ដោយៈ គង់ សូរិយា
ភ្នំពេញៈ អ្នកជំនាញអចលនទ្រព្យ និងជាប្រធានក្រុមប្រឹក្សាភិបាលសម្ព័ន្ឋក្រុមហ៊ុនSAM SN Group អ្នកឧកញ៉ាសំ សុខនឿនបានលើកឡើងថា រដ្ឋាភិបាលគួរពព្យាពេលការពន្ឋមូលធន លើអចលនទ្រព្យ ដោយរង់ចាំឲ្យទីផ្សារនេះ មានភាពល្អប្រសើរសិន។
អ្នកឧកញ៉ាបានមានប្រសាសន៍ឲ្យដឹង តាមបណ្តាញតេឡេក្រាមកាលពីរសៀលថ្ងៃទី៣១ តុលាថា ស្របពេលស្ថានភាពអចលនទ្រព្យ មិនទាន់មានភាពច្បាស់លាស់ និងប្រាកដប្រជា ពិសេសមិនទាន់ងើបផុតពីភាពជាប់គាំងនៅឡើយ ហេតុដូច្នេះរដ្ឋាភិបាល គួរពន្យាពេលបន្ថែមទៀត លើការយកពន្ឋនានា។
អ្នកឧកញ៉ាបានបន្តថា “នៅពេលរាជរដ្ឋាភិបាលប្រមូលពន្ឋមូល ធន វាធ្វើឲ្យអ្នកលក់ចាប់ផ្តើមដាក់តម្លៃខ្ពស់ជាងមុន ដើម្បីយកប្រាក់ទៅគ្របលើពន្ឋ ដែលជាកាតព្វកិច្ចរបស់ខ្លួន”។ អ្នកឧកញ៉ាបានបញ្ជាក់ថា “រដ្ឋាភិបាលគួររង់ចាំប្រមូលពន្ឋ នៅពេលអចលនទ្រព្យមានភាពប្រសើរឡើងវិញ ពេលនេះមិនគួរធ្វើទេ”។
អ្នកឧកញ៉ាសំ សុខនឿនបានបន្តថា នៅពេលទីផ្សារប្រសើរឡើងវិញ ទាំងអ្នកលក់ និងអ្នកទិញ នឹងមិនមានបញ្ហានោះទេ ព្រោះទាំងអ្នកលក់ក៏លក់បានតម្លៃខ្ពស់ អ្នកទិញក៏មានផលចំណេញ ពីការវិនិយោគរបស់ខ្លួនផងដែរ។
អ្នកឧកញ៉ាបន្តទៀតថា “ការយកពន្ឋមូលធននាពេលនេះ វាជាការដាក់បន្ទុកដល់អ្នកលក់ និងអ្នកទិញថែមទៀត ដែលធ្វើឲ្យឲ្យទីផ្សារកាន់តែមានបញ្ហាបន្ថែមទៀត”។ អ្នកឧកញ៉ាបន្តទៀតថា “ខ្ញុំយល់ថា រដ្ឋាភិបាលប្រមូលពន្ឋ ដើម្បីយកប្រាក់មកអភិវឌ្ឍន៍ប្រទេសជាតិ តែក្នុងស្ថានភាពនេះ មិនគួរនោះទេ”។
ជាមួយគ្នានេះ អ្នកជំនាញអចលនទ្រព្យនានា បានលើកឡើងដោយលក្ខខ័ណ្ឌមិនបញ្ចេញឈ្មោះថា “ការប្រមូលពន្ឋមូលធនអចលនទ្រព្យនាពេលនេះ ប្រៀបដូចជាយកកាកអំពៅ មកគាបយកទឹកអញ្ចឹង”៕
