ដោយៈ ម៉ាណា
ព្រៃវែងៈ ជាខេត្តដែលគេតែងតែមើលរំលង លើវិស័យទេសចរណ៍ ប៉ុន្តែខេត្តដែលស្ថិតនៅមិនឆ្ងាយ ពីរាជធានីភ្នំពេញនេះ បាននិងកំពុងបង្ហាញនូវរមណីយដ្ឋានធម្មជាតិមួយ ដែលសម្បូរដោយសត្វស្លាបកម្រជាច្រើន។
យោងតាមក្រសួងបរិស្ថានបានឲ្យដឹងថា ទួលព័ន្ធតាឡី-បឹងស្នេហ៍ ស្ថិតក្នុងភូមិបឹងស្នេហ៍ ឃុំធាយ ស្រុកបាភ្នំ ខេត្តព្រៃវែង និងត្រូវបានបង្កើតជាតំបន់ប្រើប្រាស់ច្រើនយ៉ាងទួលព័ន្ធតាឡី-បឹងស្នេហ៍ តាមរយៈអនុក្រឹត្យរបសរាជរដ្ឋាភិបាលកម្ពុជា លេខៈ ១៦ អនក្រ.បក ចុះថ្ងៃទី០៥ ខែកុម្ភៈ ឆ្នាំ២០២១។
ក្រសួងបរិស្ថាន រួមជាមួយរដ្ឋបាលខេត្តព្រៃវែង អាជ្ញាធរមូលដ្ឋាន និងប្រជាសហគមន៍ បានយកចិត្តទុកដាក់ខ្ពស់ ក្នុងការគ្រប់គ្រងធនធានធម្មជាតិ និងជីវៈចម្រុះ ព្រោះតំបន់ការពារធម្មជាតិមួយនេះ មានសក្តានុពលខ្ពស់ទាំងផ្នែកសង្គម វប្បធម៌ និងការអភិរក្ស ជាតំបន់ការពារធម្មជាតិ។
តំបន់ប្រើប្រាស់ច្រើនយ៉ាងទួលព័ន្ធតាឡី-បឹងស្នេហ៍នេះ បានផ្តល់ជាសេវាកម្មប្រព័ន្ធអេកូឡូស៊ី និងធនធានធម្មជាតិយ៉ាងសម្បូរបែបដែលគាំទ្រដល់ការអភិវឌ្ឍសហគមន៍មូលដ្ឋានដូចជា ជាពិសេស បានទ្រទ្រង់ដល់វត្តមានសត្វស្លាបជាច្រើនប្រភេទ រួមមាន ប្រភេទទទួលរងការគំរាមកំហែង និងជិតផុតពូជលើពិភពលោក និងដែលមានតម្លៃខ្ពស់សម្រាប់ការអភិរក្សជាអន្តរជាតិ និងជាទីសំចតរបស់ប្រភេទសត្វស្លាបទេសសន្តរប្រវេសន៍ មកស្នាក់នៅនិងរកចំណីបណ្តោះអាសន្ន ជាតំបន់ដែលមានជម្រក ពងកូនសត្វស្លាបទឹកធំជាងគេទី២ នៅប្រទេសកម្ពុជាបន្ទាប់ពីតំបន់រ៉ាមសារព្រែកទាល់៕
