ដោយ: គង់ លាងហួរ
អន្តរជាតិ: រមណីយដ្ឋាន“Marina Bay Sand”របស់ប្រទេសសិង្ហបុរី ដែលមានប៉មចំនួន៣ កំពស់២០៣ម៉ែត្រ និងតភ្ជាប់គ្នាដោយស្ពានអាកាស (Skybridge) បានធ្វើឱ្យប្រទេសនេះក្លាយទៅជាគោលដៅទេសចរណ៍លេចធ្លោនៅក្នុងតំបន់អាសុី បន្ទាប់ពីបានបើកដំណើរការកាលពីឆ្នាំ២០១១។
អ្នកអភិវឌ្ឍន៍បានបើកការដ្ឋានសាងសង់ពង្រីករមណីយដ្ឋាន Marina Bay Sands ក្រោមទំហំទុនវិនិយោគចំនួន៨ពាន់លានដុល្លារអាមេរិក ដែលសរបង្ហាញពីភាពជោគជ័យផ្នែកពាណិជ្ជកម្មរបស់ខ្លួន។នេះបើយោងតាមការចុះផ្សាយដោយកាសែត CNN។
ពិធីបើកការដ្ឋានពង្រីករមណីយដ្ឋានខាងលើនេះបានរៀបចំឡើងកាលពីថ្ងៃទី១៥ ខែកក្កដា ក្រោមវត្តមានរបស់លោកនាយករដ្ឋមន្ត្រីសិង្ហបុរី Lawrence Wong រួមជាមួយលោក Moshe Safdie ស្ថាបនិកក្រុមហ៊ុនស្ថាបត្យកម្ម Safdie Architects។
រមណីយដ្ឋាននេះរួមមាន សណ្ឋាគារ ផ្សារទំនើប មជ្ឈមណ្ឌលសន្និបាត និងកាស៊ីណូ ដោយបានទាក់ទាញអ្នកទស្សនាចំនួន៣៨លាននាក់កាលពីឆ្នាំមុន។នេះបើយោងតាមក្រុមហ៊ុនអភិវឌ្ឍន៍ Las Vegas Sands ។
ទន្ទឹមនឹងនោះ ក្រុមហ៊ុនផ្នែកស្ថាបត្យកម្ម
Safdie Architects បានរចនាអគារទី៤ ថ្មីមួយទៀត ដែលនឹងផ្គត់ផ្គង់បន្ទប់សណ្ឋាគារប្រណីតចំនួន៥៧០បន្ទប់ ហាងលក់រាយ និងសាលប្រជុំ។លើសពីនេះ មជ្ឈមណ្ឌលកម្សាន្តថ្មីនឹងត្រូវបានរចនាឡើងសម្រាប់ផ្ទុកអ្នកទស្សនាចំនួន១៥.០០០នាក់។
ការសាងសង់អគារទី៤ ថ្មីនឹងយកលំនាំតាមម៉ូដរចនាដើម ដែលដំបូលអគារមានរូបរាងដូចជាទូក ឬហៅថា “Skyloop”ព្រមទាំងមានកន្លែងសង្កេតការណ៍(Observation Deck) ភោជនីយដ្ឋាន សួនច្បារសាធារណៈ និងអាងហែលទឹក៕ប្រភព: CNN៕
 បានធ្វើឱ្យប្រទេសនេះក្លាយទៅជាគោលដៅទេសចរណ៍លេចធ្លោនៅក្នុងតំបន់អាសុី បន្ទាប់ពីបានបើកដំណើរការកាលពីឆ្នាំ២០១១។){kind=link}