ដោយៈ ម៉ាណា
ភ្នំពេញៈ ក្រសួងទេសចរណ៍បានឲ្យដឹងថា កម្ពុជាបានទាក់ទាញភ្ញៀវទេសចរអន្តរជាតិសរុបចំនួន ៣.៣៦ លាននាក់នៅក្នុងឆមាសទី១នៃឆ្នាំ២០២៥ កើនឡើង៦.២ភាគរយ ធៀបរយៈពេលដូចគ្នាកាលពីឆ្នាំមុន។
របាយការណ៍ដដែលបានបន្តថា ប្រទេសថៃបានឈរនៅកំពូលតារាង ក្នុងចំណោមភ្ញៀវទេសចរអន្តរជាតិមកកម្ពុជា ក្នុងអំឡុងខែមករាដល់ខែមិថុនាឆ្នាំនេះ បន្ទាប់មកគឺប្រទេសវៀតណាម និងចិន។
របាយការណ៍បានបន្ថែមទៀតថា ជនជាតិថៃប្រមាណ ៩២៨.០២៧នាក់ និងវៀតណាម៦១៩.៣០០ នាក់បានធ្វើដំណើរមកកម្ពុជា ធ្លាក់ចុះ២.៨ភាគរយ និង៣.២ ភាគរយរៀងគ្នា ដោយបន្ថែមថា ជនជាតិចិន៥៨៦.៧៧១នាក់ បានមកកម្សាន្តកម្ពុជាកើនឡើង ៥០.៧ ភាគរយ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានមានប្រសាសន៍ថា ដោយសារការកើនឡើង៦.២ ភាគរយនៃភ្ញៀវអន្តរជាតិ នៅក្នុងឆមាសទី១នៃឆ្នាំនេះ លោកមានសុទិដ្ឋិនិយម ចំពោះការបន្តមានកំណើន នៅក្នុងពាក់កណ្តាលចុងក្រោយនៃឆ្នាំ២០២៥។
លោកបានប្រាប់សារព័ត៌មានXinhua ថា “ការកែលម្អហេដ្ឋារចនាសម្ព័ន្ធ ដែលកំពុងបន្ត កិច្ចខិតខំប្រឹងប្រែងទីផ្សារ និងការស្ដារឡើងវិញនូវទំនុកចិត្ត នៃការធ្វើដំណើរជាសកល ទំនងជាអាចទ្រទ្រង់ និងបង្កើនល្បឿននៃនិន្នាកំណើននេះ”។
លោកបានមានប្រសាសន៍ថា លើសពីនេះ បេតិកភណ្ឌវប្បធម៌ និងតំបន់ទេសចរណ៍ធម្មជាតិ ដ៏សម្បូរបែបរបស់កម្ពុជា នៅតែទាក់ទាញភ្ញៀវទេសចរអន្តរជាតិយ៉ាងខ្លាំងក្លា។ ទោះជាយ៉ាងណាក៏ដោយ បញ្ហាប្រឈម ដូចជា ការអភិវឌ្ឍន៍ភូមិសាស្ត្រនយោបាយ ឬការប្រែប្រួលសេដ្ឋកិច្ចសកល អាចជះឥទ្ធិពលដល់កំណើន ដូច្នេះការតាមដាន និងយុទ្ធសាស្ត្របន្សាំនឹងបន្តមានសារៈសំខាន់។
វិស័យទេសចរណ៍គឺជាសសរស្តម្ភមួយ ក្នុងចំណោមសសរស្តម្ភទាំងបួន ដែលជួយដល់សេដ្ឋកិច្ចរបស់កម្ពុជា រួមជាមួយនឹងការនាំចេញសម្លៀកបំពាក់ ស្បែកជើង ផលិតផលធ្វើដំណើរ ទំនិញកសិកម្ម សំណង់ និងអចលនទ្រព្យ។ ប្រភពXinhua។
