ដោយ: គង់ លាងហួរ
អន្តរជាតិ: កន្លងមក ក្រុមហ៊ុន Apple បានពឹងផ្អែកលើប្រទេសចិន ក្នុងការផលិតទូរស័ព្ទiPhone ស៊េរីទំនើបរបស់ខ្លួន។
ប៉ុន្តែថ្មីៗនេះ ក្រុមហ៊ុនបច្ចេកវិទ្យាយក្សមួយនេះ បានព្យាយាមធ្វើពិពិធកម្ម មូលដ្ឋានផលិតកម្មរបស់ខ្លួន ដោយផ្តោតលើប្រទេសឥណ្ឌា និងប្រទេសដទៃទៀត។
មុនពេលការចេញលក់ទូរស័ព្ទស៊េរី iPhone 16 លោក Tim Cook នាយកប្រតិបត្តិក្រុមហ៊ុន Apple បានបង្ហោះវីដេអូមួយ ដើម្បីពន្យល់ពីមូលហេតុជំរុញឱ្យApple សម្រេចចិត្តផលិតទូរស័ព្ទស៊េរី iPhone នៅក្នុងប្រទេសចិន អស់រយៈពេលជាច្រើនឆ្នាំកន្លងមក។
លោក Cook អះអាងថា តម្លៃពលកម្មថោក ពុំមែនជាហេតុផលនាំ ឱ្យក្រុមហ៊ុនផលិតទូរស័ព្ទស៊េរី iPhone នៅក្នុងប្រទេសចិននោះទេ។
ជាក់ស្ដែង កន្លងទៅ មនុស្សជាច្រើនគិតថា ក្រុមហ៊ុន Apple ឈានជើងចូលទៅកាន់ប្រទេសចិន ដោយសារតែតម្លៃពលកម្មទាប។
ប៉ុន្តែលោក Tim Cook បានលើកឡើងថា “ការពិតប្រទេសចិន បានបោះបង់ឋានៈជាប្រទេស មានតម្លៃពលកម្មទាបជាច្រើនឆ្នាំមកហើយ”។
ផ្ទុយទៅវិញ លោកបញ្ជាក់ថា “កត្ដាជំនាញនៅក្នុងទីតាំងមូលដ្ឋានផលិតកម្ម និងប្រភេទកំលាំងពលកម្មជំនាញ ជាដើមហេតុធ្វើឱ្យយើងផលិតទូរស័ព្ទ iPhone នៅចិន ព្រោះចិនមានជំនាញផ្នែកឧបករណ៍ ជំនាញវិជ្ជាជីវៈជ្រៅណាស់”។
ក្នុងការឆ្លើយតប ទៅនឹងវីដេអូរបស់លោក Tim Cook ដែលបានបង្ហោះ នៅលើបណ្តាញសង្គម X លោកមហាសេដ្ឋី Elon Musk ម្ចាស់ក្រុមហ៊ុនយក្ស Tesla បានអះអាងថា “នេះជាការពិត!”។
យោងតាមការចេញផ្សាយ នាពេលថ្មីៗពីសារពត៌មាន Bloomberg បានបង្ហាញថា ក្រុមហ៊ុន Apple អាចនឹងចាប់ផ្តើមផលិតទូរស័ព្ទ iPhone 16 Pro និងទូរស័ព្ទ iPhone 16 Pro Max នៅក្នុងប្រទេសឥណ្ឌានៅចុងឆ្នាំនេះ។
ការដំឡើងរោងចក្រខាងលើ អាចនាំឱ្យមានការបញ្ចុះតម្លៃចំនួន១០% លើការចេញលក់ទូរស័ព្ទ iPhone 16 Pro ថ្មីនៅឥណ្ឌា។ ទន្ទឹមនឹងនេះ រដ្ឋាភិបាលទីក្រុងញូវដែលី ក៏បានកាត់បន្ថយពន្ធគយ លើទូរស័ព្ទចល័ត ដើម្បីលើកទឹកចិត្តឱ្យក្រុមហ៊ុន Apple បញ្ចុះតម្លៃបន្ថែមទៀត៕ប្រភព: Mint៕
