តើតម្លៃហាងឆេងមាសមានអ្វីប្រែប្រួលសំខាន់ៗដូចម្តេចនៅព្រឹកថ្ងៃសុក្រនេះ?

ដោយ: សហសេវិក
អន្តរជាតិ: តម្លៃហាងឆេងមាសបានធ្លាក់ថ្លៃចុះមកវិញក្នុងការជួញដូរនៅព្រឹកថ្ងៃសុក្រនេះ បន្ទាប់ពីបានស្ទុះងើបឡើងថ្លៃលើស៤.០០០ដុល្លារក្នុងមួយអោនក្នុងពេលបិទការជួញដូរកាលពីថ្ងៃព្រហស្បតិ៍ម្សិលមិញ ខណៈភាពតានតឹងពាណិជ្ជកម្មរវាងសហរដ្ឋអាមេរិក និងប្រទេសចិនបានថយចុះ។

តួយ៉ាង តម្លៃមាស Spot Gold បានធ្លាក់ចុះ០,៣១ភាគរយមកនៅត្រឹម៤០១០,៦៩ដុល្លារអាមេរិកក្នុងមួយអោន គិតត្រឹមម៉ោង៩:៥៨នាទីព្រឹកថ្ងៃសុក្រនេះ បន្ទាប់ពីបានងើបឡើងដល់៤០២៣,២២ដុល្លារក្នុងមួយអោនពេលបិទការជួញដូរត្រឹមកាលពីថ្ងៃព្រហស្បតិ៍ បើធៀបនឹងតម្លៃបិទការជួញដូរត្រឹម៣៩២៩,៣៦ដុល្លារអាមេរិកក្នុងមួយអោនកាលពីថ្ងៃពុធ។

ទោះជាយ៉ាងណា តម្លៃមាស U.S. gold futures បានងើបឡើង០,១៦ភាគរយដល់៤០២២,៣០ដុល្លារក្នុងមួយអោនគិតត្រឹមម៉ោង៩:៥៨នាទីព្រឹកដូចគ្នា បន្ទាប់ពីបានបិទការជួញដូរត្រឹមទំហំទឹកប្រាក់ចំនួន៤០១៥,៩ដុល្លារកាលពីថ្ងៃព្រហស្បតិ៍ និងចំនួន៤០០០,៧ដុល្លារក្នុងមួយអោនកាលពីថ្ងៃពុធ៕