ក្រសួងបរិស្ថានបាននិងកំពុងរៀបចំគម្រោង ដើម្បីប្រែក្លាយតំបន់កោះស្រឡៅ ក្នុងខេត្តកោះកុង ឱ្យទៅជា “កោះអព្យាក្រឹតកាបូនគំរូមួយ” ដំបូងគេនៅកម្ពុជា។
ដោយៈ គង់ សូរិយា
កោះកុងៈ ជាការអបអរសាទរមួយ ក្រសួងបរិស្ថានបាននិងកំពុងរៀបចំគម្រោង ដើម្បីប្រែក្លាយតំបន់កោះស្រឡៅ ក្នុងខេត្តកោះកុង ឱ្យទៅជា “កោះអព្យាក្រឹតកាបូនគំរូមួយ” ដំបូងគេនៅកម្ពុជា ក្នុងទិសដៅលើកកម្ពស់ជីវភាពសហគមន៍ អភិរក្សធនធនធម្មជាតិ និងបង្កើនភាពធន់នឹងការប្រែប្រួលអាកាសធាតុ។
រដ្ឋមន្រ្តីក្រសួងបរិស្ថាន លោកអ៊ាង សុផល្លែតបានលើកឡើងកាលពីពេលថ្មីៗនេះថា ដើម្បីឱ្យសហគមន៍កោះស្រឡៅ ធានាបាននូវទេសភាពស្រស់ត្រកាល បរិស្ថាន ស្អាត និងបៃតង ឈានឆ្ពោះទៅជា “កោះអព្យាក្រឹតកាបូន” នោះ ក្រសួងបានរៀបចំផែនការជាជំហានៗយ៉ាងហ្មត់ចត់ និងជាក់លាក់ជាច្រើន។
-->
លោកបញ្ជាក់ថា “ក្រសួងបរិស្ថានរៀបចំគម្រោងអភិវឌ្ឍន៍កោះស្រឡៅ ទៅជាកោះអព្យាក្រឹតកាបូនគំរូមួយនៅកម្ពុជា នៅពេលខាងមុខ តាមរយៈការគាំទ្រឱ្យមានកិច្ចសហប្រតិបត្តិការ ជាមួយដៃគូពាក់ព័ន្ធ ដើម្បីបង្កើតជម្រើសជីវភាព និងមុខរបរ”។ លោកបន្តថា “សកម្មភាពទាំងនេះ ចូលរួមចំណែកដល់ការអភិរក្ស បង្កើនភាពធន់នឹងការប្រែប្រួលអាកាសធាតុ ការគ្រប់គ្រងអនាម័យបរិស្ថាន ឱ្យមានភាពស្អាតទាំងនៅលើដី លើមេឃ និងក្នុងទឹក”។
បន្ថែមពីនេះ ក៏មានការរៀបចំគោលដៅលំហែបៃតង ដែលដើរតួនាទីដ៏សំខាន់ ក្នុងការកាត់បន្ថយការដាក់សម្ពាធ លើធនធានធម្មជាតិ និងលើកកម្ពស់ការងារអភិរក្សធនធានធម្មជាតិផងដែរ។
សហគមន៍កោះស្រឡៅ ស្ថិតក្នុងភូមិកោះស្រឡៅ ឃុំកោះកាពិ ស្រុកកោះកុង ដែលហ៊ុមព័ទ្ធទៅដោយព្រៃកោងកាង និងជាទីកន្លែងសម្បូរទៅដោយ ជីវៈចម្រុះជាច្រើនប្រភេទ គ្រឿងសមុទ្រធម្មជាតិស្រស់ៗ និងមានប្រជាសហគមន៍អាស្រ័យផលប្រមាណ៣០០គ្រួសារ។ ក្រៅពីព្រៃកោងកាងដ៏ទាក់ទាញ ភ្ញៀវទេសចរក៏អាចជិះទូក កម្សាន្តមើលផ្សោតផងដែរ។
លោកអ៊ាង សុផល្លែតបានពន្យល់ថា ជំហានដំបូង ប្រជាសហគមន៍ និងអាជ្ញាធរពាក់ព័ន្ធ ត្រូវរួមគ្នាសំអាតកោះស្រឡៅ ឱ្យបានស្អាតជាមុនសិន។ ក្នុងនោះ មានការរៀបចំទុកដាក់បែងចែកសំរាមជាជីកំប៉ុស និងឡដុតសំរាមសំណល់ប្លាស្ទិកដោយប្រើប្រាស់សូឡា ដោយកាត់បន្ថយការប្រើប្រាស់ប្លាស្ទិក ទប់ស្កាត់ការបោះសំរាមចោលផ្តេសផ្តាស ដើម្បីទប់ស្កាត់ការបំពុលទឹក ដី និងខ្យល់។
ជំហានបន្ទាប់ គឺការរៀបចំនូវហេដ្ឋារចនាសម្ពន្ធ័ផ្សេងៗ ដែលបម្រើដល់តម្រូវការចាំបាច់ របស់ប្រជាសហគមន៍ដោយប្រើប្រាស់ថាមពលស្អាត។ ក្រៅពីនេះ ក៏មានការជំរុញ និងលើកកម្ពស់ជីវភាពប្រជាសហគមន៍តាមរយៈ ការចិញ្ចឹមពូជក្តាមធម្មជាតិ ការការពារ និងដាំស្តារឡើងវិញព្រៃកោងកាង និងដើមក្រវាញជាដើម។
លើសពីនេះ ការបង្កើតគោលដៅលំហែបៃតង ឬអេកូទេសចរណ៍ធម្មជាតិ មានលក្ខណៈស្តង់ដាទាក់ទាញភ្ញៀវទេសចរជាតិ និងអន្តរជាតិក៏មានរួមបញ្ចូលផងដែរ។
លោករដ្ឋមន្រ្តីបានបន្តថា ការអភិវឌ្ឍជីវភាពប្រជាពលរដ្ឋនៅតាមមូលដ្ឋានបែបនេះ គឺជាអាទិភាពខ្ពស់របស់រាជរដ្ឋាភិបាលកម្ពុជា ដែលចង់ឃើញជីវភាពសហគមន៍យើងរីកចម្រើន និងចីរភាព។ ក្រសួងបរិស្ថាន ដោយមានការចូលរួម សហការពីក្រសួង ស្ថាប័ន អង្គភាព ពាក់ព័ន្ធ រដ្ឋបាលថ្នាក់ក្រោមជាតិ និងដៃគូពាក់ព័ន្ធ បាននិងកំពុងយកចិត្តទុកដាក់លើជីវភាពរបស់ប្រជាពលរដ្ឋ រស់នៅក្នុងតំបន់ការពារធម្មជាតិ ស្របតាមគោលនយោបាយនិងយុទ្ធសាស្រ្ត របស់រាជរដ្ឋាភិបាលកម្ពុជា ដែលបានដាក់ចេញកន្លងមក៕
