្រកាសថា ទំហំពាណិជ្ជកម្មទ្វេភាគីរវាងកូរ៉េ និងកម្ពុជា មានរហូតដល់៧៥១ លានដុល្លារ ខណៈការវិនិយោគផ្ទាល់ពីកូរ៉េនៅកម្ពុជា មានចំនួន៣០លានដុល្លារកាលពីឆ្នាំមុន ដែលធ្វើអោយការវិនិយោគផ្ទាល់សរុបពីប្រទេសមាន៥ពាន់លានដុល្លារ។
គិតត្រឹមខែឧសភាឆ្នាំនេះ ក្រុមប្រឹក្សាអភិវឌ្ឍន៍កម្ពុជាបានអនុម័ត គម្រោងតំបន់សេដ្ឋកិច្ចពិសេសចំនួន៤៤ ដែលក្នុងនោះតំបន់សេដ្ឋកិច្ចពិសេសចំនួន២៦ កំពុងដំណើរការនៅទូទាំងប្រទេស ដោយមានរដ្ឋបាលចំនួន២០ក្នុងបន្ទុក ដែលធ្វើអោយថវិកាអភិវឌ្ឍន៍ តំបន់សេដ្ឋកិច្ចពិសេសឈានដល់ទំហំទឹកប្រាក់៦,២ពាន់លានដុល្លារ។
ប្រភពដដែលបានបន្ថែមថា មានគម្រោងចំនួន៧៣៤នៅក្នុងតំបន់សេដ្ឋកិច្ចពិសេសទាំងអស់ ក្នុងប្រទេសកម្ពុជា ដែលមានទុនវិនិយោគចំនួន៨,៩ពាន់លានដុល្លារអាមេរិក បង្កើតការងារជូនប្រជាពលរដ្ឋចំនួន១៨០.៧៧៩ នាក់ នៅទូទាំងប្រាំតំបន់ដូចជា រាជធានីភ្នំពេញ ខេត្តកណ្តាល ស្វាយរៀង ព្រះសីហនុ កោះកុង និងខេត្តបន្ទាយមានជ័យ (ក្រុងប៉ោយប៉ែត)៕
