ដោយៈ សហសេវិក
ភ្នំពេញៈ ក្នុងនាមជាអ្នកជំនួញខ្មែរមួយរូប អ្នកឧកញ៉ា សំ សុខនឿន មិនបាននៅស្ងៀមឡើយ ពេលមានឱកាសក្នុងការបង្កើតអ្វីថ្មីៗ ដែលនោះជាការពង្រីកទំហំសេដ្ឋកិច្ចទាំងផ្ទាល់ខ្លួន និងរួមចំណែកជួយសេដ្ឋកិច្ចជាតិដូចគ្នា។
នាពេលថ្មីៗនេះអ្នកឧកញ៉ា និងជាប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP រូបនេះ បានធ្វើដំណើរទៅក្រៅប្រទេស ដើម្បីស្វែងរកដៃគូជំនួញ។
អ្នកឧកញ៉ាបានបង្ហើបខ្លះៗពីជំនួញថ្មីនោះ គឺជាប្រេនកូនខ្មែរដ៏ធំមួយ មានឈ្មោះថា KH Haitech ដែលនាពេលខាងមុខនឹងឈានដល់ការបង្កើតរោងចក្របង្គុំនៅកម្ពុជាតែម្ដង។
សម្រាប់ KH Haitech នឹងមានផលិតផលអ្វីខ្លះ ដើម្បីផ្គត់ផ្គង់ទីផ្សារកម្ពុជា ក្នុងនាមជាផលិតផលក្នុងស្រុក អ្នកឧកញ៉ាដែលមានដើមកំណើតនៅស្រុកក្រូចឆ្មាររូបនេះ នៅមិនទាន់បញ្ចេញឲ្យដឹងអស់នៅឡើយ។
អ្នកឧកញ៉ាគ្រាន់តែជឿជាក់បានថា KH Haitech នឹងជួយបង្កើតការងារដល់ប្រជាពលរដ្ឋក្នុងស្រុក។
ប្រេន KH Haitech នឹងអាចចេញជារូបរាងនៅឆ្នាំ ២០២៦ ខាងមុខ ហើយអគ្គនាយក SAM SN GROUP រូបនេះ បានអះអាងថា នឹងនាំយកជំនាញ និងបច្ចេកវិទ្យាទំនើបមកកាន់កម្ពុជា ហើយប្រជាពលរដ្ឋខ្មែរនឹងទទួលបានជំនាញថ្មីស្តង់ដារមួយ។
អ្នកជំនាញវិស័យអចលនទ្រព្យដ៏មានកេរ្តិ៍ឈ្មោះ អ្នកឧកញ៉ា សំ សុខនឿន បានឲ្យដឹងទៀតថា លោកខិតខំប្រឹងប្រែងកសាងទុកម៉ាកយីហោ កូនខ្មែរដែលមានស្តង់ដារអន្តរជាតិមួយ សម្រាប់កូនចៅជំនាន់ក្រោយ។
KH Haitech ជាយីហោខ្មែរ និងផលិតក្នុងស្រុក ដែលមានស្ថាបនិកអ្នកឧកញ៉ា សំ សុខនឿន សហការជាមួយដៃគូអន្តរជាតិ នាំយកជំនាញ និងគុណភាពស្តង់ដារមកកាន់កម្ពុជាឆាប់ៗខាងមុខនេះ៕
