ដោយៈ គង់ សូរិយា
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានឲ្យដឹងកាលពីថ្ងៃសុក្រថា ចំនួនសហគមន៍កសិកម្មទំនើប ត្រូវបានគេរំពឹងថានឹងកើនឡើងដល់៣០ទីតាំង នៅចុងឆ្នាំ២០២៥។
បើគិតរហូតមកដល់ពេលនេះ មានសហគមន៍កសិកម្មចំនួន២២ ដែលមានចំនួនជាង៣០០០គ្រួសារ។
អនុរដ្ឋលេខាធិការ និងជាអ្នកនាំពាក្យក្រសួងកសិកម្ម លោក ឃឹម ហ្វីណង់ បានមានប្រសាសន៍ឲ្យដឹងថា កម្ពុជាគ្រោងនឹងរៀបចំ “វេទិកា និងពិព័រណ៍កសិកម្មកម្ពុជា២០២៥-CAFE25”។
លោកបានបន្តថា បើនិយាយពីសមាជិកភាព បច្ចុប្បន្ននេះមានគ្រួសារជាង៣០០០ ដែលចូលរួមក្នុងសហគមន៍កសិកម្មទំនើប ដែលគ្របដណ្តប់លើផ្ទៃដីសរុបជាង២០,០០០ហិកតា”។លោកបន្ថែមថា “បច្ចុប្បន្ននេះ ក្រសួងកំពុងផ្តោតលើដំណាំសំខាន់ៗចំនួនបួនគឺ ស្រូវ បន្លែ ម្រេច និងស្វាយចន្ទី”។
លោកឃឹម ហ្វីណង់បានបន្ថែមថា កសិករទទួលបានអត្ថប្រយោជន៍យ៉ាងច្រើន ពីការចូលរួមនៅក្នុងសហគមន៍ទាំងនេះ ដោយទទួលបានទម្រង់ជាច្រើននៃការគាំទ្រ រួមទាំងជំនួយបច្ចេកទេស លទ្ធភាពទទួលបានដើមទុន និងឱកាសទីផ្សារ។
លោកបញ្ជាក់ថា ជំនួយបច្ចេកទេស ផ្តល់ដោយមន្ត្រីកសិកម្មឃុំ ដែលជាអ្នកបច្ចេកទេសមកពីក្រសួង ហើយកំពុងបង្កើនការយកចិត្តទុកដាក់ក្នុងការពង្រឹងសហគមន៍កសិកម្មទំនើប។
លោកបញ្ជាក់បន្ថែមថា អត្ថប្រយោជន៍សំខាន់មួយទៀត នៃសហគមន៍កសិកម្មទំនើប គឺសមត្ថភាពរបស់ពួកគេ ក្នុងការជួយកសិករកាត់បន្ថយថ្លៃដើមផលិតកម្ម។
លោកបង្ហើបឲ្យដឹងថា ក្នុងសប្តាហ៍នេះ ក្រសួងកសិកម្មនឹងចុះហត្ថលេខា លើកិច្ចព្រមព្រៀងទិញ លក់ ជាមួយក្រុមហ៊ុន វីរៈ ប៊ុនថាំ។ ក្រុមហ៊ុន គ្រោងនឹងទិញអង្ករប្រមាណ២ម៉ឺនតោន ដោយផ្ទាល់ពីសហគមន៍ផលិតស្រូវទំនើបចំនួន៦ ដែលចំនួន៥ ស្ថិតនៅក្នុងខេត្តបាត់ដំបង និងខេត្តបន្ទាយមានជ័យ។
លោកបានបន្តថា “ផែនការគឺចុះកិច្ចសន្យាទិញផ្ទាល់ជាមួយសហគមន៍ទំនើបទាំងនេះ ក្នុងតម្លៃដែលបានព្រមព្រៀងគ្នាពី៩៥០ រៀលដល់ ១០០០ រៀលក្នុងមួយគីឡូក្រាមសម្រាប់អង្ករស្រងែ”។
លោកបានបន្ថែមថា កិច្ចសន្យានេះនឹងចូលជាធរមាននៅខែធ្នូ។ វាបង្ហាញយ៉ាងច្បាស់ថា សមាជិកនៃសហគមន៍កសិកម្មទំនើប ទទួលបានអត្ថប្រយោជន៍ពីការចូលទីផ្សារ ដែលមានការធានាជាមុន និងទទួលបានតម្លៃខ្ពស់ជាងអត្រាទីផ្សារបច្ចុប្បន្ន។
សម្តេចធិបតីហ៊ុន ម៉ាណែតនាយករដ្ឋមន្ត្រីកម្ពុជាបានមានប្រសាសន៍ក្នុងសមាជរដ្ឋសភា-ព្រឹទ្ធសភា លើកដំបូងកាលពីខែមិថុនាថា រដ្ឋាភិបាល នឹងបែងចែកថវិកាពិសេសចំនួន៣៥លានដុល្លារ ជំរុញសេដ្ឋកិច្ច ដើម្បីគាំទ្រការផ្តល់កម្ចីការប្រាក់ទាប ដល់សហគមន៍កសិកម្មទំនើបក្នុងរយៈពេលបីឆ្នាំ ដោយចាប់ផ្តើមពីឆ្នាំបច្ចុប្បន្នរហូតដល់ឆ្នាំ ២០២៧។
កញ្ចប់ជំរុញនេះ មានគោលបំណងបង្កើតយន្តការមួយ ដើម្បីពង្រឹងទីផ្សារកសិកម្ម ខណៈដែលការបង្កើនផលិតភាព។
លោកបានបន្ថែមថា រដ្ឋាភិបាលកំពុងពង្រីកការអភិវឌ្ឍន៍សហគមន៍កសិកម្មទំនើបនៅក្នុងខេត្ត និងគ្របដណ្តប់លើដំណាំដែលមានសក្តានុពលខ្ពស់ផ្សេងទៀតដូចជា គ្រាប់ស្វាយចន្ទី កៅស៊ូ និងទុរេន៕
