ដោយៈ គង់ សូរិយា
បាត់ដំបងៈ នៅទីបំផុតគំរោងប្លង់ស្ថាបត្យកម្ម ព្រលានយន្តហោះលំដាប់អន្តរជាតិមួយ ដែលគ្រោងស្តារ និងសាងសង់នៅក្រុងបាត់ដំបងបានចេញចេញជារូបរាងជាប្លង់3Dហើយ។
បន្ទាប់ពីទទួលរងនូវវិបត្តិជំងឺខូវីត-១៩ នឹងរងនូវវិបត្តិសេដ្ឋកិច្ចសកល ធ្វើឱ្យរាំងស្ទះដល់ការដំណើរការអភិវឌ្ឍន៍ និងស្ថាបនាសាងសង់ឡើងវិញនូវ អាកាសយានដ្ឋានអន្តរជាតិ នៅវាលបែកចាន ក្រុងបាត់ដំបង ខេត្តបាត់ដំបង លំដាប់ថ្នាក់4E (Battambang International Airport ខណ:រាជរដ្ឋាភិបាលកម្ពុជាពិនិត្យសម្រេច ឱ្យលោកបណ្ឌិត ម៉ៅ ហាវណ្ណាល់ រដ្ឋមន្ត្រីប្រតិភូអមនាយករដ្ឋមន្រ្តី ទទួលបន្ទុករដ្ឋលេខា ធិការដ្ឋានអាកាសចរណ៍ស៊ីវិល និងជាប្រធានគណៈកម្មការអន្តរក្រសួង ធ្វើការសិក្សាអំពីលទ្ធភាពដើម្បីស្ដារ អភិវឌ្ឍន៍ព្រលានយន្ដហោះមួយនេះ ឱ្យទៅជាលំដាប់4Eឡើងវិញ។
-->
បច្ចុប្បន្នរដ្ឋលេខាធិការដ្ឋាន បានចុះបោះបង្គោលកំណត់ព្រំខណ្ឌបរិវេណដី អាកាសយានដ្ឋានបាត់ដំបង ដែលមានស្រាប់ និងបរិវេណដី តម្រូវការពង្រីកបន្ថែមជុំវិញព្រលានចាស់ រួចរាល់ទាំងស្រុងរង់ចាំតែថ្ងៃប្រកាស បើកការដ្ឋានអភិវឌ្ឍន៍ស្ថាបនាសាងសង់ឡើងមក។
កាលពីរឆ្នាំមុន នាព្រឹកថ្ងៃចន្ទ ទី១៨ ខែមីនា ឆ្នាំ២០២៤កន្លងទៅ លោកបណ្ឌិត ម៉ៅ ហាវណ្ណាល់ ដែលជាប្រធានគណៈកម្មការអន្តរក្រសួងសិក្សាអំពីលទ្ធភាពស្តារ និងអភិវឌ្ឍអាកាសយានដ្ឋានបាត់ដំបង លំដាប់ថ្នាក់4E បានអញ្ជើញជាអធិបតី ដឹកនាំកិច្ចប្រជុំគណៈកម្មការអន្តរក្រសួងសិក្សាអំពីលទ្ធភាពស្តារ និងអភិវឌ្ឍអាកាសយានដ្ឋានបាត់ដំបង លំដាប់ថ្នាក់ 4E និងក្រុមការងារបច្ចេកទេស សិក្សាអំពីលទ្ធភាពស្តារ និងអភិវឌ្ឍអាកាសយានដ្ឋានបាត់ដំបងលំដាប់4E ដោយមានការអញ្ជើញចូលរួមពីសំណាក់ពីមន្រ្តី មកពីក្រសួង-ស្ថាប័ន ពាក់ព័ន្ធ។
នៅក្នុងកិច្ចប្រជុំបានពិនិត្យ និងពិភាក្សាលើរបៀបវារៈដូចជា ទី១-ការផ្សព្វផ្សាយអនុក្រឹត្យលេខ ៣២៨ អនក្រ.បក ចុះថ្ងៃទី១០ ខែវិច្ឆិកា ឆ្នាំ២០២៣ របស់រាជរដ្ឋាភិបាល ស្តីពីការធ្វើចំណាត់ថ្នាក់ជាទ្រព្យសម្បត្តិសាធារណៈរបស់រដ្ឋ ដីដែលមានទីតាំងស្ថិតក្នុងភូមិសាស្រ្តក្រុងបាត់ដំបង និងស្រុកសង្កែ ខេត្តបាត់ដំបង សម្រាប់អភិវឌ្ឍអាកាសយានដ្ឋានបាត់ដំបង លំដាប់ថ្នាក់4E។
ទី២-ការចាត់តាំងអនុវត្តអនុក្រឹត្យលេខ៣២៨ អនក្រ.បក ចុះថ្ងៃទី១០ ខែវិច្ឆិកា ឆ្នាំ២០២៣ របស់រាជរដ្ឋាភិបាល។ ទី៣- ចុះបោះបង្គោលកំណត់ព្រំខណ្ឌបរិវេណដី អាកាសយានដ្ឋានបាត់ដំបង ដែលមានស្រាប់ និងបរិវេណដីតម្រូវការពង្រីកបន្ថែម និងទី៤-បញ្ហាផ្សេងៗ។
អាកាសយានដ្ឋានកម្រិត4E គឺជាព្រលានដែលមានប្រវែងផ្លូវរត់ Runway ប្រវែង3600ម៉ែត្រ និងទទឹង45ម៉ែត្រ ហើយអាចទទួលយន្តហោះខ្នាតធំបង្គួរ ដែលមានប្រវែងតួ70ម៉ែត្រ និងប្រវែងទទឹងគម្លាតស្លាប65ម៉ែត្រ ដូចជា ប្រភេទយន្តហោះ Airbus A330, 340 ឬប្រភេទ Boeing B777។ល។៕
