ដោយៈ គង់ សូរិយា
ភ្នំពេញៈ លោកឧកញ៉ាចេង ខេងសមាជិកក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងថា ទីផ្សារអចលនវត្ថុ កំពុងមានសភាពប្រសើរបណ្តើរៗ ប៉ុន្តែការលុបបំបាត់ អ្នកផ្តល់សេវាកម្មគ្មានអាជ្ញាប័ណ្ណមានសារៈសំខាន់ណាស់ ដើម្បីផ្តល់បរិយាកាសទីផ្សារកាន់តែប្រសើរ។
លោកឧកញ៉ាបានមានប្រសាសន៍ ឲ្យដឹងកាលពីចុងសប្តាហ៍មុនថា ទីផ្សារកំពុងមានសញ្ញាកំរើកឡើងវិញបណ្តើរ ប៉ុន្តែចំនួនភ្នាក់ងារ និងក្រុមហ៊ុនគ្មានអាជ្ញាប័ណ្ណ មានចំនួនច្រើន ដែលពួកគេអាចធ្វើឲ្យ មានការបាត់បង់ទំនុកចិត្តក្នុងទីផ្សារនេះ។
លោកឧកញ៉ាចេង ខេងបានបន្តថា “ហេតុនេះការលុបបំបាត់អ្នកផ្តល់សេវាកម្មមិនស្របច្បាប់ ពិតជាមានសារៈសំខាន់ក្នុងការកសាងទំនុកចិត្តក្នុងទីផ្សារ”។
លោកបន្តថា ក្រុមហ៊ុនភ្នាក់ងារអចលនវត្ថុស្របច្បាប់បានធ្វើការងារជាច្រើន និងធ្វើរាប់ឆ្នាំមកហើយ ដើម្បីកសាងបរិយាកាសនិងទំនុកចិត្តទីផ្សារឲ្យមានភាពរ៉ឹងមាំ ប៉ុន្តែការមានក្រុមហ៊ុនឬភ្នាក់ងារមិនស្របច្បាប់២ទៅ៣ បោកប្រាស់អតិថិជន នឹងធ្វើឲ្យគេខ្លាចរអា និងធ្វើឲ្យខូចទីផ្សារ និងមុខមាត់ប្រទេសទាំងមូលផងដែរ៕
