ដោយ: គង់ លាងហួរ
បាងកក: លោក Prasert Taedullayasit ប្រធានសមាគមខុនដូថៃ បានអះអាងថា វិស័យអចលនទ្រព្យថៃ កំពុងប្រឈមមុខនឹងបញ្ហាជាច្រើន ដែលនាំឱ្យអ្នកអភិវឌ្ឍន៍ពិបាកសម្រេចគោលដៅលក់នៅឆ្នាំនេះ ដោយសារការធ្លាក់ចុះនៃតម្រូវការ និងអំណាចនៃការទិញ។
លោកបានប្រដូចស្ថានភាពនេះ ទៅនឹងវិបត្តិហិរញ្ញវត្ថុនៅតំបន់អាស៊ីក្នុងឆ្នាំ១៩៩៧ ដែលវិបត្តិនេះបានជះផលប៉ះពាល់ទៅលើតម្លៃអចលនទ្រព្យ ដោយសារបណ្តាស្ថាប័នហិរញ្ញវត្ថុ និងក្រុមហ៊ុនគ្រប់គ្រងទ្រព្យសកម្ម បានសម្រុកលក់អចលនទ្រព្យ ក្នុងតម្លៃថោកជាងតម្លៃដែលបានប្រកាសលើកដំបូង។
លោកបានបន្តថា “ការដាំក្បាលចុះនៃប្រាក់បាត គឺជាហេតុផល នៅពីក្រោយការធ្លាក់ចុះនៃតម្លៃអចលនទ្រព្យ ក្នុងអំឡុងវិបត្តិហិរញ្ញវត្ថុនៅតំបន់អាស៊ី ដែលបង្កឱ្យបន្ទុកបំណុលក្នុងចំណោមសហគ្រិនអាជីវកម្ម និងធនាគារមានការកើនឡើង”។
លោកបានបន្ថែមថា “ស្ថាប័នហិរញ្ញវត្ថុចំនួន៥៦ បានបិទទ្វារ ដែលការណ៍នេះបានជះឥទ្ធិពលយ៉ាងធ្ងន់ធ្ងរ លើការវិនិ យោគក្នុងគម្រោងផ្សេងៗ ហើយបណ្តាសហគ្រិន ដែលខ្ចីប្រាក់កម្ចីក្នុងទម្រង់ជារូបិយប័ណ្ណបរទេស បានរងផលប៉ះពាល់ខ្លាំងជាងគេបំផុត”។
ទោះជាយ៉ាងណាក្តី លោក Prasert បានចាត់ទុកថា វិបត្តិសេដ្ឋកិច្ចនៅឆ្នាំនេះ មានភាពខុសប្លែកគ្នា ដោយសារប្រជាជនបានរងគ្រោះ ព្រោះបំណុលក្រៅផ្លូវការ និងការកើនឡើងនៃថ្លៃចំណាយលើការរស់នៅ ដែលបណ្តាលឱ្យតម្រូវការអចលនទ្រព្យធ្លាក់ចុះ។
លោកបានកត់សម្គាល់ទៀតថា “ការដំឡើងអត្រាការប្រាក់ ក៏បានធ្វើឱ្យថ្លៃចំណាយ លើកម្ចីសម្រាប់ការបង់រំលស់ទិញផ្ទះ មានកម្រិតខ្ពស់ជាងមុន”។
ចំណែក អត្រាដែលធនាគារបដិសេធ មិនផ្តល់ប្រាក់កម្ចីទិញផ្ទះទៅឱ្យអតិថិជន នាពេលបច្ចុប្បន្នកំពុងស្ថិតក្នុងរង្វង់៧០% ដោយសារតែការកើនឡើង នៃតម្លៃសំណង់ ដូចជាដីធ្លី សម្ភារៈ និងប្រាក់ឈ្នួលរបស់កម្មករ។
លោកបានបន្ថែមថា “វិបត្តិនាពេលនេះ ពិបាកដោះស្រាយជាងវិបត្តិកាលពីឆ្នាំ១៩៩៧ទៅទៀត ព្រោះវិបត្តិនេះកំពុងជះផលប៉ះពាល់ដល់សេដ្ឋកិច្ច នៅទូទាំងពិភពលោក មិនមែនតែប្រទេសថៃនោះទេ”៕ប្រភព: The Nation៕
