ដោយ គង់ សូរិយា
ភ្នំពេញ៖ សមាគមទីភ្នាក់ងារទេសចរណ៍កម្ពុជា (CATA) បានជំរុញឱ្យមានជើងហោះហើរត្រង់ពីប្រទេសឥណ្ឌាមកកាន់កម្ពុជា ដើម្បីលើកកម្ពស់វិស័យទេសចរណ៍និងពាណិជ្ជកម្មរវាងប្រទេសទាំងពីរ។
លោកស្រី ឆាយ ស៊ីវលីន ប្រធានសមាគមនេះ បានមានប្រសាសន៍ឱ្យដឹងតាមទូរស័ព្ទនាព្រឹកថ្ងៃទី២១ មិនានេះថា ឥណ្ឌាមានភ្ញៀវទេសចរណ៍ច្រើន ជាជាភ្ញៀវដែលចំណាយប្រាក់ច្រើននៅតាមបណ្តាប្រទេសនានា ប៉ុន្តែកម្ពុជាទាក់ទាញភ្ញៀវទេសចរណ៍ឥណ្ឌាបានក្នុងកម្រិតទាបនៅឡើយ ដោយសារកម្ពុជា និងឥណ្ឌាមិនទាន់មានការភ្ជាប់ជើងហោះហើរច្រើន ហេតុនេះទើបសមាគមចង់ឱ្យមានការហោះហើរត្រង់រវាងប្រទេសទាំងពីរ។
-->
លោកស្រីបន្តថា “ទោះជាយ៉ាងណាសេវាបដិសណ្ឋារកិច្ច សម្រាប់ភ្ញៀវឥណ្ឌានៅមានកម្រិតនៅកម្ពុជា ដោយយើងមិនទាន់មានភោជនីយដ្ឋានឥណ្ឌា ច្រើននៅឡើយទេ ហេតុនេះនៅពេលមានភ្ញៀវក្រុមធំៗមកដល់ យើងជួបការលំបាក” ។
លោកស្រីបន្តថា “កាលពីថ្ងៃម្សិលម៉ិញ CATA បានចុះកិច្ចព្រមព្រៀងជាមួយក្រុមហ៊ុនឥណ្ឌាធំមួយ គឺ SRAM & MRAM ដើម្បីបង្កើនកិច្ចសហការ ក្នុងការផ្សព្វផ្សាយសក្តានុពលទេសចរណ៍រវាងប្រទេសទាំងពីរ”។
លោកស្រី ឆាយ ស៊ីវលីន បានបន្តថា ការចុះហត្ថលេខានេះ យើងក៏ចង់ជំរុញឱ្យឥណ្ឌាជួយផ្សព្វផ្សាយ ក៏ដូចជាជួយសម្រួលដល់ការផ្សព្វផ្សាយ សក្តានុពលទេសចរណ៍របស់ CATA ដោយឱ្យពួកគេជួយសម្រួលតម្លៃនៃការស្នាក់នៅ និងសេវាកម្មនានាផងដែរ។
កាលពីឆ្នាំមុនសម្តេចតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ដែលបានអញ្ជើញទៅបំពេញទស្សនកិច្ចនៅប្រទេសឥណ្ឌា ក៏បានស្នើនិងជំរុញឱ្យមានការតភ្ជាប់ជើងហោះហើររវាងឥណ្ឌាមកកាន់កម្ពុជាផងដែរ ប៉ុន្តែរហូតមកទល់ពេលនេះមិនទាន់មានដំណឹងពីក្រុមហ៊ុនអាកាសចរណ៍ឥណ្ឌាណាមួយ មកសិក្សាលទ្ឋភាពហោះហើរត្រង់មកកម្ពុជានៅឡើយទេ៕
