តើខេត្តព្រះសីហនុល្អសម្រាប់វិនិយោគិននៅឆ្នាំ២០២៦ដែរឬទេ បន្ទាប់ពីបង្រ្កាបកល្បែងអនឡាញ?

ដោយៈ គង់ សូរិយា

    ព្រះសីហនុៈ លើសពីទឹកសមុទ្រខៀវស្រងាត់ ជាមួយរលកតូចៗ ខេត្តព្រះសីហនុ បង្ហាញខ្លួនក្នុងទិដ្ឋភាពជាខេត្តមួយ ដែលស្ងប់ស្ងាត់ បន្ទាប់ពីការបិទហ្គេមអនឡាញ និងការមកដល់នៃកូវីដ១៩កាលពីឆ្នាំ២០២០។

ជាមួយនឹងការដាក់ចេញនូវផែនការរៀបចំខេត្តនេះ ជាតំបន់សេដ្ឋកិច្ចគំរូពហុបំណង ការវិនិយោគលើកំពង់ផែទឹកជ្រៅជាបន្តបន្ទាប់ ប្រែក្លាយជាតំបន់ទាក់ទាញទេសចរណ៍បៃតង ការតភ្ជាប់ផ្លួវអាកាស និងការតភ្ជាប់ផ្លូវល្បឿនលឿនជាលើកដំបូង ជាមួយរាជធានីភ្នំពេញ ក្នុងប្រវត្តិសាស្រ្តកម្ពុជា ខេត្តនេះកំពុងអភិវឌ្ឍន៍យ៉ាងស្ងៀមស្ងាត់ បន្ទាប់ពីការអភិវឌ្ឍន៍ដ៏លឿន និងលេចធ្លោចន្លោះឆ្នាំ២០១៦ ២០២០។

អ្នកជំនាញបានលើកឡើងថា អចលនទ្រព្យនៅខេត្តព្រះសីហនុបច្ចុប្ប​ន្ន មានតម្លៃថោកជាងសម័យកាលរីកចម្រើន ដែលជាចំណុចចូលល្អសម្រាប់វិនិយោគិនរយៈពេលវែង ជាមួយទីតាំងយុទ្ធសាស្ត្រ ជា​មជ្ឈ​មណ្ឌលពាណិជ្ជកម្មសំខាន់របស់កម្ពុជា ដោយ៧៥ភាគេយនៃច្រករបៀងពាណិជ្ជកម្មឆ្លងកាត់ភ្នំពេញ-ក្រុងព្រះសីហនុ។

រដ្ឋាភិបាល កំពុងកិច្ចខិតខំប្រឹងប្រែងយ៉ាងខ្លាំង ដើម្បីសម្អាតឧក្រិដ្ឋកម្មនិងកែលម្អរូបភាព ដោយផ្តោតលើ “សេដ្ឋកិច្ចពិត” ជាសេដ្ឋកិច្ចព៌ណ “ស”។

សម្តេចធិបតីហ៊ុន ម៉ាណែតនាយករដ្ឋមន្រ្តីនៃរាជរដ្ឋាភិបាលកម្ពុជាបានថ្លែងកាលពីពេលថ្មីៗនេះថា កម្ពុជាកំពុងប្រែក្លាយពីសេដ្ឋកិច្ចព៌ណខ្មៅ មកជាសេដ្ឋកិច្ចព៌ណ “ស” ដើម្បីទាក់ទាញការវិនិយោគ។

សម្តេចបានសុំទោសប្រជាពលរដ្ឋមួយចំនួន ដែលរងផលប៉ះពាល់ពីការបង្រ្កាបល្បែងអនឡាញ។

ទោះជាយ៉ាងណា ស្រមោលអតីតកាលនៅតែត្រូវបានលាបព៌ណ និងលងបន្លាច ដោយទីក្រុងនេះ នៅតែត្រូវបានគេស្គាល់ទូទាំងពិភពលោកសម្រាប់ការបោកប្រាស់ វិនិយោគិនព្រួយបារម្ភអំពីតម្លាភាព។

ជាមួយគ្នានេះ ការដោះស្រាយបញ្ហាអាគារជាប់គាំងរាប់រយក្នុង ខេត្តនេះ មិនទាន់បានលេចចេញនូវសកម្មភាពជាដុំកំភួនក៏ដោយ បើទោះបីជារដ្ឋាភិបាលបង្ហាញទិន្នន័យ នៃការវិនិយោគហាក់ដូចជាត្រឹមរបាយការណ៍នៅលើក្រសាស ច្រើនជាងសកម្មភាពពិត។

បច្ចុប្បន្ននេះ ចំនួនយូនីតខុនដូ និងសណ្ឋាគារច្រើនពេកត្រូវបានសាងសង់ក្នុងអំឡុងពេលរីកចម្រើន ជាអ្វីដែលជានិន្នាការពពុះសាប៊ូ ឬការផ្គត់ផ្គង់លើសតម្រូវការ។

អ្នកវិភាគនិយាយថា ក្រុងព្រះសីហនុគឺជាទីក្រុង “កើនឡើង បន្ទាប់មកធ្លាក់ចុះ និងចាប់ផ្តើមកំណត់នូវគោលនយោបាយឡើងវិញ”។

ទីក្រុងនេះ ពីមុនមកមានការការរីកចម្រើន ដែលជំរុញដោយ

ល្បែងស៊ីសង ប៉ុន្តែឥឡូវនេះ កំពុងព្យាយាមក្លាយជាមជ្ឈមណ្ឌលសេដ្ឋកិច្ចធម្មតា។

អ្នកជំនាញបាននិយាយថា សម្រាប់ការវិនិយោគរយៈពេលខ្លី នៅតែមានហានិភ័យ ប៉ុន្តែបើគិតរយៈពេលវែង  ទីក្រុងនេះនៅតែសក្តានុពល ប្រសិនបើកំណែទម្រង់ទទួលបានជោគជ័យ៕