ដោយៈ ម៉ាណា
ភ្នំពេញៈ ក្រសួងទេសចរណ៍បាន និងកំពុងរៀបចំបង្កើតខ្សែទស្សនកិច្ចតភ្ជាប់ពីតំបន់ទេសចរណ៍បេតិកភ័ណ្ឌសៀមរាប អង្គរទៅកាន់តំបន់ឆ្នេរ ដែលនឹងជួយជំរុញកំណើនភ្ញៀវទេសចរជាតិ និងអន្តរជាតិកាន់តែច្រើនឡើងថែមទៀត រវាងប៉ូលទេសចរណ៍ដ៏សំខាន់ទាំងពីររបស់កម្ពុជា។
ក្រសួងទេសចរណ៍បានបង្ហាញ លើបណ្តាញទំនាក់ទំនងសង្គមរបស់ខ្លួនថា ដោយទទួលបានគោលការណ៍អនុញ្ញាត ដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការដាក់ឱ្យដំណើរការចលនាទីក្រុងស្អាត លោកហួត ហាក់ រដ្ឋមន្រ្តីក្រសួងទេសចរណ៍ បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយស្តីពី ការតភ្ជាប់តំបន់ទេសចរណ៍បេតិកភណ្ឌសៀមរាប-អង្គរ ទៅកាន់តំបន់ឆ្នេរ នៅសណ្ឋាគារសង្គហមិត្តខេត្តកែប។
-->
សិក្ខាសាលានេះ ត្រូវបានរៀបចំឡើងក្នុងគោលបំណងស្វែងរករួមគ្នានូវយុទ្ធសាស្ត្រគន្លឹះ ដើម្បីជំរុញការស្នាក់នៅរបស់ភ្ញៀវទេសចរ ឱ្យស្នាក់នៅបានកាន់តែយូរជាងមុន និងចំណាយឱ្យបានច្រើនជាងមុន តាមរយៈការធ្វើពិពិធកម្មផលិតផលទេសចរណ៍ និងព្រឹត្តិការណ៍ទេសចរណ៍ ពីតំបន់បេតិកភណ្ឌសៀមរាប -អង្គរ មកកាន់ខេត្តតំបន់ឆ្នេរសមុទ្រកម្ពុជា ទាំង៤ រួមមាន ខេត្តកែប កំពត ព្រះសីហនុ និងកោះកុង។
អង្គសិក្ខាសាលានារសៀលនេះ មានការអញ្ជើញចូលរួមពីឯកលោកអ៊ឹម បញ្ញារិទ្ធ អភិបារងខេត្តតំណាង លោកបណ្ឌិត សោម ពិសិដ្ឋ អភិបាល នៃគណៈអភិបាលខេត្តកែប និងមន្រ្តីពាក់ព័ន្ឋ។
ក្នុងអង្គសិក្ខាសាលាដ៏មានសារៈសំខាន់នេះ លោករដ្ឋមន្រ្តី បានថ្លែងនូវការកោតសរសើរ និងថ្លែងអំណរគុណដល់ ឧកញ៉ាហ៊ី សុធា ប្រធានថ្នាក់ជាតិសមាគមសណ្ឋាគារកម្ពុជា ឧកញ៉ា លោក លោកស្រីសមាជិក សមាជិកា នៃក្រុមប្រឹក្សាសមាគមសណ្ឋាគារកម្ពុជា ឧកញ៉ា លោក លោកស្រីប្រតិបត្តិករទេសចរណ៍ ក្នុងវិស័យសណ្ឋាគារ ភោជនីយដ្ឋាន និងភ្នាក់ងារទេសចរណ៍ ដែលតែងតែខិតខំចូលរួមយ៉ាងសកម្មជាមួយក្រសួងទេសចរណ៍ ក្នុងស្មារតីមហាគ្រួសារវិស័យទេសចរណ៍ ក្នុងការពង្រឹង និងពង្រីកផលិតផល និងសេវាកម្មទេសចរណ៍ឱ្យស្របតាមស្តង់ដា និងនវានុវត្តន៍តំបន់ និងអន្តរជាតិ ពិសេសបានចូលរួមទាក់ទាញភ្ញៀវទេសចរជាតិ និងអន្តរជាតិឱ្យមកទស្សនា និងស្នាក់នៅ នៅកម្ពុជា ដែលបានបង្កើតឱកាសការងារជូនប្រជាពលរដ្ឋ និងជាកាតាលីករក្នុងការជំរុញកំណើនសេដ្ឋកិច្ចជាតិ។
ទន្ទឹមនឹងនេះ លោករដ្ឋមន្រ្តី ក៏បានជម្រាបជូនអង្គសិក្ខាសាលាបន្ថែមទៀតថា ដើម្បីចូលរួមបង្កើនភាពទាក់ទាញ និងជំរុញកំណើនទេសចរណ៍កម្ពុជា ការយកចិត្តទុកដាក់ លើការកសាងហេដ្ឋារចនាសម្ព័ន្ធរូបវន្តគាំទ្រវិស័យទេសចរណ៍ ការលើកកម្ពស់គុណភាពសេវាកម្មទេសចរណ៍ ការធ្វើពិពិធកម្មផលិតផលទេសចរណ៍ ការរៀបចំព្រឹត្តិការណ៍ទេសចរណ៍ និងការរៀបចំកញ្ចប់ទស្សនកិច្ចទេសចរណ៍តភ្ជាប់ គឺការចូលរួមយ៉ាងសកម្ម និងការទទួលខុសត្រូវរួមគ្នាពីគ្រប់តួអង្គពាក់ព័ន្ធនៅក្នុងវិស័យទេសចរណ៍ ដើម្បីរក្សាឧត្តមភាពប្រកួតប្រជែងរបស់វិស័យទេសចរណ៍កម្ពុជានៅក្នុងតំបន់ និងសកលលោក៕
